ބޭރުގެ ފަރާތްތަކާ ގުޅިގެން ގައުމަށް ގެއްލުންދެމުންދާ ހަތިޔާރު އެޅި ފަރާތްތަކަށް ހަރުކަށި ރައްދު ދިނުމަށް އީރާނު އޮތީ ތައްޔާރަށް ކަމަށް އެ ގައުމުގެ އިސް ސެކިއުރިޓީ އޮފިޝަލަކު ވިދާޅުވެއްޖެ

ބޭރުގެ ފަރާތްތަކާ ގުޅިގެން ގައުމަށް ގެއްލުންދެމުންދާ ހަތިޔާރު އެޅި ފަރާތްތަކަށް ހަރުކަށި ރައްދު ދިނުމަށް އީރާނު އޮތީ ތައްޔާރަށް ކަމަށް އެ ގައުމުގެ އިސް ސެކިއުރިޓީ އޮފިޝަލް ވިދާޅުވެއްޖެ އެވެ.

އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓަރީ އަލީ ލާރިޖާނީ ވިދާޅުވީ، ބޭރުގެ ނުފޫޒުތަކާ ގުޅިގެން އީރާނުގެ ރައްޔިތުންނަށް އަމާޒުކޮށް ހަތިޔާރު ބޭނުންކޮށްގެން ހަމަލާދޭ އަދި ރޭވުންތެރިކަމާއެކު ފަސާދަ އުފައްދާ ފަރާތްތަކަށް "އެންމެ ހަރުކަށި އިބާރާތުން" ރައްދު ދިނުމަށް ސަލާމަތީ ބާރުތަކާއި ފަނޑިޔާރުގެތައް އޮތީ ތައްޔާރަށް ކަމަށެވެ.

ހުކުރު ދުވަހު ދެއްވި ޓީވީ އިންޓަވިއުއެއްގައި ލާރިޖާނީ ވިދާޅުވީ، އާންމު ރައްޔިތުންނަށް ގެއްލުމެއް ނުވާނެހެން ކަންކަން ބެލެހެއްޓުމަށް ސަލާމަތީ ބާރުތަކަށް އިރުޝާދު ދީފައިވާ ކަމަށެވެ. ނަމަވެސް، ހަތިޔާރާއެކު ނުވަތަ އީރާނުގެ ދާޚިލީ ކަންކަމުގެ ތެރެއަށް ވަދެގަތުމުގެ ނިޔަތުގައި މަސައްކަތްކުރާ ގުރޫޕުތަކާ ދެކޮޅަށް ވަރުގަދަ ފިޔަވަޅުތަކެއް އަޅާނެ ކަމަށް އޭނާ ވިދާޅުވި އެވެ.

އީރާނުން ބުނަމުން ގެންދަނީ މިހާރު އެ ގައުމުގައި ހިނގަމުންދާ މުޒާހަރާ ތަކަކީ އިޒްރޭލާއި އެމެރިކާ އަޑީގައި އޮވެގެން އީރާނު ނުރައްކަލުގެ ތެރެއަށް ވައްޓާލުމަށް ހިންގާ ކަމެއް ކަމުގައެވެ.

އިޒްރާލާއި އެމެރިކާ އިން ޖޫން މަހު އީރާނާ ދެކޮޅަށް ކުރި 12 ދުވަހުގެ ހަނގުރާމައިގައި ރައްޔިތުން ދެއްކި ސާބިތުކަން މިހާރުވެސް ދެމެހެއްޓުމަށް ލަރިޖާނީ ގޮވާލެއްވި އެވެ. އީރާނުގެ ދުޝްމަނުން މިހާރު އަމާޒު ހިފާފައިވަނީ މީގެ ކުރިން ގައުމުގެ ވަރުގަދަކަން ދެއްކި އަސާސްތައް ބަލިކަށިކޮށްލުމަށް ކަމަށް ވެސް އޭނާ ވިދާޅުވި އެވެ.

