އީރާނާ އެކު ވިޔަފާރީގެ މުޢާމަލާތްތައް ހިންގާ ޤައުމުތަކާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި ޓެރިފްގެ އިންޒާރަށް ޗައިނާ އިން ދެކޮޅުހަދައިފި
ވިޔަފާރީގެ ހަނގުރާމަތަކުން އެއްވެސް ބަޔަކަށް ކާމިޔާބީއެއް ނުލިބޭނެ ކަމަށާއި، ބިރުދެއްކުމާއި މަޖުބޫރުކުރުވުމަކީ މައްސަލަތަކަށް އޮތް ހައްލެއް ނޫން ކަމަށް ޗައިނާ އިން ބުނޭ.
އީރާނާއި ޗައިނާއާ ދެމެދު ޕާޓްނަރޝިޕް އެއްބަސްވުމެއްގައި ސޮއިކުރުމަށްފަހު ޗައިނާގެ ރައީސް ޝީ ޖިންޕިން (ވ) އާއި އީރާންގެ ރައީސް ހަސަން ރޫހާނީ (ކ) އީރާނުގެ ސަތަބާދު ކޮމްޕްލެކްސްގައި ނޫސްވެރިންނާ ބައްދަލު ކުރައްވަނީ - ޖެނުއަރީ 23، 2016. | ގެޓީ އިމޭޖަސް
އީރާނާ އެކު ވިޔަފާރީގެ މުޢާމަލާތްތައް ހިންގާ ޤައުމުތަކާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި ޓެރިފްގެ އިންޒާރަށް ޗައިނާ އިން ދެކޮޅުހަދައިފި އެވެ.
އީރާނާ އެކު ވިޔަފާރިކުރާ ޤައުމުތަކުން އެމެރިކާ އަށް އެތެރެކުރާ މުދަލުން 25 އިންސައްތައިގެ ޓެރިފެއް ނަގާނެ ކަމަށް ރައީސް ޓްރަމްޕް ސޯޝަލް މީޑިއާގައި ހާމަކުރެއްވުމާ ގުޅިގެން، ޗައިނާއިން ހޯމަ ދުވަހުގެ ރޭ ބުނެފައި ވަނީ، ބައިނަލްއަޤުވާމީ ހަމަތަކާ ޚިލާފަށް ވަކި ގައުމަކުން އަމިއްލަ އަށް އަޅާ ދަތިކުރުމުގެ ފިޔަވަޅުތަކާއި، ނުފޫޒު ފޯރުވުމުގެ ސިޔާސަތުތަކާ އެ ޤައުމުން ދެކޮޅު ހަދާ ކަމަށެވެ.
ވޮޝިންގޓަންގައި ހުންނަ ޗައިނާ އެމްބަސީގެ ތަރުޖަމާނަކު އެކްސްގައި ކުރެއްވި ޕޯސްޓެއްގައި ވިދާޅުވީ، ވަކި އުސޫލެއް ނެތި ޓެރިފް އިތުރުކުރުމާ ދެކޮޅަށް ޗައިނާއިން ގެންގުޅޭ ސިޔާސަތަކީ ސާފު އަދި ބަދަލުނުވާ ސިޔާސަތެއް ކަމަށެވެ. އަދި ވިޔަފާރީގެ ހަނގުރާމަތަކުން އެއްވެސް ބަޔަކަށް ކާމިޔާބީއެއް ނުލިބޭނެ ކަމަށާއި، ބިރުދެއްކުމާއި މަޖުބޫރުކުރުވުމަކީ މައްސަލަތަކަށް އޮތް ހައްލެއް ނޫން ކަމަށް ވެސް އޭނާ ފާހަގަކުރެއްވި އެވެ.
މީގެ އިތުރުން، ޤާނޫނާ ޚިލާފަށް އެއްފަރާތުން އަޅާ ފިޔަވަޅުތަކާ ޗައިނާ އިން ހަރުކަށި އިބާރާތުން ދެކޮޅުހަދާ ކަމަށާއި، އެ ޤައުމުގެ ޤާނޫނީ ޙައްޤުތަކާއި މަޞްލަޙަތުތައް ހިމާޔަތްކުރުމަށްޓަކައި އަޅަންޖެހޭ ހުރިހާ ފިޔަވަޅެއް އަޅާނެ ކަމަށްވެސް ޗައިނާއިން ވަނީ ބުނެފަ އެވެ.
