ތިން ވަނަ މެޗުގައި އިންޑިއާ ބަލިކޮށް، ރާއްޖެ ކުރިއަށް

މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގައި ދިވެހި ރާއްޖެ އިން ކުޅުނު ތިން ވަނަ މެޗުގައި އިންޑިއާގެ މައްޗަށް ވެސް ކުރި ހޯދައި، ރަނގަޅު ފޯމާ އެކު ކުރިއަށް ޖެހިލައިފި އެވެ.

ތައިލެންޑުގައި ކުރިއަށްދާ މުބާރާތުގައި އަންގާރަ ދުވަހު އިންޑިއާއާ ދެކޮޅަށް ރާއްޖެ އިން ނިކުތްއިރު، އެ މެޗު ރާއްޖެ އިން ކާމިޔާބު ކުރީ 5-0 އިންނެވެ. މެޗުގެ ފުރަތަމަ ހާފުގައި ރާއްޖެ އިން އެއް ލަނޑު ޖެހިއިރު، އަނެއް ހަތަރު ލަނޑު ވެސް ޖެހީ ދެ ވަނަ ހާފުގަ އެވެ.

މެޗު ފަށައިގެން އިންޑިއާ އިން ރަނގަޅަށް ކުޅެމުން ދިޔަ ނަމަވެސް، ރާއްޖެ އިން ހިތްވަރުކޮށް ލީޑު ނެގި އެވެ. ފުރަތަމަ ހާފުގައި ރާއްޖެ އަށް ލީޑު ނަގައިދިނީ މުޙައްމަދު އިމްރާން އެވެ. އޭގެ ފަހުން ދެ ވަނަ ހާފު ފަށައިގެން ކުރީ ކޮޅު ރާއްޖެ އިން އިތުރު ދެ ލަނޑު ވެސް ޖެހި އެވެ. އެގޮތުން ރާއްޖޭގެ ދެ ވަނަ ލަނޑު ޖަހައި ލީޑު ފުޅާ ކޮށްދިނީ ޢަބްދުﷲ ޝާފިއު އެވެ.

އޭގެ ފަހުން ރާއްޖޭގެ ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ އަލީ ޝަމާލް ޢަބްދުﷲ އެވެ. މެޗުގައި ރާއްޖޭގެ ހަތަރު ވަނަ ލަނޑު ވެސް ޖެހީ އިމްރާން އެވެ. އަދި މެޗުގައި ރާއްޖޭގެ ފަސް ވަނަ ލަނޑު ޖަހައި، އިންޑިއާ އަތުން ފުރިހަމަ މޮޅެއް ހޯދައިދިނީ އަޙުމަދު ޙަލީމް އެވެ.

މޮޅާ އެކު ރާއްޖެ އިން އެއް ވަނައިގައި އޮތީ މިހާތަނަށް ކުޅެފައިވާ ތިން މެޗުން ވެސް މޮޅުވެ ނުވަ ޕޮއިންޓާ އެކު އެވެ. މީގެ ކުރިން ރާއްޖެ އިން ވަނީ ޕާކިސްތާާން އަދި ބަންގްލަދޭޝްއާ ދެކޮޅަށް ކުޅުނު މެޗުން ވެސް މޮޅުވެފަ އެވެ. ދެ ވަނައިގައި ބަންގްލަދޭޝް އޮތީ ރާއްޖެ އަށް ވުރެ އެއް މެޗު އިތުރަށް ކުޅެގެން ހަތް ޕޮއިންޓާ އެކު އެވެ. 

މުބާރާތުގައި ރާއްޖެ އަށް ދެން އޮތީ ބުރާސްފަތި ދުވަހު ނޭޕާލްއާ ދެކޮޅަށް ކުޅޭ މެޗެވެ. އޭގެ ފަހުން ހޮނިހިރު ދުވަހު ރާއްޖެ ނިކުންނާނީ ބޫޓާންއާ ދެކޮޅަށެވެ. އަދި މުބާރާތުގައި ފަހު މެޗުގައި ސްރީ ލަންކާއާ ދެކޮޅަށް ނިކުންނާނީ ހޯމަ ދުވަހު އެވެ.