"އަޅުގަނޑުމެންގެ ލޮބުވެތި ރައްޔިތުން ހޭލުންތެރިވާންޖެހޭ، ދުޝްމަނުން މި އަމާޒުކުރަނީ ހަނގުރާމައިގެ ތެރޭގައި ގައުމަށް ލިބުނު ކާމިޔާބީ އާއި ބާރުގެ އަސްލު ކަމުގައިވާ ކަންކަމަށް،" އެއްބައިވަންތަކަމަށް ގޮވާލައްވަމުން އޭނާ ވިދާޅުވިއެވެ.

ގައުމީ އަދި ދީނީ ރަމްޒުތަކަށް ހަމަލާދިނުން

ފަސާދަ އުފައްދާ ފަރާތްތަކުން އީރާނުގެ ގައުމީ އަދި ދީނީ ވަހުދަތުގެ ރަމްޒުތަކަށް ހަމަލާދެމުންދާކަން ލާރިޖާނީ ފާހަގަކުރެއްވި އެވެ. މީގެ ތެރޭގައި އިސްލާމީ ޖުމްހޫރިއްޔާގެ ދިދަ އަންދާލުމާއި، 2020 ވަނަ އަހަރު އެމެރިކާ އިން އަވަހާރަކޮށްލި އީރާނުގެ އަސްކަރީ ކޮމާންޑަރު ޖެނެރަލް ގާސިމް ސުލައިމާނީ ފަދަ ގައުމީ ބަތަލުންގެ ހަނދާނީ ބިނާތަކަށް ގެއްލުން ދިނުން ހިމެނެ އެވެ.

"އެމީހުން ބޭނުން ވަނީ ގައުމީ ފަޚުރު ދުއްވާލަން،" ކީރިތި ގުރުއާން އަންދާލުމާއި މިސްކިތްތަކަށް ހަމަލާދިނުން ފަދަ ނާތަހުޒީބު އަމަލުތައް ފާހަގަކުރައްވަމުން އޭނާ ވިދާޅުވިއެވެ. މިފަދަ އަމަލުތަކަކީ ގައުމުގެ ބާރުގެ އަސްލު ކަމަށްވާ ދީނީ އަދި ގައުމީ އަސާސްތައް ބަލިކަށިކޮށްލުމަށް ހިންގާ ކަންކަމުގެ ގޮތުގައި އޭނާ ސިފަކުރެއްވި އެވެ.

މި ހަމަނުޖެހުންތަކަކީ އިގްތިސާދީ ދަތިތަކާ ގުޅިފައިވާ ކަންކަން ކަމަށް ބުނާ ބުނުންތައް އޭނާ ދޮގުކުރެއްވި އެވެ. ފިހާރަތައް ލޫޓުވުމާއި އަންދާލުމަކީ އިގްތިސާދީ މައްސަލަތަކުގެ ސަބަބުން ކުރާ ކަންކަން ނޫން ކަމަށާއި، އެއީ އެހެން މަގްސަދެއްގައި ކުރާ ކަންކަން ކަމަށް އޭނާ ވިދާޅުވި އެވެ. "އިގްތިސާދީ ދަތިކަމެއް ހުންނަ މީހަކު ފިހާރަތަކެއް ލޫޓުވާކަށް ނޫޅޭނެ،" އޭނާ ވިދާޅުވި އެވެ.

