އީރާން އަށް އިންޓަނެޓު ދިނުމާ ގުޅޭ ގޮތުން ޓްރަމްޕް މަސްކާ ވާހަކަ ދައްކަވަނީ

އީރާން އަށް އަލުން އިންޓަނެޓުގެ ޚިދުމަތް ޤާއިމު ކުރުމުގެ މަސައްކަތުގައި އެހީތެރިވުމަށް، ބިލިއަނަރު އީލޮން މަސްކާ ވާހަކަ ދައްކަވާނެ ކަމަށް އެެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ، އީރާންގެ ސަރުކާރާ ދެކޮޅަށް އެ ޤައުމުގައި ކުރަމުން އަންނަ މުޒާހަރާ ތަކާ ގުޅިގެން އެ ޤައުމުގެ ބާރު ތަކުން އިންޓަނެޓުގެ ޚިދުމަތް ބަންދު ކޮށްފައިވާ ދަނޑިވަޅެއްގަ އެވެ. 

މަސްކުގެ ސްޕޭސް އެކްސް ކުންފުނީގެ ސެޓެލައިޓް އިންޓަނެޓު ޚިދުމަތް ސްޓާލިންކް އީރާންގައި ބޭނުން ކޮށްފައިވާތީ، އެ ކުންފުންޏާ ވާހަކަ ދެއްކުމާ ގުޅޭ ގޮތުން ސުވާލު ކުރުމުން ޓްރަމްޕް ވިދާޅުވީ، މަސްކަކީ އެފަދަ ކަންކަމަށް ވަރަށް މޮޅު މީހެއް ކަމަށެވެ. އަދި އޭނާ އަކީ ހުނަރުވެރި މީހެއް ކަމަށާއި، އެ ކުންފުންޏަކީ ވަރަށް ރަނގަޅު ކުންފުންޏެއް ކަމަށް ވެސް ޓްރަމްޕް ވިދާޅުވި އެވެ. 

މިދިޔަ ބުރާސްފަތި ދުވަހުން ފެށިގެން އީރާންގައި އިންޓަނެޓުގެ ޚިދުމަތް ބަންދު ކޮށްފައިވާތީ، އެ ޤައުމުން މައުލޫމާތު ލިބުމަށް ބޮޑެތި ހުރަސްތައް ކުރިމަތިވެފައިވެ އެވެ. މިހާރު އީރާންގައި ކުރިއަށް ދަމުން އަންނަ މުޒާހަރާ ތަކަކީ، 2022 ވަނަ އަހަރުގެ ފަހުން އެ ޤައުމުގައި ހިނގަމުން އަންނަ އެންމެ ބޮޑު މުޒާހަރާ އެވެ. 

މަސްކާ ވާހަކަ ދައްކަވާނެ ކަމަށް ޓްރަމްޕް ވިދާޅުވެފައިވާއިރު، މަސްކާއި ޓްރަމްޕް އަކީ މީގެ ކުރިން ވަރަށް ގާތް ގުޅުމެއް އޮތް ދެ ބޭފުޅުންނެވެ. އެގޮތުން 2024 ވަނަ އަހަރު އޮތް އެމެރިކާގެ ރިޔާސީ އިންތިޚާބުގައި ޓްރަމްޕްގެ ކެމްޕެއިން އަށް މަސްކު ފައިސާ ޚަރަދު ކޮށްފައިވާއިރު، މަސްކު ވަނީ ޓްރަމްޕްގެ ކެމްޕެއިންގައި އަމަލީ ގޮތުން ވެސް ބައިވެރިވެފަ އެވެ. ޓްރަމްޕް ވެރި ކަަމަށް ވަޑައިގެންނެވުމާ އެކު، ފެޑަރަލް ސަރުކާރުގެ ޚަރަދުތައް ކުޑަ ކުރުމުގެ މަސައްކަތުގައި ވެސް މަސްކު ވަނީ ބައިވެރިވެފަ އެވެ. 

ނަމަވެސް، ޓްރަމްޕްގެ ސަރުކާރުން ހުށަހެޅި ޓެކްސްގެ ބިލާ މެދު ހިތްހަމަ ނުޖެހި މަސްކު ވަނީ ސަރުކާރުން ދުރަށް ދާން ނިންމައިފަ އެވެ. އެއާ އެކު މަސްކާއި ޓްރަމްޕްއާ ދެމެދު އޮތް ގުޅުން ބޮޑު ހީނަރު ކަމެއް އައިސްފައިވާއިރު، ދެ ބޭފުޅުން ވަނީ އެކަކު އަނެކަކަށް ބަހުގެ ހަމަލާތަކެއް ވެސް ދީފަ އެވެ. ނަމަވެސް، އަނެއްކާ ވެސް އެ ގުޅުން ރަނގަޅު ވަމުން އަންނަ މަންޒަރު ފެންނަ ކަމަށް ފާހަގަ ކޮށްފައިވެ އެވެ. 

ޓްރަމްޕްގެ ލަގްޒަރީ ރިސޯޓު، މާ އަ ލާގޯ ގައި މަަސްކާއި ޓްރަމްޕް ބައްދަލު ކުރައްވާފައިވާ މަންޒަރު ފެނިފައިވާއިރު، ދެ ބޭފުޅުން އެކުގައި ފަރިއްކުޅުއްވާ މަންޒަރުތައް ވެސް ސޯޝަލް މީޑިއާ ގައި ވަނީ ދައުރުވެފަ އެވެ. އެމެރިކާގެ ސެކްރެޓަރީ އޮފް ވޯ ޕީޓް ހެގްސެތު، ޓެކްސަސްގައި ހުންނަ ސްޕޭސް އެކްސް އިމާރާތައް ޒިޔާރާތް ކުރެއްވުމަށް ވެސް ވަނީ ހަމަޖެހިފަ އެވެ. 

މީގެ ކުރިން ވެސް އީރާން އަށް އިންޓަނެޓު ފޯރުކޮށްދިނުމުގެ މަސައްކަތުގައި މަސްކު ޝައުޤުވެރިކަން ފާޅު ކޮށްފައިވެ އެވެ. އެގޮތުން 2022 ވަނަ އަހަރު މުޒާހާރަތައް ކުރިއަށް ދިޔައިރު ވެސް، މަސްކު ވަނީ އެފަދަ އެހީތެރި ކަމެއް ދެއްވަން ތައްޔާރަށް ހުންނެވިކަން ހާމަ ކޮށްފަ އެވެ. އެމެރިކާގެ ކުރީގެ ރައީސް ޖޯ ބައިޑަންގެ ވެރި ކަމުގައި ވެސް އީރާން އަށް ސްޓާލިންކުގެ ޚިދުމަތް ފޯރުކޮށްދިނުމަށް މަސްކު ވަނީ ވާހަކަ ދައްކައިފަ އެވެ.