ބުރާސްފަތި ދުވަހު ޓްރަމްޕް އާއި މަޗާޑޯ ބައްދަލު ކުރައްވަނީ

އެމެރިކާާގެ ރައީސް ޑޮނަލްޑް ޓްރަމްޕް އާއި، ވެނެޒުއެލާގެ އިދިކޮޅު ލީޑަރު މާރިއާ ކޮރީނާ މަޗާޑޯ މި ހަފުތާގެ ބުރާސްފަތި ދުވަހު ބައްދަލު ކުރައްވާ ގޮތަށް ހަމަޖެހިއްޖެ އެވެ. 

އެކަން ހާމަ ކޮށްފައި ވަނީ އެމެރިކާގެ ރިޔާސީ ގަނޑުވަރު، ވައިޓް ހައުސް އިންނެވެ. ޓްރަމްޕް އާއި މަޗާޑޯ ބައްދަލު ކުރައްވާ މި ވަގުތަކީ، އެމެރިކާ އާއި ވެނެޒުއެލާއާ ދެމެދު ގިނަ ކަންތައް ތަކެއް ހިނގަމުން އަންނަ ވަގުތެކެވެ. އެގޮތުން އެމެރިކާ އިން ވަނީ ވެނެޒުއެލާގެ ރައީސް ނިކޮލަސް މަދޫރޯ އާއި އޭނާގެ އަނބިކަނބަނުން ހައްޔަރު ކޮށްފަ އެވެ. 

މަދޫރޯ ހައްޔަރު ކުރުމާ އެކު، އޭނާގެ ނައިބު ރައީސް ޑެލްސީ ރޮޑްރިގޭޒް ވަނީ ވެނެޒުއެލާގެ ވަގުތީ ރައީސް ކަމުގެ ހުވާ ކުރައްވައިފަ އެވެ. އެއަށް ފަހު ވެނެޒުއެލާގެ ވަގުތީ ސަރުކާރުން އެމެރިކާ އާއެކު މަސައްކަތް ކުރަމުން އަންނައިރު، މަޗާޑޯ އާއި އޭނާގެ ބައިވެރިން ވަނީ އެކަމުގެ ކަންބޮޑުވުން ފާޅު ކޮށްފަ އެވެ. 

ވައިޓް ހައުސްގެ އޮފިޝަލަކު އޭއެފްޕީ އަށް މައުލޫމާތު ދެއްވަމުންް ވިދާޅުވެފައި ވަނީ، ބުރާސްފަތި ދުވަހު ޓްރަމްޕް މަޗާޑޯއާ ބައްދަލު ކުރައްވާނެ ކަމަށެވެ. އަދި އެ ބައްދަލުވުން އޮންނާނެ ކަމަށް ބެލެވެނީ ވައިޓް ހައުސްގައި ކަމަށް ބުނެފައި ވީ ނަަމަވެސް، ބައްދަލުވުން އޮންނާނެ ސީދާ ތަނެއް ކަށަވަރުވެފައި ނުވެ އެވެ. 

ޓްރަމްޕް އާއި މަޗާޑޯ ބައްދަލު ކުރައްވާއިރު، މަދޫރޯ ހައްޔަރު ކުރި ފަހުން މަޗާޑޯ ވިދާޅުވެފައި ވަނީ ވެނެޒުއެލާގެ ވެރިކަމާ ހަވާލުވާން ޖެހޭ ފަރާތަކީ އޭނާ ކަމަށެވެ. އަދި އޭނާ އާއި އޭނާގެ ބައިވެރިން ތިބީ އެކަމަށް ތައްޔާރަށް ކަމަށް ހާމަ ކުރައްވާފައިވެ އެވެ. ނަމަވެސް، ޓްރަމްޕް ވިދާޅުވެފައި ވަނީ މަޗާޑޯ އަކީ ވެނެޒުއެލާގެ ވެރިކަން ކުރެވޭނެ ބޭފުޅެއް ނޫން ކަމަށާއި، އޭނާ އަކީ ވެނެޒުއެލާގެ ރައްޔިތުންގެ ތާއީދު އޮތް ލީޑަރެއް ނޫން ކަމަށެވެ. 

ޓްރަމްޕްގެ އަމުރުފުޅަށް އެމެރިކާގެ އަސްކަރިއްޔާ އިން މަދޫރޯ ހައްޔަރު ކޮށްފައިވާއިރު، މަޗާޑޯ ވަނީ އެކަމަށް ޝުކުރު އަދާ ކުރައްވައިފަ އެވެ. އެކަމުގައި އެމެރިކާ އާއި ޓްރަމްޕްގެ ފަރާތުން ފެނިފައިވާ ހިތްވަރާއި، ސާބިތު ކަމަށް ޝުކުރު އަދާ ކުރަން ބޭނުންވާ ކަމަށް މަޗާޑޯ ވަނީ ވިދާޅުވެފަ އެވެ.

މިދިޔަ އަހަރުގެ ނޯބެލް ސުލްޙައިގެ އިނާާމު ވެސް މަޗާޑޯ ހާސިލު ކުރައްވާފައިވާއިރު، އެ އެވޯޑު ވެސް އޭނާ ހޯއްދެވީ ޓްރަމްޕްއާ ވާދަކުރައްވަ އެވެ.