އީރާން އޮތީ "މުސީބާތެއްގެ" ތެރޭގައި: ޓްރަމްޕް
އެމެރިކާގެ ތެޔޮ ކުންފުނި ތަކުގެ އިސްވެރިންނާ ބައްދަލު ކުރެްވުމަށް ފަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އީރާންގެ ބައެއް ސިޓީތައް މިހާރު ކޮންޓްރޯލް ކުރަމުން އަންނަނީ އެ ޤައުމުގެ ރައްޔިތުން ކަމަށް. އަދި އެއީ މީގެ ކުރިން ހިތަށް ވެސް އަރާފައި ނުވާ ކަމެއް ކަމަށް ޓްރަމްޕް ފާހަގަ ކުރެއްވި.
އެމެރިކާގެ ރައީސް ޑޮނަލްޑް ޓްރަމްޕް | ރޮއިޓަސް
އީރާންގައި މިހާރު ކުރިއަށްދާ މުޒާހަރާތަކާ ގުޅިގެން އެ ޤައުމު އޮތީ ބޮޑު "މުސީބާތެއްގެ" ތެރޭގައި ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ހުކުރު ދުވަހު އެމެރިކާގެ ރިޔާސީ ގަނޑުވަރު، ވައިޓް ހައުސްގައި ހުންނަވައި ޓްރަމްޕް މިހެން ވިދާޅުވީ އީރާންގެ ސަރުކާރާ ދެކޮޅަށް މިހާރު އެ ޤައުމުގައި ކުރިއަށްދާ މުޒާހަރާ ތަކަށް އިޝާރާތް ކުރައްވަ އެވެ.
އެމެރިކާގެ ތެޔޮ ކުންފުނި ތަކުގެ އިސްވެރިންނާ ބައްދަލު ކުރެްވުމަށް ފަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވެފައި ވަނީ، އީރާންގެ ބައެއް ސިޓީތައް މިހާރު ކޮންޓްރޯލް ކުރަމުން އަންނަނީ އެ ޤައުމުގެ ރައްޔިތުން ކަމަށެވެ. އަދި އެއީ މީގެ ކުރިން ހިތަށް ވެސް އަރާފައި ނުވާ ކަމެއް ކަމަށް ޓްރަމްޕް ފާހަގަ ކުރެއްވި އެވެ. އެހެންކަމުން، އެކަމަކީ ވަރަށް ބޮޑު ހައިރާން ކަމެއް ގެނުވި ކަމެއްގެ ގޮތުގައި ޓްރަމްޕް ވަނީ ސިފަ ކުރައްވައިފަ އެވެ.
މުޒާހަރާ ތަކުގައި ބައިވެރިވާ އީރާންގެ ރައްޔިތުންނާ ދެކޮޅަށް ހަމަލާ ދީ، މީހުން މަރައިގެން ނުވާނެ ކަމަށް މީގެ ކުރިން ޓްރަމްޕް ވަނީ އިންޒާރު ދެއްވައިފަ އެވެ. އެ އިންޒާރު މިފަހަރު ވެސް ތަކުރާރު ކުރައްވައި ޓްރަމްޕް ވިދާޅުވީ، އެމެރިކާ އިން އަންނަނީ އީރާންގެ ޙާލަތު ވަރަށް ކައިރިން ބަލަމުން ކަމަށެވެ. އެގޮތުން އެއްވެސް މީހަކަށް އަނިޔާއެއް ވެއްޖެ ނަމަ، އެމެރިކާ އިން އެކަމުގެ ތެރެއަށް ވަދެ، އެ ބަޔަކާ ދެކޮޅަށް ހަމަލާ ދޭނެ ކަމަށް ޓްރަމްޕް ވިދާޅުވި އެވެ.
އެހެން ނަމަވެސް، އޭގެ މާނަ އަކީ އެމެރިކާގެ ސިފައިން އީރާން އަށް ފޮނުވުން ނޫން ކަމަށް ޓްރަމްޕް ވިދާޅުވެފައިވެ އެވެ.
އީރާންގެ ސަރުކާރާ ދެކޮޅަށް ކުރަމުން އަންނަ މުޒާހަރާތަކާ ގުޅިގެން، އެ ޤައުމުގެ ރޫޙާނީ ލީޑަރު އާޔަތުﷲ އަލީ ޚާމަނާއީ ވަނީ އިންޒާރެއް ދެއްވައިފަ އެވެ. އެގޮތުން ޤައުމުގައި ކުރިއަށް ގެންދާ ޓެރަރިސްޓު އަމަލުތަކާ ދެކޮޅަށް އެއްބައިވަންތަކަން އިސް ކުރުމަށް ޚާމަނާއީ ގޮވާލެއްވި އެވެ. އެ މުޒާހަރާ އަކީ އީރާންއާ ދެކޮޅު، އެ ޤައުމުގެ ދުޝްމަނުންގެ ރޭވުމެއް ކަމަށް ސިފަ ކުރައްވައި، އެކަން ހުއްޓުވުމަށް ހަރުކަށި ފިޔަވަޅު އަޅުއްވާނެ ކަމުގެ އިންޒާރު ވެސް ޚާމަނާއީ ވަނީ ދެއްވައިފަ އެވެ.
އީރާާންގެ އިޤްތިޞާދު ދަށްވެ، އެ ޤައުމުގެ ފައިސާގެ އަގު ވެއްޓުމާ ގުޅިގެން ފެށުނު މުޒާހަރާ ވަނީ ޤައުމުގެ އެކި ސަރަހައްދު ތަަކަށް ފެތުރިފަ އެވެ. މީގެ ކުރިން ވެސް ޓްރަމްޕް ވަނީ، މުޒާހަރާގެ ބައިވެރިންނަަށް ހަމަލާ ދީގެން ނުވާނެ ކަމަށް ވިދާޅުވެ އިންޒާރު ދެއްވައިފަ އެވެ. އަދި އޭނާ ވަނީ މުޒާހަރާގެ ބައިވެރިންނަށް ހިތްވަރު ވެސް ދެއްވައިފަ އެވެ.
