އެކްސް ގެ ސޯޝަލް މީޑިއާ ގައި ޗެޓްބޮޓް ގްރޮކް ބޭނުންކޮށްގެން ބަދުއަޚުލާގީ ފޮޓޯ އުފެއްދުމުގެ ފުރުސަތު ބަންދުކޮށްފި

އީލޮން މަސްކުގެ އާޓިފިޝަލް އިންޓެލިޖެންސް (އޭއައި) ޗެޓްބޮޓް "ގްރޮކް" ބޭނުންކޮށްގެން ބަދުއަޚުލާގީ ފޮޓޯތައް އުފައްދަމުންދާ މައްސަލައިގައި އާންމުންގެ ބޮޑެތި ފާޑުކިޔުންތަކެއް އަމާޒުވުމާ ގުޅިގެން، ހިލޭ މި ޚިދުމަތް ބޭނުން ކުރާ ފަރާތްތަކަށް ފޮޓޯ އުފެއްދުމުގެ ފުރުސަތު ބަންދުކޮށްފި އެވެ.

މި މައްސަލައިގައި މަސްކަށް ބޮޑެތި ޖޫރިމަނާތަކެއްގެ އިންޒާރު ލިބިފައިވާއިރު، ބައެއް ގައުމުތަކުން ވަނީ މި ވަސީލަތް ބޭނުންކޮށްގެން ބަދުއަޚުލާގީ މަންޒަރުތައް އުފައްދާތީ ފާޅުގައި އެކަމާ ދެކޮޅަށް ތެދުވެފަ އެވެ. ރިޕޯޓްތައް ބުނާގޮތުން ބައެއް މީހުން ވަނީ ގްރޮކް ބޭނުންކޮށްގެން އަންހެނުންނާއި ކުޑަކުދިންގެ ބަރަހަނާ ފޮޓޯތަކާއި، އަދި ބަދުއަޚުލާގީ އަމަލުތައް ދައްކުވައިދޭ ފޮޓޯތައް އުފައްދާފަ އެވެ.

މަސްކުގެ ސޯޝަލް މީޑިއާ ޕްލެޓްފޯމް "އެކްސް" މެދުވެރިކޮށް ހުކުރު ދުވަހު ގްރޮކް އިން ބުނެފައިވަނީ، ފޮޓޯ އުފެއްދުމާއި ފޮޓޯ އަށް ބަދަލު ގެނައުމުގެ ފުރުސަތު މިހާރު އޮތީ ހަމައެކަނި ފައިސާ ދައްކައިގެން ޚިދުމަތް ހޯދާ "ސަބްސްކްރައިބަރުންނަށް" އެކަނި ކަމަށެވެ. މި ބަދަލާއެކު، މި ވަސީލަތް ބޭނުންކުރާ ގިނަ ބަޔަކަށް ދެން އޭއައި ބޭނުންކޮށްގެން ފޮޓޯއެއް ނުހެދޭނެ އެވެ. ފައިސާ ދައްކާ ކަސްޓަމަރުން އެމީހުންގެ ކްރެޑިޓް ކާޑުގެ މައުލޫމާތާއި އަމިއްލަ ތަފްސީލުތައް އެކްސް އާ ހިއްސާކުރަން ޖެހެ އެވެ.

ޔޫރަޕިއަން ކޮމިޝަނުން މި ހަފުތާގައި ބުނެފައި ވަނީ އަންހެނުންނާއި ކުޑަކުދިންގެ މިފަދަ ފޮޓޯތައް އުފެއްދުމަކީ ޣައިރުގާނޫނީ ކަމެއް ކަމަށެވެ. އަދި ބުރާސްފަތި ދުވަހު އެ ކޮމިޝަނުން ވަނީ 2026 ވަނަ އަހަރުގެ ނިޔަލަށް ގްރޮކްއާ ގުޅޭ ހުރިހާ  ޑޮކިއުމެންޓް ތަކާއި މައުލޫމާތުތައް ރައްކާތެރިކޮށް ބެލެހެއްޓުމަށް އެކްސް އަށް އަމުރުކޮށްފަ އެވެ.

އިނގިރޭސިވިލާތުގެ ބޮޑުވަޒީރު ކިއާ ސްޓާމާ ވިދާޅުވީ އެކްސް އިން މިކަން ކޮންޓްރޯލް ކުރަންޖެހޭ ކަމަށެވެ. އަދި މިފަދަ ފޮޓޯތަކަކީ ގާނޫނާ ޚިލާފު އެއްޗެއް ކަމަށާއި، އިނގިރޭސިވިލާތުން މިފަދަ ކަންކަމަށް ކެތްނުކުރާނެ ކަމަށްވެސް އޭނާ ވިދާޅުވި އެވެ. ފަރަންސޭސިވިލާތާއި، މެލޭޝިއާ އަދި އިންޑިއާ އިން ވެސް ވަނީ މި މައްސަލައިގައި މަސްކުގެ ޕްލެޓްފޯމަށް ވަރަށް ބޮޑަށް ފާޑުކިޔާފަ އެވެ.

"ގްރޮކް ބޭނުންކޮށްގެން ގާނޫނާ ޚިލާފު އެއްޗެއް އުފައްދާ ކޮންމެ މީހަކަށް ވެސް، ގާނޫނާ ޚިލާފު އެއްޗެއް އާންމުކުރުމުން ލިބޭ އަދަބު ލިބޭނެ،" ބަދުއަޚުލާގީ ފޮޓޯތަކާ ގުޅޭގޮތުން ކުރި ޕޯސްޓަކަށް ޖަވާބު ދެމުން މަސްކު މިދިޔަ ހަފުތާގައި ބުނެފައިވެ އެވެ.

އެކްސްގެ ރަސްމީ "ސޭފްޓީ" އެކައުންޓުން ފަހުން ބުނެފައި ވަނީ، އެ ޕްލެޓްފޯމުގައި ހުންނަ ގާނޫނާ ޚިލާފު ތަކެތި ފޮހެލުމާއި، އެކައުންޓްތައް ދާއިމީކޮށް ބަންދުކުރުމުގެ އިތުރުން، ބޭނުންވާ ހާލަތްތަކުގައި ސަރުކާރުތަކާއި ގާނޫނު ތަންފީޒުކުރާ އިދާރާތަކާ ގުޅިގެން މަސައްކަތް ކުރަމުންދާ ކަމަށެވެ.