އަންނަ ޖެނުއަރީ މަހު ތައިލޭންޑްގައި ބާއްވާ ސާފް ފުޓްސަލް ޗެމްޕިއަންޝިޕް 2026 ގައި ދިވެހިރާއްޖޭގެ ގައުމީ ފިރިހެން ފުޓްސަލް ޓީމު ގެ ފުރަތަމަ މެޗުގައި ޕާކިސްތާނާއި ދެކޮޅަށް ނިކުންނަން ޖެހިއްޖެ އެވެ.

ދެނުކު އޭޝިއާ ގެ އަންހެން އަދި ފިރިހެން ޓީމުތަކަށް ބާއްވާ ފުރަތަމަ ފުޓްސަލް މުބާރާތް ތާވަލު ކޮށްފައިވަނީ، ޖެނުއަރީ މަހުގެ 13-26 އަށް ތައިލެންޑުގައި ކުރިއަށްގެންދާ ގޮތަށެވެ. މިއީ، ސާފް އިން މި ސަރަހައްދުގެ ގައުމުތަކަށް ބާއްވާ ފުރަތަމަ ފުޓްސަލް މުބާރާތެވެ.

ސައުތު އޭޝިއަން ފުޓްބޯލް ފެޑެރޭޝަން (ސާފް) އިން އިއްޔެ އާންމު ކޮށްފައިވާ މި މުބާރާތު ގެ ޝެޑިއުލް އަށް ބަލާއިރު، ރާއްޖޭގެ ފުރަތަމަ މެޗު ކުޅެން ހަމަޖެހިފައިވަނީ 14 ޖެނުއަރީ ގަ އެވެ. މި މުބާރާތުގައި ރާއްޖޭގެ ދެވަނަ މެޗު ކުޅެން ހަމަޖެހިފައިވަނީ 16 ޖެނުއަރީ ގައި ބަނގްލަދޭޝް އާއި ދެކޮޅަށެވެ. ގްރޫޕް ސްޓޭޖު ގައި ރާއްޖެއިން ކުޅެން ޖެހޭ ތިން ވަނަ މެޗު އޮންނާނީ 20 ޖެނުއަރީ ގައި އިންޑިއާ އާއި ދެކޮޅަށެވެ.

ގްރޫޕް ސްޓޭޖު ގައި ރާއްޖެއިން ކުޅެން ޖެހޭ ހަތަރު ވަނަ މެޗު ކުޅެން ހަމަޖެހިފައިވަނީ 22 ޖެނުއަރީގައި ނޭޕާލް އާއި ދެކޮޅަށެވެ. 24 ޖެނުއަރީ ގައި ރާއްޖެ ނިކުންނާނީ ބޫޓާން އާއި ދެކޮޅަށެވެ. ގްރޫޕް ސްޓޭޖުގެ ފަހު މެޗު ގައި ރާއްޖެ ނިކުންނާނީ 26 ޖެނުއަރީ ގައި އަވައްޓެރި ސްރީލަންކާ އާއި ދެކޮޅަށެވެ.

މި މުބާރާތުގައި ބައިވެރިވާ ހުރިހާ ޓީމުތަކުން ވެސް ކޮންމެ ޓީމަކާ ދެކޮޅަށް އެއް މެޗު ކުޅޭ ގޮތަށް ހަމަޖެހިފައިވާއިރު، އެންމެ ގިނަ ޕޮއިންޓް ހޯދާ ޓީމަކަށް ޗެމްޕިއަންކަން ލިބޭނެ އެވެ. މި މުބާރާތުގެ މެޗުތައް ކުޅުމަށް ހަމަޖެހިފައިވަނީ 14 ޖެނުއަރީއިން ފެށިގެން 26 ޖެނުއަރީ އަށް ބެންކޮކްގެ ނޮންތްބުރި ސްޓޭޑިއަމްގަ އެވެ.

ރާއްޖޭގެ ގައުމީ ފުޓްސަލް ޓީމުން އެންމެ ފަހުން ބައިނަލްއަގްވާމީ މުބާރާތެއްގައި ވާދަކުރީ ސެޕްޓެމްބަރު 2025 ގައި މިޔަންމާގައި އޮތް އޭއެފްސީ އޭޝިއަން ކަޕް ކޮލިފައިންގަ އެވެ. އެ މުބާރާތުގައި ރާއްޖެއަށް މާ އެދެވޭ ކުޅުމެއް ދެއްކިފައެއް ނުވާތީ، އަންނަ މުބާރާތުގައި ރާއްޖޭގެ ޓީމުން މޮޅު ކުޅުމެއް ދައްކައި ރަނގަޅު ނަތީޖާ އެއް ހޯދުމަށް މަސައްކަތްތަކެއް ކުރަމުންދެ އެވެ.

މި މުބާރާތުގެ އަންހެން ޑިވިޝަނުގައި ރާއްޖޭގެ އަންހެން ފުޓްސަލް ޓީމު ވެސް ބައިވެރި ވާނެ އެވެ. މިއާ އެކު 2026 ވަނަ އަހަރުގެ ސާފް ފުޓްސަލް ޗެމްޕިއަންޝިޕް ވެގެންދާނީ ރާއްޖޭގެ ގައުމީ އަންހެން ފުޓްސަލް ޓީމެއް ބައިނަލްއަގުވާމީ މުބާރާތެއްގައި ކުޅޭ ފުރަތަމަ ފަހަރު ކަމުގަ އެވެ.

ސާފް ފުޓްސަލް ޗެމްޕިއަންޝިޕް ގެ އަންހެން ޑިވިޝަނުގައި ރާއްޖޭން ފުރަތަމަ މެޗުގައި، ޖެނުއަރީ 13 ވަނަ ދުވަހު އިންޑިއާ އާ ދެކޮޅަށް ކުޅޭނެ އެވެ. ދެ ވަނަ މެޗުގައި، ޖެނުއަރީ 15 ވަނަ ދުވަހު ނޭޕާލް އާއި ކުޅުމަށް ފަހު، ތިން ވަނަ މެޗުގައި، ޖެނުއަރީ 17 ވަނަ ދުވަހު ޕާކިސްތާން އާއި ދެކޮޅަށް ކުޅުމަށް ފަހު، ހަތަރު ވަނަ މެޗުގައި ޖެނުއަރީ 21 ވަނަ ދުވަހު ބޫޓާން އާއި ބައްދަލުކުރާނެ އެވެ. ފަސް ވަނަ މެޗުގައި، ޖެނުއަރީ 23 ވަނަ ދުވަހު ސްރީލަންކާ އާއި ދެކޮޅަށް ކުޅުމަށް ފަހު، ފަހު މެޗުގައި ޖެނުއަރީ 25 ވަަނަ ދުވަހު ނުކުންނާނީ ބަންގްލަދޭޝް އާއި ދެކޮޅަށެވެ.

ފީފާ ގެ ފުޓްސަލް ރޭންކިން ގައި ރާއްޖޭގެ އަންހެން ޓީމު އަދި ރޭންކް ކޮށްފައި ނުވާއިރު، ރާއްޖޭގެ ފިރިހެން ފުޓްސަލް ޓީމު އޮތީ ފީފާ ރޭންކިންގ ގެ 106 ވަނައިގަ އެވެ.