ޓްރަމްޕްގެ ޕާޓީގެ މެމްބަރުންގެ ވޯޓާ އެކު ކޮންގްރެސްގެ ހުއްދަ ނެތި ވެނެޒުއޭލާގައި އިތުރު އަސްކަރީ ހަރަކާތްތައް ހިންގުން ރައީސް ޓްރަމްޕަށް މަނާ ކުރުމުގެ ގަރާރު ކުރިއަށް ގެންދަން ފާސް ކޮށްފި
ވޯޓުގެ ނަތީޖާ އާ އެކު ޓްރަމްޕް ވަނީ ވަރަށް ބޮޑަށް ކޯފާވެފައި. "ޓްރޫތު ސޯޝަލް" ގައި ޓްރަމްޕް ވިދާޅުވީ އެ ބޭފުޅުން "ލަދުގަންނަން ޖެހޭނެ" ކަމަށާއި ދެން ދުވަހަކު ވެސް މަގާމަކަށް އިންތިހާބުވެގެން ނުވާނެ ކަމަށް.
ވޮޝިންގޓަން ގައި ހުންނަ އެމެރިކާގެ ގާނޫނު ހަދާ މަޖިލީހުގެ ގެ - ކެޕިޓަލް ބިލްޑިންގ | ގެޓީ އިމޭޖަސް
ވެނެޒުއޭލާ އާ ދެކޮޅަށް އަސްކަރީ ފިޔަވަޅު އެޅުމަށް ރައީސް ޑޮނަލްޑް ޓްރަމްޕަށް އޮތް ބާރުތައް ހަނިކުރުމުގެ ގަރާރެއްގެ މަސައްކަތް ކުރިއަށް ގެންދަން އެމެރިކާގެ ސެނެޓުން ފާސްކޮށްފި އެވެ. މި ގަރާރުގެ މަގްސަދަކީ ކޮންގްރެސްގެ ހުއްދައެއް ނެތި ވެނެޒުއޭލާއާ ދެކޮޅަށް އިތުރު އަސްކަރީ ހަރަކާތްތައް ހިންގުން ރައީސް ޓްރަމްޕަށް މަނާ ކުރުމެވެ.
ބުރާސްފަތި ދުވަހު ނެގި އިޖުރާއީ ވޯޓުގައި، ހަނގުރާމައިގެ ބާރުތަކާ ބެހޭ މި ގަރާރު ކުރިއަށް ގެންދިއުމަށް 52 މެންބަރުން ވޯޓު ދެއްވިއިރު، ދެކޮޅަށް ވޯޓު ދެއްވީ 47 މެންބަރުންނެވެ. ޓްރަމްޕްގެ ރިޕަބްލިކަން ޕާޓީގެ ބައެއް މެންބަރުން ރައީސްގެ ނިންމެވުމާ ދެކޮޅަށް ނުކުމެ، ސެނެޓުގެ ހުރިހާ ޑިމޮކްރެޓުންނާ ގުޅިވަޑައިގެން މި ގަރާރު ކުރިއަށް ގެންދިއުމަށް ވަނީ ވޯޓު ދެއްވާފަ އެވެ.
މި ގަރާރު ފާސްވެއްޖެ ނަމަ، ކޮންގްރެސްގެ އިތުރު ހުއްދައެއް ނެތި ވެނެޒުއޭލާގެ ތެރޭގައި ނުވަތަ އެ ގައުމާ ދެކޮޅަށް ހިންގާ ހަނގުރާމަވެރި އަމަލުތަކުން އެމެރިކާގެ އަސްކަރިއްޔާ އެކަހެރި ކުރުމަށް ޓްރަމްޕަށް މަޖުބޫރުވާނެ އެވެ.
