ފަހު މެޗުގައި ލަންކާ ބަލިކޮށް، ރާއްޖެ އަށް ފުރިހަމަ ރެކޯޑެއް
26 ޖެނުއަރީ 2026 | ހޯމަ 08:37މިއީ ސާފް ފުޓްސަލް ޗެމްޕިއަންޝިޕް ބޭއްވި ފުރަތަމަ ފަހަރު. މުބާރާތުގައި ހަތް ޤައުމު ވާދަ ކުރިއިރު، ރާއްޖެ އިން މުބާރާތުގެ ޗެމްޕިއަންކަން ހޯދީ ހަ މެޗުން ވެސް މޮޅުވެގެން.
ސާފް ފުޓްސަލް ޗެމްޕިއަންޝިޕްގައި ވާާދަ ކުރި ރާއްޖޭގެ ޤައުމީ ފުޓްސަލް ޓީމު | ސާފް
ސާފް ފުޓްސަލް ޗެމްޕިއަންޝިޕްގެ ފަހު މެޗުގައި ސްރީ ލަންކާ އާ ދެކޮޅަށް ކުޅުނު މެޗުން ވެސް މޮޅުވެ، ފުރިހަމަ ރެކޯޑަކާ އެކު ރާއްޖެ އިން މުބާރާތް ނިންމާލައިފި އެވެ.
ތައިލެންޑުގައި ކުރިއަށް ދިޔަ މުބާރާތުގައި ހޯމަ ދުވަހު ރާއްޖެ އިން ލަންކާއާ ދެކޮޅަށް ނިކުތްއިރު، އެ މެޗު ރާއްޖެ އިން ކާމިޔާބު ކުރީ 5-2 އިންނެވެ. މެޗުގެ ފުރަތަމަ ހާފުގައި ރާއްޖެ އިން ދެ ލަނޑު ޖެހިއިރު، ލަންކާ އިން ވެސް ލަނޑެއް ޖެހި އެވެ. ރާއްޖެ އިން އަނެއް ތިން ލަނޑު ދެ ވަނަ ހާފުގައި ޖެހި އިރު، މި ހާފުގައި ލަންކާ އިން ދެ ވަނަ ލަނޑެއް ޖެހި އެވެ.
މެޗުގައި ރާއްޖެ އިން ލީޑު ޖެހީ ކެޕްޓަން މުޙައްމަދު އިމްރާން ޖެހި ލަނޑުންނެވެ. އޭނާ ފޮނުވާލި ބޯޅަ ލަންކާ ގޯލަށް ވަނީ، އެ ޓީމުގެ ގޯލު ކީޕަރުގެ ފައިގައި ޖެހިފަ އެވެ. މެޗުގެ ފުރަތަމަ ހާފު ނިމެން ކުޑަ ވަގުތު ކޮޅަކަށް ވެފައި ވަނިކޮށް ލަންކާގެ މުޙައްމަދު ތިލްހަމް ލަނޑު ޖަހައި ނަތީޖާ ހަމަހަމަ ކޮށްފަ އެވެ. ނަމަވެސް، ފުރަތަމަ ހާފުގެ އެންމެ ފަހު ވަގުތުގައި ރާއްޖެ އަށް އަލުން ލީޑު ނަގައިދިނީ ހުޒައިފަތު ރަޝީދު އެވެ.
މެޗުގެ ދެ ވަނަ ހާފު ފަށައިގެން ކުރީ ކޮޅު ލަންކާ އިން ލަނޑު ޖަހައި ނަތީޖާ ހަމަހަމަ ކުރި އެވެ. އެއީ އަމާން މުޙައްމަދު ފައިޒާ ޖެހި ލަނޑުންނެވެ. ނަމަވެސް އަޙުމަދު ހަލީމް ފޮނުވާލި ބޯޅައެއް ލަންކާގެ ކުޅުންތެރިޔެއްގެ ގައިގައި ޖެހި ގޯލަށް ވަދެން ރާއްޖެ އަށް ލީޑު ލިބުނެވެ. އޭގެ ފަހުން ރާއްޖޭގެ އަނެއް ދެ ލަނޑު ޖެހީ ޙުސެއިން ސުހައިލް އަދި އިމްރާން އެވެ.
މިއީ ސާފް ފުޓްސަލް ޗެމްޕިއަންޝިޕް ބޭއްވި ފުރަތަމަ ފަހަރެވެ. މުބާރާތުގައި ހަތް ޤައުމު ވާދަ ކުރިއިރު، ރާއްޖެ އިން މުބާރާތުގެ ޗެމްޕިއަންކަން ހޯދީ ހަ މެޗުން ވެސް މޮޅުވެގެންނެވެ. މިއީ ރާއްޖެ އިން ފުޓްސަލްގެ ބައިނަލްއަޤުވާމީ ތައްޓެއް ކާމިޔާބު ކުރި ފުރަތަމަ ފަހަރެވެ. މުބާރާތުގައި ދެން ވާދަކޮށްފައި ވަނީ ޕާކިސްތާން، ބަންގްލަދޭޝް، އިންޑިއާ، ނޭޕާލް، އަދި ބޫޓާން އެވެ.
