އިންޒާރަށް ފަހު، މަޝްވަރާ ކުރަން ބޭނުންވާ ކަމަށް އީރާން އިން ބުނެފި ކަމަށް ޓްރަމްޕް ވިދާޅުވެއްޖެ
12 ޖެނުއަރީ 2026 | ހޯމަ 06:53އީރާންގެ އިސްވެރިން ގުޅި ކަމަށް ފާހަގަ ކުރައްވައި ޓްރަމްޕް ވިދާޅުވީ، ބައްދަލުވުމެއް ހަމަޖެއްސުމަށް މަސައްކަތް ކުރަމުން އަންނަ ކަމަށް ވެސް ހާމަ ކޮށްފައިވާ ކަމަށް. އަދި އީރާން އިން މަޝްވަރާ ކުރަން ބޭނުންވާ ކަމަށް ޓްރަމްޕް ވިދާޅުވެފައިވޭ.
އެއާ ފޯސް ވަންގައި ހުންނަވައި އެމެރިކާގެ ރައީސް ޑޮނަލްޑް ޓްރަމްޕް ނޫސްވެރިންނާ ވާހަކަ ދައްކަވަނީ | ރޮއިޓަސް
އީރާންއާ ދެކޮޅަށް އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވާފައިވާއިރު، އެ އިންޒާރުގެ ފަހުން މަޝްވަރާ ކުރަން ބޭނުންވާ ކަމަށް އީރާން އިން އަންގާފައިވާ ކަމަށް ޓްރަމްޕް ވިދާޅުވެއްޖެ އެވެ.
އީރާންގައި އެ ޤައުމުގެ ސަރުކާރާ ދެކޮޅަށް އެތައް ބަޔަކު އަންނަނީ މުޒާހަރާ ކުރަމުންނެވެ. އީރާން ފައިސާގެ އަގު ވެއްޓުމާއި، ތަކެތީގެ އަގު މައްޗަށް ދިޔުން އަދި އިޤްތިސާދީ ދަތި ތަކުގެ ސަބަބުން ފެށުނު މުޒާހަރާ ވަރުގަދަ ވަމުން އަންނަ ކަމަށް ރިޕޯޓު ތަކުގައި ވަނީ ބުނެފަ އެވެ. އީރާންގެ ސަރުކާރުން ބުނެފައި ވަނީ، އެ ޤައުމާ ދެކޮޅު ބަޔަކު އަޑީގައި ތިބެގެން އެހެން މަޤުސަދެއްގައި ހިންގަމުން އަންނަ ކަމެއް ކަމަށެވެ.
މުޒާހަރާތަކާ ގުޅިގެން އެތައް ފަހަރަކު ޓްރަމްޕް ވާހަކަ ދައްކަވާފައިވާއިރު، މުޒާހަރާގެ އެއްވެސް ބައިވެރިޔަކަށް އަނިޔާ ނުކުރުމަށް، އަދި އެއްވެސް މީހަކު ނުމެރުމަށް ޓްރަމްޕް އިންޒާރު ދެއްވާފައިވެ އެވެ. އެފަދަ ކަމެއް ދިމާ ވެއްޖެ ނަމަ، އެ ބަޔަކާ ދެކޮޅަށް އެމެރިކާ އިން ހަމަލާ ދޭނެ ކަމުގެ އިންޒާރު ވެސް ޓްރަމްޕް ދެއްވާފައިވެ އެވެ.
އީރާންގައި ކުރަމުން އަންނަ މުޒާހަރާ އާއި އެ ޤައުމުގެ ޙާލަތު އެމެރިކާ އިން ވަރަށް ކައިރިން ބަލަމުން އަންނާނެ ކަމަށް ވެސް ޓްރަމްޕް ވިދާޅުވެފައިވެ އެވެ. އޭގެ ފަހުން އެއާ ފޯސް ވަންގައި ހުންނަވައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އާދީއްތަ ދުވަހު އީރާންގެ އިސްވެރިން އޭނާ އަށް ގުޅުއްވި ކަމަށެވެ.