މި ގަރާރު ދެން ހުށަހެޅޭނީ ސެނެޓުގެ ފުރިހަމަ ބަހުސަކަށެވެ. ޓްރަމްޕްގެ މޭޒާ ހަމައަށް މި ގަރާރު ވާސިލްވުމަށްޓަކައި ކޮންގްރެސްގެ ދެ މަޖިލީހުން ވެސް މިއަށް ރުހުން ދޭން ޖެހެ އެވެ. އެއަށް ފަހު ރައީސް ޓްރަމްޕަށް މި ގަރާރު ވީޓޯ ކުރުމުގެ ބާރު ލިބިވަޑައިގަންނަވާނެ އެވެ. ރައީސްގެ ވީޓޯ ބާތިލުކުރުމަށްޓަކައި ރިޕަބްލިކަން ޕާޓީގެ އަގުލަބިއްޔަތު އޮންނަ ހައުސް އޮފް ރެޕްރެޒެންޓޭޓިވްސް އަދި ސެނެޓުގެ ތިންބައިކުޅަ ދެބައިގެ ތާއީދު ބޭނުންވާނެ އެވެ. މިއީ ހާސިލުކުރަން އުނދަގޫވާނެ އަދަދެއް ކަމަށް ބެލެވެ އެވެ.
އެހެންނަމަވެސް، ދިރާސާ ކުރާ ފަރާތްތަކުން ދެކޭ ގޮތުގައި ބުރާސްފަތި ދުވަހުގެ ވޯޓަކީ ރަމްޒީ ގޮތުން ވަރަށް މުހިންމު ނިންމުމެކެވެ. މިއީ މިދިޔަ ހޮނިހިރު ދުވަހު ކަރާކަސް ގައި ހިންގި ވަރުގަދަ އަސްކަރީ އޮޕަރޭޝަނެއްގައި ވެނެޒުއޭލާގެ ރައީސް ނިކޮލަސް މަދޫރޯ ހައްޔަރުކުރި (ވަގަށް ނެގި) މައްސަލަ އާއި، ވެނެޒުއޭލާ އަށާއި އެ ސަރަހައްދުގެ އެހެން ގައުމުތަކަށް އަލުން ހަމަލާދޭނެ ކަމަށް ވިދާޅުވެ ޓްރަމްޕް ދެއްވަމުން ގެންދަވާ އިންޒާރުތަކާމެދު އޮތް ނުރުހުން ހާމަކޮށްދޭ ކަމެކެވެ.
ސެންޓަރ ފޯ އިންޓަނޭޝަނަލް ޕޮލިސީގެ ވައިސް ޕްރެޒިޑެންޓް ޑިލަން ވިލިއަމްސް އެކްސް ގައި ކުރެއްވި ޕޯސްޓެއްގައި ވިދާޅުވީ، މިއީ ޓްރަމްޕަށް ރައްދުކުރެވުނު ބޮޑު ނުރުހުމެއް ކަމަށެވެ.
މީގެ ކުރިން ވެސް މިފަދަ ގަރާރުތައް ފާސްކުރަން ކުރި މަސައްކަތްތައް ސެނެޓާއި ހައުސް އިން ވަނީ ނާކާމިޔާބު ކޮށްލާފަ އެވެ. އެފަހަރު ރިޕަބްލިކަން މެންބަރުން ތިއްބެވީ ޓްރަމްޕާ އެކުގައެވެ. ނަމަވެސް ބުރާސްފަތި ދުވަހު މި ގަރާރަށް ތާއީދުކުރެއްވި ފަސް ރިޕަބްލިކަން މެންބަރުންގެ ތެރޭގައި ސެނެޓަރ ރޭންޑް ޕޯލް، ލީސާ މުރްކޯވްސްކީ، ސޫޒަން ކޮލިންސް، ޓޮޑް ޔަންގް އަދި ޖޯޝް ހޯލީ ހިމެނިވަޑައިގަންނަވަ އެވެ.
މި ބޭފުޅުންގެ ވޯޓުގެ ސަބަބުން ޓްރަމްޕް ވަނީ ވަރަށް ބޮޑަށް ކޯފާވެފަ އެވެ. "ޓްރޫތު ސޯޝަލް" ގައި ޓްރަމްޕް ވިދާޅުވީ އެ ބޭފުޅުން "ލަދުގަންނަން ޖެހޭނެ" ކަމަށާއި ދެން ދުވަހަކު ވެސް މަގާމަކަށް އިންތިހާބުވެގެން ނުވާނެ ކަމަށެވެ.
ސެނެޓުގެ މި ގަރާރާމެދު އެންމެ ފަހުގެ ވޯޓު ނަގާނެ ތާރީޚެއް އަދި ސީދާ ކަށަވަރު ނުވި ނަމަވެސް، އަންނަ ހަފުތާގެ ތެރޭގައި ވޯޓު ނެގުން އޮންނާނެ ކަމަށް ބެލެވެ އެވެ.
