'ގްރޮކް' އޭއައި ބޭނުންކޮށްގެން މީހުންގެ ފޮޓޯތަކުން ހެދުން ވަކިކޮށް، ބަރަހަނާކުރާ މައްސަލަ ބޮޑުވެއްޖެ

އީލޮން މަސްކްގެ ސޯޝަލް މީޑިއާ ޕްލެޓްފޯމް 'އެކްސް' ގައި ހިމެނޭ 'ގްރޮކް' އޭއައި ޗެޓްބޮޓް ބޭނުންކޮށްގެން، މީހުން ހެދުން އަޅައިގެން ނަގާފައި ހުންނަ ރަނގަޅު ފޮޓޯތަކުން ހެދުން ވަކިކޮށް މީހުން ބަރަހަނާ ކުރަމުންދާ މައްސަލައިގައި ގިނަ ބައެއްގެ ނުރުހުމާއި ފާޑުކިޔުން އެ ކުންފުންޏަށް އަމާޒުވެއްޖެ އެވެ.

އެކްސް ގައި މި ފަންކްޝަން ހިމެނުމާއެކު އެކްސް ބޭނުން ކުރާ ފަރާތްތަކުން ގެންދަނީ ފުޅާ ދާއިރާ އެއްގައި މީހުންގެ ފޮޓޯ ތައް ގްރޮކް ބޭނުން ކޮށްގެން ބަދަލު ކޮށް ބަރަހަނާ ކުރަމުންނެވެ.

ފޮޓޯތަކުގައި ތިބޭ އަސްލު މީހުންނަށް އެނގުމެއްނެތި ފޮޓޯތައް ބަދަލު ކޮށް ބިކިނީ ފަދަ ތަކެތި ލައްވައިގެންނާއި، ޖިންސީ މަންޒަރުތައް ސިފަވާ ގޮތަށް ފޮޓޯތައް ވަނީ އުފައްދާފައެވެ.

ގްރޮކް އުފެއްދި އެކްސްއޭއައި ކުންފުނިން މި މައްސަލަ އާ ގުޅޭގޮތުން ބީބީސީން ކުރި ސުވާލުތަކަށް ސީދާ ޖަވާބެއް ދީފައެއް ނުވާ ކަމަށް ބީބީސީ އިން ރިޕޯޓު ކޮށްފައިވެ އެވެ. 

ދުނިޔޭ އެކި ކަންކޮޅުތަކުގައި މި މައްސަލަ ބޮޑުވެފައިވާ އިރު، އިނގިރޭސިވިލާތުގެ ހޯމް އޮފީހުގެ ތަރުޖަމާނަކާ ހަވާލާދީ ބީބީސީ އިން ބުނެފައި ވަނީ، ފޮޓޯތައް ބަރަހަނާ ކުރުމަށް ބޭނުން ކުރާ ވަސީލަތްތައް (ނިއުޑިފިކޭޝަން ޓޫލްސް) އިނގިރޭސިވިލާތުގައި މަނާ ކުރުމަށް ގާނޫނެއް ހަދަމުންދާ ކަމަށެވެ. އަދި ޖިނާއީ ކުށެއްގެ ގޮތުގައި މިކަން ކަނޑައަޅައި، މިފަދަ ޓެކްނޮލޮޖީ ފޯރުކޮށްދޭ ކޮންމެ މީހަކަށް ޖަލު ހުކުމެއް ނުވަތަ ބޮޑު އަދަދަކުން ޖޫރިމަނާ ކުރެވޭނެ ކަމަށް ވެސް އޭނާ ވިދާޅުވިއެވެ.

އިނގިރޭސިވިލާތުގައި މުވާސަލާތީ ކަންކަން ރެގިއުލޭޓްކުރާ އިދާރާ، އޮފްކޮމް އިން ބުނި ގޮތުގައި، ޓެކްނޮލޮޖީ ކުންފުނިތަކުން އެމީހުންގެ ޕްލެޓްފޯމްތަކުގައި ދައުރު ކުރާ ޣައިރު ގާނޫނީ މަންޒަރުތައް މީހުންނަށް ފެނުމުގެ ނުރައްކާ އޮތް މިންވަރު ދެނެގަންނަން ޖެހެއެވެ. ނަމަވެސް، އެކްސް ނުވަތަ ގްރޮކް އާ ގުޅޭގޮތުން އެފަދަ ތަހުގީގެއް ކުރަމުންދާކަން އެ އިދާރާ އިން ކަށަވަރުކޮށްދީފައެއް ނުވެ އެވެ.

