"ބޭރުގެ ބާރުތަކުން" އީރާނުގެ ދާޚިލީ ކަންކަމުގެ ތެރެއަށް އަތްބޭނުމަށް ކުރާ މަސައްކަތްތައް ރަޝިޔާ އިން ކުށްވެރިކޮށްފި

އީރާނުގައި މުޒާހަރާކުރާ މީހުންނާ ދެކޮޅަށް އެ ގައުމުގެ ސަރުކާރުން އަޅަމުންދާ ހަރުކަށި ފިޔަވަޅުތަކުގެ ތެރެއަށް ވަންނާނެ ކަމުގެ އިންޒާރު އެމެރިކާ އިން ދީފައިވަނިކޮށް، "ބޭރުގެ ބާރުތަކުން" އީރާނުގެ ދާޚިލީ ކަންކަމުގެ ތެރެއަށް އަތްބޭނުމަށް ކުރާ މަސައްކަތްތައް ރަޝިޔާއިން ހޯމަ ދުވަހު ކުށްވެރިކޮށްފި އެވެ.

ރަޝިޔާގެ ސެކިއުރިޓީ ކައުންސިލްގެ ސެކްރެޓަރީ ސަރްގޭ ޝޮއިގޫ، އީރާނުގެ އޮފިޝަލަކާ ފޯނުން ގުޅުއްވައި ދެއްކެވި ވާހަކަފުޅުގައި، އީރާނުގެ ދާޚިލީ މަސްލަހަތުގެ ތެރެއަށް ބޭރުގެ ފަރާތްތަކުން ވަނުމަށް ކުރާ މަސައްކަތްތައް ހަރުކަށި އިބާރާތުން ކުށްވެރިކުރެއްވި ކަމަށް އެ ގައުމުގެ ދައުލަތުގެ މީޑިއާ އިން ވަނީ ރިޕޯޓްކޮށްފައެވެ. މިއީ އީރާނުގައި އުފެދިފައިވާ ހަމަނުޖެހުންތަކާ ގުޅިގެން މޮސްކޯ އިން ރަސްމީކޮށް ބަހެއް ބުނި ފުރަތަމަ ފަހަރެވެ.