އިންޑިއާގެ ސަރުކާރުން ހިންގަމުން އައި އެއާރ އިންޑިއާ އާއި ޓާޓާ ކުންފުނިން ހަވާލުވެއްޖެއެވެ.

ގެއްލުމުގައި އެތައް އަހަރުތަކެއް ވަންދެން ހިންގަމުން އައި އެއަރ އިންޑިއާ ގަތުމަށް އެންމެ ބޮޑު ބިޑެއް ހުށަހަޅައިގެން ޓާޓާއިން އެއަރ އިންޑިއާ އެއަރލައިން ގަނެފައިވަނީ މިދިޔަ އަހަރުގެ އޮކްޓޯބަރ މަހުއެވެ. ޓާޓާ ކުންފުނިން އެއަރ އިންޑިއާ އާއި ހަވާލުވެފައިވަނީ ބުރާސްފަތި ދުވަހުއެވެ.

އެއާ އިންޑިއާގެ ހޮލްޑިން ކުންފުނި "ޓެލެސް"ގެ ބިޑެއް ކާމިޔާބުކޮށް، އެ އެއާލައިންގެ 100 އިންސައްތަ ހިއްސާ ޓާޓާ ގްރޫޕުން ވަނީ ގަނެފައެވެ. އަދި ގްރައުންޑް ސާރވިސްގެ 50 އިންސައްތަ ހިއްސާވެސް ޓާޓާއިން ވަނީ ގަނެފައެވެ. ޓާޓާއިން މިބިޑް ކާމިޔާބުކުރީ 2.4 ބިލިއަން ޑޮލަރު ހުށަހަޅައިގެންނެވެ.

ޓާޓާ ކުންފުނިން އެއަރ އިންޑިޔާ އާއި ހަވާލުވިކަން ހާމަކޮށް އިންޑިޔާގެ ފިނޭންސް މިނިސްޓްރީން ނެރެފައިވާ ބަޔާނެއްގައި ބުނެފައިވަނީ އިކިޔުޓީގެ ގޮތުގައި ސަރުކާރަށް 360 މިލިއަން ޑޮލަރު ޓާޓާ ކުންފުނީގެ ފަރާތުން ލިބިފައިވާކަމަށެވެ.

އިންޑިއާ ސަރުކާރުން އެއަރ އިންޑިއާ ވިއްކާލީ އެ އެއާލައިން މުޅިން ބަނގުރޫޓްވެ، މާލީގޮތުން އިނދަޖެހިފައި ވަނިކޮށެވެ. އެ ކުންފުނި ވިއްކާލަން އިންޑިއާ ސަރުކާރުން އުޅޭތާ އަހަރުތަކެއް ވެއްޖެއެވެ. އެގޮތުން ފާއިތުވި ހަތަރު އަހަރު އިންޑިއާ ސަރުކަރުން ވަނީ އެއަރ އިންޑިއާ ގަންނާނެ ބަޔަކު ހޯދުމަށް މަސައްކަތްކޮށްފައެވެ. އެކަމަށް އެންމެ ފަހުން މަސައްކަތްފެށީ 2020 ވަނަ އަހަރުގެ ޖެނުއަރީ މަހުއެވެ.

ފާއިތުވި 10 އަހަރު އިންޑިއާ ސަރުކާރުން ވަނީ އެއަރ އިންޑިއާއަށް 15 ބިލިއަން ޑޮލަރު ހޭދަކޮށްފައެވެ.

އެއާރ އިންޑިއާގެ އެސެޓްތަކުގެ ތެރޭގައި ލަންޑަނުގެ ހީތުރޯ އެއާޕޯޓުގެ ސްލޮޓްތަކާއި 130 މަތިންދާބޯޓުގެ ފްލީޓެއް ހިމެނެއެވެ. އޭގެ އިތުރުން ތަމްރީނުކޮށްފައިވާ އެތައް ހާސް ޕައިލެޓުންނާއި ކްރޫން ހިމެނެއެވެ.

އެއާރ އިންޑިއާ 2007 ވަނަ އަހަރު މާރޖްކުރި ފަހުން ޤައުމީ އެއަރލައިނަށް ދިޔައީ ގެއްލުން ވަމުންނެވެ. އެއާރލައިން ހިންގުމަށް ސަރުކާރުން ދިޔައީ ބޮޑު ހޭދައެއްވެސް ކުރަމުންނެވެ. ސަރުކާރުން ބުނީ އެއާލައިން ހިންގަމުން ދިޔައީ ދުވާލަކު 2.6 މިލިއަން ޑޮލަރުގެ ގެއްލުމަކާ އެކު ކަމަށެވެ.

ގެއްލުމުގެ ސަބަބެއް ކަމަށް އެއާލައިނުން ބުނަމުން ދިޔައީ އޭވިއޭޝަން ފިއުލްގެ އަގުބޮޑުވުމާއި އެއާޕޯޓް ޗާޖްތައް ބޮޑުވުމާއި ބަޖެޓް އެއާލައިންތަކުގެ ވާދަވެރިކަން ބޮޑުވުމާއި އަދި ރުޕީސްގެ އަގު ވެއްޓުމުގެ ސަބަބުން ކަމަށެވެ.

އެއާ އިންޑިއާ ކުންފުނީގައި ކުދި ބޯޓުތަކާއި ބޮޑު އަދި މެދު ސައިޒްގެ ބޯޓުތައް ހިމެނޭގޮތަށް 130 މަތިންދާބޯޓު އޮވެއެވެ. ނަމަވެސް މީގެތެރެއިން ގިނަ ބޯޓުތަކަކީ ބައު ބޯޓުތަކެވެ.

ޓާޓާއަކީ އެންމެ ފުރަތަމަ އެއަރ އިންޑިއާ އުފެއްދި ކުންފުންޏެވެ. އެއީ 1932 ވަނަ އަހަރުއެވެ. އެއަރ އިންޑިޔާއަކީ އިންޑިއާގެ ޤައުމީ އެއަރލައިން ކަމުގައި ހަމަޖެހިގެން ދިޔައީ 1953 ވަނަ އަހަރުއެވެ.

އެއަރ އިންޑިއާގެ ޖުމްލަ ދަރަނި 8.2 ބިލިއަން އެމެރިކާ ޑޮލަރަށް އަރައެވެ. އޭގެތެރެއިން ޓާޓާއިން ވަނީ 2 ބިލިއަން ޑޮލަރާ ހަވާލުވެފައެވެ.

ޓާޓާއިން މިހާރުވެސް ދެ އެއަރ ލައިނެއް ހިންގައެވެ. އެއީ ވިސްތާރާ އާއި އެއަރ އޭޝިޔާ އިންޑިއާއެވެ. އެއަރ އިންޑިއާ ހިންގަން ފެށުމާއެކު ޓާޓާއަށް އިންޑިއާގެ ޑޮމެސްޓިކް އޭވިއޭޝަންގެ 27 އިންސައްތަ ޝެއަރ ލިބިގެންދާނެއެވެ.