ގައުމުގެ ހާލަތު އޮތީ "ފުރިހަމަ ކޮންޓްރޯލްގެ ދަށުގައި" ކަމަށް އީރާނުގެ ޚާރިޖީ ވަޒީރު ވިދާޅުވެއްޖެ
12 ޖެނުއަރީ 2026 | ހޯމަ 09:19ތެހެރާންގައި ބޭއްވި ބޭރު ގައުމުތަކުގެ ސަފީރުންގެ ބައްދަލުވުމެއްގައި ވާހަކަ ދައްކަވަމުން އަރަގްޗީ ވިދާޅުވީ، އިސްލާމީ ޖުމްހޫރިއްޔާ އީރާނަކީ ހަނގުރާމައަކަށް އެދޭ ގައުމެއް ނޫން ކަމަށާއި އެކަމަކު ހަނގުރާމައަކަށް އޮތީ ފުރިހަމަ އަށް ތައްޔާރުވެގެން ކަމަށް.
އީރާނުގެ ފޮރިން މިނިސްޓަރު އައްބާސް އަރަގްޗީ | އޭޕީ ފޮޓޯ
މުޒާހަރާތަކާ ގުޅިގެން ހިނގި ހަމަނުޖެހުންތަކަށްފަހު، މިހާރު އެ ގައުމުގެ ހާލަތު އޮތީ "ފުރިހަމަ ކޮންޓްރޯލްގެ ދަށުގައި" ކަމަށް އީރާނުގެ ޚާރިޖީ ވަޒީރު އައްބާސް އަރަގްޗީ ހޯމަ ދުވަހު ވިދާޅުވެއްޖެ އެވެ.
އަރަގްޗީ އިތުރަށް ވިދާޅުވީ، މުޒާހަރާތަކުގައި ސަރުކާރުން ހަމަލާ ދީފި ނަމަ އީރާނާ ދެކޮޅަށް ފިޔަވަޅު އަޅާނެ ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕް ދެއްވި އިންޒާރަކީ، "ޓެރަރިސްޓުން" މުޒާހަރާގެ ބައިވެރިންނާއި ސަލާމަތީ ބާރުތަކަށް ހަމަލާދިނުމަށް ލިބުނު ހިތްވަރެއް ކަމަށެވެ. އޭނާ ތުހުމަތު ކުރެއްވި ގޮތުގައި މީގެ ބޭނުމަކީ ބޭރުގެ ބާރުތަކުން އީރާނުގެ ދާޚިލީ ކަންކަމުގެ ތެރެއަށް ވަނުމަށް މަގުފަހިކުރުމެވެ.
މީގެ އިތުރުން، އީރާނުން އޮތީ ކުރިމަތިލުމަކަށް ފުރިހަމަ އަށް ތައްޔާރުވެފައި ކަމަށާއި، ނަމަވެސް މަޝްވަރާ ކުރުމަށް ވެސް ތައްޔާރު ކަމަށް އޭނާ ވިދާޅުވި އެވެ.
ތެހެރާންގައި ބޭއްވި ބޭރު ގައުމުތަކުގެ ސަފީރުންގެ ބައްދަލުވުމެއްގައި ވާހަކަ ދައްކަވަމުން އަރަގްޗީ ވިދާޅުވީ، "އިސްލާމީ ޖުމްހޫރިއްޔާ އީރާނަކީ ހަނގުރާމައަކަށް އެދޭ ގައުމެއް ނޫން، އެކަމަކު ހަނގުރާމައަކަށް އޮތީ ފުރިހަމަ އަށް ތައްޔާރުވެގެން،" ކަމަށެވެ. އަދި މަޝްވަރާ ކުރުމަށްވެސް ތައްޔާރު ކަމަށާއި، ނަމަވެސް އެ މަޝްވަރާތަކަކީ ހަމަހަމަ ހައްގުތަކެއްގެ މައްޗަށް ބިނާވެފައިވާ، އެކަކު އަނެކަކަށް އިހުތިރާމް ކުރާ، އިންސާފުވެރި މަޝްވަރާތަކަކަށް ވާންޖެހޭނެ ކަމަށް އޭނާ ވިދާޅުވިއެވެ.
އީރާނުގެ ފާރސް ނިއުސް އެޖެންސީން ރިޕޯޓްކޮށްފައިވާ ގޮތުގައި، އާދީއްތަ ދުވަހުގެ ރޭ ވެރިރަށް ތެހެރާންގެ ނައްވާބް އަދި ސާދަތު އާބާދު ސަރަހައްދުގައި "މަދު ބަޔަކު" ބައިވެރިވި މުޒާހަރާތަކެއް ވަނީ ހިނގާފަ އެވެ.
ހަމައެހެންމެ، ގައުމުގެ ހުޅަނގު ދެކުނުގެ ޗަހަރްމަހަލް އަދި ބަޚްތިއާރީ ޕްރޮވިންސްގެ ހަފްޝޭޖަން އަދި ޖުންގާން ސިޓީގައި މީހުން އެއްވެފައިވާއިރު، އިރުއުތުރުގެ ރަޒަވީ ޚޮރާސާން ޕްރޮވިންސްގެ ތައިބާދު ސަރަހައްދުގައި ވެސް މުޒާހަރާ ކޮށްފައިވެ އެވެ.
ފާރސް ނިއުސް އެޖެންސީން ބުނި ގޮތުގައި ސަލާމަތީ ބާރުތަކުން ވަނީ އެ މުޒާހަރާތަކުގެ ތެރެއަށް ވަދެ، މީހުންތައް ރޫޅާލާފަ އެވެ. އަދި ހޯމަ ވިލޭރޭ ގައުމުގެ އެހެން ސިޓީތަކާއި ޕްރޮވިންސްތަކުގެ މަސްލަހަތު އޮތީ އަމާންކޮށް ކަމަށް ވެސް އެ އެޖެންސީން ބުނެފައިވެ އެވެ.
