ނިއު ސައުތު ވޭލްސް ގެ "ހޯލް އޮފް ޗެމްޕިއަންސް" ގައި ހިމެނުނު ފުރަތަމަ ދިވެއްސަކަށް ނާޒްމީ

އޮސްޓްރޭލިއާ ގެ ނިއު ސައުތް ވޭލްސް ހޯލް އޮފް ޗެމްޕިއަންސް ގައި ހިމެނުނު ފުރަތަމަ ދިވެއްސަކަށް އައިޝާ ނާޒްމީ ޖޯންސްޓަން ވެއްޖެ އެވެ.

ނިއު ސައުތް ވޭލްސް ހޯލް އޮފް ޗެމްޕިއަންސް ގައި ހިމަނަނީ ކުޅިވަރުގެ ދާއިރާ އިން ގައުމީ އަދި ބައިނަލްއަގުވާމީ ފެންވަރުގައި ފާހަގަކޮށްލެވޭ ކާމިޔާބީތައް ހާސިލު ކޮށްފައިވާ، އޮސްޓްރޭލިއާގެ ނިއު ސައުތް ވޭލްސް އަށް ނިސްބަތްވާ ފަރާތްތަކެވެ. ދިވެހި މަންމަ އަކަށް އުފަން ނާޒްމީ ގެ ބައްޕަ އަކީ އޮސްޓްރޭލިއާ ގެ ރައްޔިތެކެވެ. ނާޒްމީ ވަނީ ގައުމީ ބައިނަލްއަގުވާމީ ގިނަ ޖިމްނާސްޓިކް މުބާރާތްތަކެއްގައި އޮސްޓްރޭލިއާ ތަމްސީލުކޮށް ގިނަ ކާމިޔާބީ ތަކެއް ހޯދާފަ އެވެ.

ނާޒްމީ ވަނީ 2006 ވަނަ އަހަރު އޭނާ ގެ އުމުރުން އެންމެ 17 އަހަރުގައި މެލްބަން ގައި ބޭއްވުނު ކޮމަންވެލްތު ގޭމްސްގައި ބައިވެރިވެ، ޓީމް އިވެންޓް ގައި ގްރޫޕް އޯލް-އެރައުންޑް ބްރޯންޒް މެޑަލް ހޯދައި އިންޑިވިޖުއަލް އޯލް-ރައުންޑް ގައި ހަތަރުވަނަ ހޯދާފަ އެވެ.

އޮސްޓްރޭލިއަން ޗެމްޕިއަންޝިޕް ގައި ނާޒްމީ ވަނީ 2007 ން 2010 އާ ދެމެދު ޖުމްލަ 16 ރަން މެޑަލް އަދި 5 ރިހި މެޑަލް ހޯދާފަ އެވެ. 2007 ވަނަ އަހަރުގެ ވޯލްޑް ޗެމްޕިއަންޝިޕް ނާޒްމީ ނިންމާލީ އޯޝިއާނިއާގެ އެންމެ މަތީ ރޭންކްގައި ހުރި ޖިމްނާސްޓް ގެ ގޮތުގަ އެވެ. މި ކާމިޔާބީ އާ އެކު އޭނާއަށް 2008 ބެއިޖިންގ އޮލިމްޕިކްސް ގަ ބައިވެރި ވުމުގެ ފުރުސަތު ލިބުނެވެ. ނާޒްމީ ވަނީ 2008 ބެއިޖިންގ އޮލިމްޕިކްސް ގައި ރިދްމިކް ޖިމްނާސްޓިކްސް އިން އޮސްޓްރޭލިއާ ގެ ހަމައެކަނި އެތްލީޓުގެ ގޮތުގައި ބައިވެރިވެ، 22 ވަނަ ހޯދާފަ އެވެ.

ނާޒްމީ ވަނީ 2010 ވަނަ އަހަރު ދިއްލީ ގައި ބޭއްވުނު ކޮމަންވެލްތު ގޭމްސް ގައި އިންޑިވިޖުއަލް އޯލް-އެރައުންޑް ގައި ދިހަ އަހަރަށްފަހު ރަން މެޑަލް ހޯދި ފުރަތަމަ އޮސްޓްރޭލިއާ ގެ ރިދްމިކް ޖިމްނާސްޓަކަށް ވެފަ އެވެ. އަދި އޭނާ ގެ ޓީމު ވަނީ 2 ކެޓަގަރީ އަކުން ރަން މެޑަލް ހޯދާ އިތުރު އެއް ކެޓަގަރީ އިން ރިހި މެޑަލް ވެސް ހޯދާފަ އެވެ.

2011 ވަނަ އަހަރުން 2015 ވަނަ އަހަރުގެ ނިޔަލަށް ނާޒްމީ ވަނީ ނިއު ސައުތް ވޭލްސް ޖިމްނާސްޓިކްސް ގެ އިވެންޓް އެންޑް ޑިވެލޮޕްމެންޓް އޮފިސަރ ގެ މަގާމު ފުރާފަ އެވެ. ނާޒްމީ މިހާރު މަސައްކަތް ކުރަމުން ދަނީ ޕެޑްލް އޮސްޓްރޭލިއާ ގައި ޑިވޮލޮޕްމެންޓް އޮފިސަރެއްގެ ގޮތުގަ އެވެ.