ގްރޮކް އަކީ ހިލޭ ބޭނުން ކުރެވޭ އޭއައި އެސިސްޓެންޓެކެވެ. މީގެ ބައެއް ހާއްސަ ފީޗާތަކަށް ފައިސާ ދައްކަން ޖެހޭ ނަމަވެސް، މީގެ އިމޭޖް އެޑިޓިން ފީޗާ ހިލޭ ބޭނުންކޮށްގެން އަޕްލޯޑް ކޮށްފައި ހުންނަ ފޮޓޯތަކަށް ބަދަލު ގެނައުމުގެ ފުރުސަތު އެކްސް ބޭނުން ކުރާ ފަރާތްތަކަށް އޮވެއެވެ.

ބަރަހަނާ މަންޒަރުތަކާއި ޖިންސީ ކަންކަމަށް ހިތްވަރުދޭ ފޮޓޯ އަދި ވީޑިއޯ އުފެއްދުމުގެ ފުރުސަތު ދޭތީ ގްރޮކް އަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. މީގެ ކުރިން މަޝްހޫރު ލަވަކިޔުންތެރިޔާ ޓޭލާ ސުވިފްޓްގެ ޖިންސީ މަންޒަރުތައް ހިމެނޭ ފޭކް ވީޑިއޯއެއް އުފެއްދި މައްސަލައިގައި ވެސް މި ޓެކްނޮލޮޖީ އަށް ތުހުމަތުތަކެއް ކުރެވުނެވެ.

ޑާރހަމް ޔުނިވަރސިޓީގެ ލޯ ޕްރޮފެސަރެއް ކަމަށްވާ ކްލެއާ މެކްގްލިން އާ ހަވާލާދީ ބީބީސީ އިން ރިޕޯޓު ކޮށްފައިވާ ގޮތުގައި، އެކްސް ނުވަތަ ގްރޮކް އިން ބޭނުން ނަމަ މިފަދަ ނޭދެވޭ އަމަލުތައް ހުއްޓުވިދާނެ ކަމަށާއި، ނަމަވެސް އެ ފަރާތްތަކުން އެއްވެސް ޖެހިލުމެއް ނެތި މިކަންކަމަށް ފުރުސަތު ދެމުންދާ ކަމަށެވެ. "މި ފޮޓޯތައް އުފެއްދުމާއި ފެތުރުމުގެ ފުރުސަތު އެ ޕްލެޓްފޯމުން ދޭތާ އެތައް މަހެއް ވެއްޖެ. އަދި މިހާތަނަށް ރެގިއުލޭޓަރީ އިދާރާއަކުން މިކަމަށް ފިޔަވަޅެއް އަޅާފައެއް ނުވޭ،" އޭނާ ވިދާޅުވިއެވެ.

އެކްސް އޭއައި ބޭނުން ކުރުމުގެ އުސޫލުތައް ބުނާގޮތުން، މީހުންގެ ސިފަ ބޭނުންކޮށްގެން ބަރަހަނާ މަންޒަރުތައް އުފެއްދުމަކީ މަނާކަމެކެވެ.

އޮފްކޮމް އިން ބީބީސީ އަށް ދިން ބަޔާނެއް ގައި ބުނެފައި ވަނީ، އިނގިރޭސިވިލާތުގައި މީހެއްގެ ނުރުހުމުގައި އެމީހެއްގެ ޖިންސީ ފޮޓޯތައް ނުވަތަ ކުޑަކުދިންނަށް ޖިންސީ ގޯނާކުރާ މަންޒަރުތައް ހިމެނޭ ތަކެތި އުފެއްދުމާއި ހިއްސާ ކުރުމަކީ ޣައިރު ގާނޫނީ ކަމެއް ކަމަށެވެ. އަދި މީގެ ތެރޭގައި އޭއައި ބޭނުންކޮށްގެން އުފައްދާ 'ސެކްޝުއަލް ޑީޕްފޭކްސް' ވެސް ހިމެނޭނެ ކަމަށް އެ އިދާރާ އިން ބީބީސީ އަށް ކަށަވަރުކޮށްދިނެވެ.

އެކްސް ފަދަ ޕްލެޓްފޯމްތަކުން އެމީހުންގެ ސައިޓްތަކުގައި މިފަދަ ޣައިރު ގާނޫނީ ތަކެތި ދައުރުވުން ހުއްޓުވުމަށް އެކަށީގެންވާ ފިޔަވަޅުތައް އަޅަންޖެހޭނެ ކަމަށާއި، އެފަދަ އެއްޗެއް ފާހަގަވުމާއެކު ވަގުތުން ނައްތާލަން ޖެހޭނެ ކަމަށްވެސް އެ އިދާރާއިން ބުނެފައިވެއެވެ.