މުޒާހަރާގެ ފަހަތުގައި އިޒްރޭލު

މި ހަމަނުޖެހުންތަކަކީ އީރާނާ ދެކޮޅަށް ސީދާ އަސްކަރީ ހަމަލާއެއް ދިނުމުގެ ބަދަލުގައި، ގައުމުގެ އެތެރޭގައި ތިބި ބަޔަކު ބޭނުންކޮށްގެން ގައުމު ހަލާކުކޮށްލުމަށް އިޒްރޭލުގެ އިސްވެރިން މީގެ ކުރިން ދައްކާފައިވާ ވާހަކަތަކާ ގުޅިފައިވާ ކަމެއް ކަމަށް ލާރިޖާނީ ވިދާޅުވި އެވެ. ހަތިޔާރު އެޅި މި ޖަމާއަތްތަކުން އަމާޒުކުރާ ތަންތަނަށް ބަލާއިރު، މިއީ ހަމައެކަނި އިގްތިސާދީ ޝަކުވާ އެއް ނޫންކަން ހާމަވާ ކަމަށް ވެސް އޭނާ ވިދާޅުވިއެވެ.

ލާރިޖާނީ ވިދާޅުވި ގޮތުގައި، ހަމަނުޖެހުން ހިންގުމުގައި އިސްކޮށް އުޅޭ މީހުން މިހާރު ވަނީ ދެނެގަނެވިފައެވެ. އޭގެ ތެރެއިން ބައެއް މީހުން ހައްޔަރުކޮށްފައިވާއިރު، އަނެއް ބަޔަކު ހައްޔަރުކުރުމުގެ މަސައްކަތް ދަނީ ކުރަމުންނެވެ. އަދި މި ހަމަނުޖެހުންތަކުގެ ތެރެއިން ޖީ-3 މަރުކާގެ ބަޑި އާއި، ފިސްތޯލަ އާއި އެހެނިހެން ހަތިޔާރުތައް ފެނިފައިވާ ކަމަށާއި، މިއީ ވަރަށް ބޮޑަށް ރޭވިގެން ހިންގާ ކަމެއްކަން ހާމަވާ ކަމަށް އޭނާ ވިދާޅުވި އެވެ.

އަސްކަރީ އަދި ގާނޫނު ތަންފީޒުކުރާ މަރުކަޒުތައް ހިފުމަށް ކުރި މަސައްކަތަކީ ދާޚިލީ ހަނގުރާމައެއް ފަށައި ބޭރުގެ ނުފޫޒުތަކަށް މަގުފަހިކުރުމަށް ކުރި ކަމެއް ނަމަވެސް، ސަލާމަތީ ބާރުތަކުގެ ތައްޔާރީތަކުގެ ސަބަބުން އެކަން ނާކާމިޔާބުވެފައިވާ ކަމަށް އޭނާ ވިދާޅުވި އެވެ.

މި ވާހަކަތައް މިދެއްކެވީ، އީރާނުގެ ރޫހީ ލީޑަރު އާޔަތުﷲ ސައްޔިދު އަލީ ޚާމަނާއީ، ފަސާދަ އުފެއްދުމާއި ބޭރުގެ އެހީގައި ހިންގާ ހަމަނުޖެހުންތަކަށް އީރާނުން ފުރުސަތު ނުދޭނެ ކަމަށް ތަކުރާރުކޮށް ވިދާޅުވެފައިވާ ދަނޑިވަޅެއްގަ އެވެ. ޚާމަނާއީ ވިދާޅުވީ، ގައުމުގައި ހަމަނުޖެހުން ހިންގާ ފަރާތްތަކުގެ ކުރިމަތީގައި އީރާނުން ފަހަތަށް ނުޖެހޭނެ ކަމަށާއި، ބޭރުގެ ބާރުތައް އުފާކޮށްދިނުމަށް ހިންގާ މިފަދަ ލާއިންސާނީ އަމަލުތައް ބަލައިނުގަނެވޭނެ ކަމަށެވެ. ނަމަވެސް، އިގްތިސާދީ މައްސަލަތަކާ ގުޅިގެން ކުރާ ސުލްހަވެރި އިހުތިޖާޖުތަކަކީ ކުރެވިދާނެ ކަންކަން ކަމަށް އެމަނިކުފާނު ފާހަގަކުރެއްވި އެވެ.