އީރާނާ އެކު ވިޔަފާރީގެ މުއާމަލާތްތައް ހިންގާ ކޮންމެ ގައުމަކުން އެމެރިކާ އަށް އެތެރެކުރާ މުދަލުން 25 އިންސައްތައިގެ ޓެކްސް އެއް ނެގުމަށް ޓްރަމްޕް ނިންމަވައިފި

އީރާނާއެކު ވިޔަފާރީގެ މުއާމަލާތްތައް ހިންގާ ކޮންމެ ގައުމަކުން އެމެރިކާއަށް އެތެރެކުރާ މުދަލުން 25 އިންސައްތައިގެ ޓެކްސް އެއް (ޓެރިފް) ނެގުމަށް އެމެރިކާގެ ރައީސް ޑޮނަލްޑް ޓްރަމްޕް ނިންމަވައިފި އެވެ.

އީރާނު ގައި ކުރިއަށްދާ މުޒާހަރާތައް ހުއްޓުވުމަށް އެގައުމުގެ ސަރުކާރުން ހިންގާ ހަރަކާތްތަކުގައި މިހާތަނަށް މަދުވެގެން 648 މީހުން މަރުވެފައިވާ ކަމަށް އިންސާނީ ހައްގުތަކަށް މަސައްކަތްކުރާ ޖަމާއަތަކުން އަންދާޒާކޮށްފައިވާ ދަނޑިވަޅެއްގައި، ޓްރަމްޕްގެ މި ނިންމެވުމާއެކު އީރާނަށް ކުރިމަތިކުރާ ފިއްތުންތައް ވަނީ އިތުރަށް ވަރުގަދަވެފަ އެވެ.

އީރާނާ ދެކޮޅަށް އަސްކަރީ ފިޔަވަޅު އަޅާނެ ކަމުގެ އިންޒާރު ތަކުރާރުކޮށް ދެއްވަމުން ގެންދަވާ ޓްރަމްޕް ހޯމަ ދުވަހު މީސްމީޑިއާ ގައި ކުރެއްވި ޕޯސްޓެއްގައި ވިދާޅުވީ، އީރާނާ އެކު ވިޔަފާރިކުރާ އަދި ހަމައެއާއެކު އެމެރިކާއާ އެކު ވެސް ވިޔަފާރީގެ ގުޅުން ބާއްވާ ގައުމުތަކަށް މި އާ ޓެކްސް "ވަގުތުން" ތަންފީޒު ކުރަން ފަށާނެ ކަމަށެވެ.

މި ފިޔަވަޅުގެ އަސަރު ސީދާ ކުރާނީ ކޮން ގައުމުތަކަކަށް ކަމެއް ތަފްސީލުކޮށް ވިދާޅުނުވި ނަމަވެސް، ޓްރަމްޕް ވިދާޅުވީ "މި އަމުރަކީ ބަދަލުނުކުރެވޭނެ ނިހާއީ ނިންމުމެއް" ކަމަށެވެ.