"ލަދުކުޑަ" އެމެރިކާ އިން ގެންދަނީ އދ. ގެ އަގު ވައްޓާލަމުން: އުތުރު ކޮރެއާ
އެމެރިކާ އިން ހިންގަނީ ލަދުކުޑަ، ޣައިރު ގާނޫނީ އަދި އަހުލާގީ ގޮތުން ދަށް އަމަލުތަކެއް ކަމަށާއި، އަމިއްލަ އެދުމަށްޓަކައި އދ. އަކީ ހަޖުލަކަށް ހަދަން އެމެރިކާ އިން މަސައްކަތް ކުރާ ކަމަށް ބުނެފައިވޭ.
އުތުރު ކޮރެއާގެ ގައުމީ ދިދަ | ގެޓީ އިމޭޖަސް
"ލަދުކުޑަ" އެމެރިކާ އިން އދ. ގެ އަގުވައްޓާލުމަށް މަސައްކަތްތަކެއް ކުރަމުންދާކަމަށް ބުނެ، އުތުރު ކޮރެއާ އިން އެމެރިކާ ވަރަށް ބޮޑަށް ކުށްވެރިކޮށްފި އެވެ.
އދ. ގެ ނިޒާމަށް ހުރަސްއެޅޭ ގޮތަށް އެމެރިކާ އިން ކުރަމުންދާ އަމަލުތައް ކުށްވެރިކޮށް، އެމެރިކާ އިން ހިންގަނީ "ބިރުވެރި ޖަރީމާ އެއް" ކަމަށް އުތުރު ކޮރެއާ އިން ވަނީ ތުހުމަތުކޮށްފަ އެވެ. ނިއުޔޯކު ގައި ހުންނަ އުތުރު ކޮރެއާގެ މިޝަނުން ނެރުނު ބަޔާނެއްގައި، އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކާ ހިލާފުވި ކަމަށް ބުނެ ބްރީފިން އެއް ބޭއްވުމަށް ރާވާފައިވާތީ އެކަމަށް ވެސް ވަނީ ވަރަށް ބޮޑަށް ފާޑުކިޔާފަ އެވެ. މި ބަޔާން އާންމުކޮށްފައި ވަނީ އުތުރު ކޮރެއާގެ ދައުލަތުގެ މީޑިއާ ކަމަށްވާ ކޮރެއަން ސެންޓްރަލް ނިއުސް އެޖެންސީ (ކޭސީއެންއޭ) މެދުވެރިކޮށެވެ.
އުތުރު ކޮރެއާ އިން ބުނި ގޮތުގައި، އދ. ގައި މިހާރު ސުވާލުކޮށް ފާޅުގައި މަޝްވަރާ ކުރަންޖެހޭ އެންމެ މުހިންމު މައްސަލަ އަކީ އެމެރިކާ އިން ހިންގަމުންދާ ނުރައްކާތެރި ޖަރީމާތަކެވެ. އަދި އެމެރިކާ އަކީ އދ. އުފެދިފައި އޮތުމަށް ވެސް އިހުތިރާމު ކުރާ ބައެއް ނޫން ކަމަށް އެ ގައުމުން ބުނެފައިވެ އެވެ.
އުތުރު ކޮރެއާގެ މިޝަނުން އެމެރިކާ އަށް ފާޑުކިޔާފައި ވަނީ ކޮން އަމަލަކަށް ކަން ސީދާ ބަޔާންކޮށްފައި ނުވި ނަމަވެސް، މި ބަޔާން ނެރެފައި ވަނީ ވެނެޒުއޭލާގެ ރައީސް ނިކޮލަސް މަދޫރޯ އެމެރިކާ އިން ހައްޔަރުކުރިތާ ހަފުތާއެއްހާ ދުވަސް ފަހުންނެވެ. މަދޫރޯ ހައްޔަރުކުރުމުގެ ހަރަކާތަކީ އުތުރު ކޮރެއާގެ ލީޑަރޝިޕަށް އޮތް ބިރުވެރި އިންޒާރެއް ކަމަށް ބައެއް ފަރާތްތަކުން ދެކެ އެވެ. ސަބަބަކީ، ވެރިކަން ވައްޓާލުމަށް އެމެރިކާ އިން ދީފާނެ މިފަދަ ކުއްލި ހަމަލާއަކަށް އުތުރު ކޮރެއާ އިން އަބަދުވެސް ކަންބޮޑުވާތީ ކަމަށްވެ އެވެ.
"ޖިއޮޕޮލިޓިކަލް މަސްލަހަތު ހާސިލުކުރުމަށްޓަކައި އދ. ބޭނުން ނަހަމަ ގޮތުގައި ކުރުމަށް އެމެރިކާ އިން ކުރާ މަސައްކަތްތަކަށް އެއްވެސް ފުރުސަތެއް ދީގެން ނުވާނެ،" އުތުރު ކޮރެއާގެ މިޝަނުން ބުނެފައިވެ އެވެ. މީގެ އިތުރުން، އެމެރިކާ އިން ހިންގަނީ ލަދުކުޑަ، ޣައިރު ގާނޫނީ އަދި އަހުލާގީ ގޮތުން ދަށް އަމަލުތަކެއް ކަމަށާއި، އަމިއްލަ އެދުމަށްޓަކައި އދ. އަކީ ހަޖުލަކަށް ހަދަން އެމެރިކާ އިން މަސައްކަތް ކުރާ ކަމަށް ވެސް އެ ގައުމުން ވަނީ ތުހުމަތުކޮށްފަ އެވެ.
މިދިޔަ ހަފުތާގައި ރައީސް ޑޮނަލްޑް ޓްރަމްޕް ވަނީ، އެމެރިކާގެ މަސްލަހަތާ ފުށުއަރާ ކަމަށް ބުނެ އދ. ގެ ބައެއް ޖަމިއްޔާތަކުން އެމެރިކާ ވަކިވާނެކަން އިއުލާނު ކުރައްވާފަ އެވެ.
އުތުރު ކޮރެއާގެ ނިއުކްލިއާ އަދި މިސައިލް ޕްރޮގްރާމާ ގުޅިގެން އދ. ގެ ސަލާމަތީ މަޖިލީހުން ވަނީ އެ ގައުމާ ދެކޮޅަށް ހަރުކަށި ފިޔަވަޅުތަކެއް އަޅާފައެވެ.
މަސްދަރު: އޭއެފްޕީ