އީރާންގެ އިސްވެރިން ގުޅި ކަމަށް ފާހަގަ ކުރައްވައި ޓްރަމްޕް ވިދާޅުވީ، ބައްދަލުވުމެއް ހަމަޖެއްސުމަށް މަސައްކަތް ކުރަމުން އަންނަ ކަމަށް ވެސް ހާމަ ކޮށްފައިވާ ކަމަށެވެ. އަދި އީރާން އިން މަޝްވަރާ ކުރަން ބޭނުންވާ ކަމަށް ޓްރަމްޕް ވިދާޅުވެފައިވެ އެވެ. ނަމަވެސް، އެފަދަ ބައްދަލުވުމެއްގެ ކުރިން ވެސް އިތުރު ފިޔަވަޅު ތަކެއް އަޅަން ޖެހިދާނެ ކަމަށް ޓްރަމްޕް ވަނީ ވިދާޅުވެފަ އެވެ.
އެމެރިކާގައި ހުންނަ ސެންޓަ ފޯ ހިއުމަން ރައިޓްސް އިން އީރާން (ސީއެޗްއާރުއައި) އިން ވަނީ، އީރާންގައި އިންޓަނެޓު ބަންދު ކޮށްފައިވާ ދުވަސްވަރު ކުރަމުން އަންނަ މުޒާހަރާގައި ސަތޭކައެއްހާ މީހުން މަރުވެފައިވާ ކަމަށް ފާހަގަ ކޮށްފަ އެވެ. އަދި އެއީ އެކަމުގެ މައުލޫމާތު ހިމެނޭ ހަގީގީ ރިޕޯޓެއް ކަމަށް ވެސް ފާހަގަ ކޮށްފައިވެ އެވެ. އަދި އީރާންގައި މަރުގެ ހަމަލާ ތަކެއް ދެމުން އަންނަ ކަމަށް ެވސް އެ ޖަމިއްޔާ އިން ވަނީ ފާހަގަ ކޮށްފަ އެވެ.
ނޯވޭގައި ހުންނަ އީރާން ހިއުމަން ރައިޓްސް (އައިއެޗްއާރު) އިން ބުނެފައި ވަނީ މުޒާހަރާތަކާާ ގުޅިގެން މަދުވެގެން 192 މީހުން މަރުވެފައިވާކަން ކަށަވަރު ކޮށްފައިވާ ކަމަށެވެ. ނަމަވެސް، އެ އަދަދު އެއަށް ވުރެ އިތުރު ވުމުގެ ފުރުސަތު ވެސް ވަރަށް ބޮޑު ކަމަށް ފާހަގަ ކޮށްފައިވެ އެވެ. އިތުރަށް އެ ޖަމިއްޔާ އިން ފާހަގަ ކޮށްފައި ވަނީ، 2000 މީހުން މަރުވެފައިވާ ކަމަށް، ބައެއް މަސްދަރު ތަކުން ބުނެފައިވާ ކަމަށެވެެ.
އީރާންގައި ކުރަމުން އަންނަ މުޒާހަރާތަކާ ގުޅިގެން އެ ޤައުމުގެ ސަރުކާރުން ބުނެފައި ވަނީ، ޤައުމީ ސަލާމަތަށް އަޅަން ޖެހޭ ފިޔަވަޅުތައް އަޅަމުން ގެންދާނެ ކަމަށެވެ. އަދި އަސާސީ ކަންކަމުގައި މުޒާހަރާ ކުރުމުގެ ފުރިހަމަ އިޚުތިޔާރު ރައްޔިތުންނަށް އޮންނާނެ ކަމަށާއި، ނަމަވެސް ޤައުމަށް ގެއްލުން ދިނުމުގެ އެއްވެސް ހައްގެއް ނޯންނާނެ ކަމަށް ސަރުކާރުން ވަނީ ބުނެފަ އެވެ.
