ދެ ވަނަ މެޗުގައި ރާއްޖެ އިން ބަންގްލަދޭޝް ވެސް ބަލިކޮށްފި

މިހާރު ކުރިއަށްދާ ސާފް ފުޓްސަލް ޗެމްޕިއަންޝިޕްގެ ފިރިހެން ޑިވިޝަންގައި ރާއްޖޭގެ ޤައުމީ ފުޓްސަލް ޓީމުން ކުޅުނު ދެ ވަނަ މެޗުގައި ބަންގްލަދޭޝް ބަލިކޮށް، ރަނގަޅު ފޯމު ދަމަހައްޓައިފި އެވެ.

ތައިލެންޑުގައި ކުރިއަށްދާ މި މުބާރާތުގައި ހުކުރު ދުވަހުގެ ރޭ ރާއްޖެ އިން ބަންގްލަދޭޝްއާ ދެކޮޅަށް ނިކުތްއިރު، އެ މެޗު ރާއްޖެ އިން ކާމިޔާބު ކޮށްފައި ވަނީ 6-1 އިންނެވެ. މެޗުގެ ފުރަތަމަ ހާފުގައި ރާއްޖެ އިން ހަތަރު ލަނޑު ޖެހިއިރު، ބަންގްލަދޭޝް އިން ވެސް ލަނޑެއް ޖެހި އެވެ. ރާއްޖޭގެ އަނެއް ދެ ލަނޑު ޖެހީ މެޗުގެ ދެ ވަނަ ހާފުގަ އެވެ.

މެޗުގައި ރާއްޖޭގެ ފުރަތަމަ ލަނޑު ޖެހީ ކެޕްޓަން މުޙައްމަދު އިމްރާމް އެވެ. އޭގެ ފަހުން ރާއްޖޭގެ ދެ ވަނަ ލަނޑު ޖެހީ އިޝާން އިބްރާހީމް އެވެ. ރާއްޖެ އިން މެޗުގައި ރަނގަޅު ކުޅުމެއް ދެއްކިއިރު، ތިން ވަނަ ލަނޑު ޖަހައި އިތުރަށް ލީޑު ފުޅާ ކޮށްދިނީ އަޙުމަދު ރާހިލް ރަޝީދު އެވެ. އަދި ރާއްޖެ އަށް ލިބުނު ޕެނަލްޓީއެއް ކާމިޔާބުކޮށް ހަތަރު ވަނަ ލަނޑު ޖެހީ އަލީ ޝިޔާހު އެވެ.

ފުރަތަމަ ހާފު ނިމުމުގެ ކުރިން ބަންގްލަދޭޝް އިން ވަނީ އެ ޓީމުގެ ހަމައެކަނި ލަނޑު ޖަހައިފަ އެވެ. އެއީ އެ ޓީމުގެ ކާޒީ އިބްރާހީމް ޖެހި ލަނޑެވެ. ދެ ވަނަ ހާފުގައި ރާއްޖޭގެ ފަސް ވަނަ ލަނޑު ޖެހީ ރާހިލް އެވެ. އަދި މެޗުގައި ރާއްޖޭގެ ފަހު ލަނޑު ޖެހީ ޢަބްދުﷲ ޝާފިއު އެވެ. މެޗުގައި ބަންގްލަދޭޝް އިން ލަނޑު ޖަހަން ގިނަ ފުރުސަތު ތަކެއް ތަނަވަސް ކުރި ނަމަވެސް، ރާއްޖެ އިން ވަނީ އެ ޓީމުގެ ހަމަލާތައް ހުއްޓުވައިފަ އެވެ. 

ދެ ވަނަ މެޗުގައި ރާއްޖެ އިން ބަންގްލަދޭޝް ބަލިކުރިއިރު، މުބާރާތުގައި ރާއްޖޭގެ ފުރަތަމަ މެޗުގައި ވަނީ ތަފާތު ބޮޑު ނަތީޖާ އަކުން ޕާކިސްތާން ވެސް ބަލިކޮށްފަ އެވެ. އެ މެޗު ރާއްޖެ އިން ކާމިޔާބު ކޮށްފައި ވަނީ 7-1 އިންނެވެ. ދެ މެޗުން ވެސް މޮޅުވެ ހަ ޕޮއިންޓާ އެކު ރާއްޖެ އޮތީ ލީގު ތާވަލްގެ އެއް ވަނަ މަގާމުގަ އެވެ. ރާއްޖޭގެ ފަހަތުން ދެ ވަނައިގައި އޮތް ނޭޕާލް އާއި ތިން ވަނައިގައި އޮތް ޕާކިސްތާން އަށް ލިބެނީ ތިން ޕޮއިންޓެވެ. 

 މުބާރާތުގައި ހޯމަ ދުވަހު ރާއްޖެ އިން ނިކުންނާނީ އިންޑިއާއާ ދެކޮޅަށެވެ.