ހަތަރު ވަނަ މެޗުގައި ނޭޕާލް ބަލިކޮށް، ރާއްޖެ އިން ތައްޓާ ގާތަށް

މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގައި ރާއްޖެ އިން ކުޅުނު ހަތަރު ވަނަ މެޗުގައި ނޭޕާލްގެ މައްޗަށް ވެސް ކުރި ހޯދައި، މުބާރާތުގެ ތައްޓާ ގާތަށް ޖެހިލައިފި އެވެ.

ބުރާސްފަތި ދުވަހު ނޭޕާލް އާ ދެކޮޅަށް ކުޅުނު މެޗު ރާއްޖެ އިން ކާމިޔާބު ކުރީ 2-1 އިންނެވެ. މެޗުގެ ފުރަތަމަ ހާފުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، ފުރަތަމަ ހާފު ނިމުނީ އެެއްވެސް ޓީމަކަށް ލަނޑެއް ނުޖެހި އެވެ. ދެ ޓީމުގެ ލަނޑުތައް ވެސް ފެނުނީ މެޗުގެ ދެ ވަނަ ހާފުގަ އެވެ. 

ދެ ވަނަ ހާފުގައި އެންމެ ފުރަތަމަ ލަނޑު ޖަހައި ލީޑު ނެގީ ވެސް ރާއްޖެ އިންނެވެ. ޢަބްދުﷲ ޝާފިއު ޖެހި ލަނޑާ އެކު ރާއްޖެ އިން ލީޑު ނެގިއިރު، ނޭޕާލް އަށް ނަތީޖާ ހަމަހަމަ ކޮށްދިނީ  ބިކްރާންތު ނާސިން އެވެ. މެޗުން ރާއްޖެ މޮޅުވީ، ރާއްޖެ އަށް ލިބުނު ހިލޭ ޖެހުމެއްގައި މުޙައްމަދު އިމްރާން ޖެހި ލަނޑުންނެވެ.

މުބާރާތުގައި ރާއްޖެ އިން ވަނީ މީގެ ކުރިން ޕާކިސްތާން، ބަންގްލަދޭޝް އަދި އިންޑިއާ އާ ދެކޮޅަށް ކުޅުނު މެޗުން ވެސް މޮޅުވެފަ އެވެ. ހަތަރު ވަނަ މެޗުގައި ނޭޕާލް ވެސް ބަލިކޮށް، ރާއްޖެ އިން އެއް ވަަނައިގައި އޮތީ ސައްތަ އިން ސައްތަ ރެކޯޑާ އެކު އެވެ. މުބާރާތުގައި ރާއްޖެ އަށް ބާކީ ދެން އޮތީ ހޮނިހިރު ދުވަހު ބޫޓާންއާ ދެކޮޅަށް ކުޅޭ މެޗާއި، ހޯމަ ދުވަހު ސްރީ ލަންކާއާ ދެކޮޅަށް ކުޅޭ މެޗެވެ. 

މުބާރާތުގެ ޗެމްޕިއަންކަން ހޯދުމަށް، އެ ދެ މެޗުން ރާއްޖެ އަށް މިހާރު ބޭނުން ވަނީ ދެ ޕޮއިންޓެވެ.