އިންޖީނަށް މައްސަލަ ޖެހި އެއާ އިންޑިއާ އެއަރބަސް ޖެޓެއް ގްރައުންޑް ކޮށްފި
15 ޖެނުއަރީ 2026 | ބުރާސްފަތި 10:51އެއާ އިންޑިއާގެ އޭ350 ބޯޓުގެ އިންޖީނަށް ލިބުނު ގެއްލުމަކާ ގުޅިގެން އެ ބޯޓުގެ ދަތުރުތައް ވަގުތީ ގޮތުން މެދުކަނޑާލާފައިވާއިރު، މި ކަމުގެ ސަބަބުން ދުރު ރާސްތާގެ ދަތުރުތަކަށް ބުރޫއަރާނެ ކަމަށް ބެލޭ.
އެއަރ އިންޑިއާ ބޮއިންގް 777-300އީއާރު ބޯޓެއް ޗިކާގޯގެ އިލިނޮއީ ވައިގެ ބަނދަރުގައި | ރޮއިޓަސް
އެއާ އިންޑިއާގެ އެއާބަސް އޭ350 މަރުކާގެ ބޯޓެއްގެ އިންޖީނަށް ލިބުނު ގެއްލުމަކާ ގުޅިގެން، އެ ބޯޓުގެ ދަތުރުތައް ވަގުތީ ގޮތުން މެދުކަނޑާލައިފި ކަމަށް އެ އެއާލައިނުން ބުނެފި އެވެ.
މިކަމުގެ ސަބަބުން އެ އެއާލައިނުން ކުރަމުންދާ ދުރު ރާސްތާގެ ދަތުރުތަކަށް ބުރޫއަރާފާނެ ކަމަށް ބެލެވެއެވެ.
ޖުމްލަ ހަ އޭ350 ބޯޓު އޮޕަރޭޓްކުރާ އެއާ އިންޑިއާ އިން، މި ބޯޓުތައް އާންމުކޮށް ބޭނުންކުރަނީ ލަންޑަނާއި ނިއުޔޯކް ފަދަ ދުރު މަންޒިލްތަކަށް ކުރާ ދަތުރުތަކުގަ އެވެ. އެ އާލައިނުން ހާމަކުރި ގޮތުގައި، މި ބޯޓުގެ އިންޖީނަށް ގެއްލުންވީ ނިއުދިއްލީގެ ވައިގެ ބަނދަރުގައި ބޯ ދުންފިނީގެ ތެރޭގައި ބޯޓު ދުއްވަނިކޮށް، އެއްޗެއް އިންޖީނުތެރެ އަށް ވަނުމުގެ ސަބަބުންނެވެ.
ދިއްލީން ފުރައިގެން ނިއުޔޯކަށް ދަތުރުކުރި މި ބޯޓަށް، އީރާނުގެ ވައިގެ ސަރަހައްދު ވަގުތީ ގޮތުން ބަންދުކުރުމާ ގުޅިގެން، ދަތުރުގެ މިސްރާބު ބަދަލުކޮށް އަނބުރާ ފުރި މަންޒިލަށް އަންނަން މަޖުބޫރުވި އެވެ.
އެމެރިކާ އާއި އީރާނާ ދެމެދު އަސްކަރީ ކުރިމަތިލުމެއް ހިނގާފާނެ ކަމުގެ ބިރު އޮތުމުން، ގާތްގަނޑަކަށް ފަސް ގަޑިއިރަށް އީރާނުގެ ވައިގެ ސަރަހައްދު ބަންދުކުރުމަށްފަހު މިހާރު ވަނީ އަލުން ހުޅުވާލާފަ އެވެ. މި ހާލަތާ ގުޅިގެން ގިނަ އެއާލައިންތަކެއްގެ ދަތުރުތައް ކެންސަލްކުރުމާއި، މަގު ބަދަލުކުރުމާއި، އަދި ދަތުރުތައް ލަސްވުން ފަދަ ގިނަ ދަތިތަކަކާ ވަނީ ކުރިމަތިވެފައެވެ.
މަސްދަރު: ރޮއިޓާސް
