ވެނެޒުއެލާގެ ވަގުތީ ރައީސް އަކީ އޭނާ ކަމަށް ހާމަ ކުރައްވައިފި

ވެނެޒުއެލާގެ ވަގުތީ ރައީސް އަކީ އޭނާ ކަމަށް ބުނާ ފޮޓޯއެއް، އެމެރިކާގެ ރައީސް ޑޮނަލްޑް ޓްރަމްޕް އަމިއްލަފުޅަށް ޕޯސްޓު ކުރައްވައިފި އެވެ.

ޓްރަމްޕްގެ އަމުރުފުޅަށް އެމެރިކާގެ އަސްކަރިއްޔާ އިން ވަނީ ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކޮށްފަ އެވެ. މަދޫރޯ އާއި އޭނާގެ އަނބިކަނބަލުން އެމެރިކާ އިން ހައްޔަރު ކޮށްފައިވާއިރު، އެ ދެމަފިރިން މިހާރު ތިބީ އެމެރިކާގެ ހައްޔަރުގައި، ނިއު ޔޯކުގައި ހުންނަ ޖަލެއްގަ އެވެ. މަދޫރޯ އާއި އޭނާގެ އަނބިކަނބަލުންނާ ދެކޮޅަށް އެމެރިކާގައި ވަނީ ޝަރީއަތް ވެސް ފަށައިފަ އެވެ.

އެމެރިކާ އިން މަދޫރޯ ހައްޔަރު ކުރުމާ އެކު، އެ ޤައުމުގެ ސުޕްރީމް ކޯޓުން ވަނީ ވަގުތީ ރައީސް އަކީ މަދޫރޯގެ ނައިބު ރައީސް ޑެލްސީ ރޮޑްރިގޭޒް ކަމަށް ކަނޑައަޅައިފަ އެވެ. އެއާއެކު، ޑެލްސީ ވަނީ ވެނެޒުއެލާގެ ވަގުތީ ރައީސްގެ ހުވާ ކުރައްވައިފަ އެވެ. އަދި އިދާރީ ގޮތުންނާއި، ދިފާއީ ގޮތުން އަދި އެހެނިހެން ގޮތް ގޮތުން ވެނެޒުއެލާގެ ކަންކަން ކުރުމުގެ ޒިންމާ އޮތީ ޑެލްސީ އަށެވެ.

މަދޫރޯ ހައްޔަރު ކުރުމަށް ފަހު ޓްރަމްޕް ވިދާޅުވެފައި ވަނީ، ވެނެޒުއެލާގެ ކަންކަން ކުރިއަށް ގެންދާނީ އެމެރިކާ އިން ކަމަށެވެ. އެގޮތުން އެމެރިކާގެ ސަރުކާރުން ކަނޑައަޅާ ޓީމެއްގެ ބެލުމުގެ ދަށުން ވެނެޒުއެލާގެ ހިންގުން ކުރިއަށް ގެންދާނެ ކަމަށް ޓްރަމްޕް ވިދާޅުވެފައިވެ އެވެ. ހަމަ އެއާ އެކު، ވެނެޒުއެލާގެ ތެލުގެ ސިނާއަތް ކުރިއަށް ގެންދާނީ އެމެރިކާ އިން ކަމަށް ވެސް ޓްރަމްޕް ވިދާޅުވެފައިވެ އެވެ.

އެމެރިކާ އިން މަދޫރޯ ހައްޔަރު ކޮށްފައި ހުންނަތާ ހަފުތާ އަކަށް ވުރެ ގިނަ ދުވަސް ވެފައިވާއިރު، ހޯމަ ދުވަހު ޓްރަމްޕް ވަނީ ވެނެޒުއެލާގެ ވަގުތީ ރައީސް އަކީ އޭނާ ކަމަށް ބުނާ ފޮޓޯއެއް ޓްރަމްޕް ވަނީ، އޭނާގެ ޓުރުތު ސޯޝަލް މީޑިއާގައި އެ ފޮޓޯ ޕޯސްޓު ކުރައްވައިފަ އެވެ.

އެ ފޮޓޯގައި ލިޔެފައި ވަނީ، ވެނެޒުއެލާގެ ވަގުތީ ރައީސް އަކީ ޓްރަމްޕް ކަމަށެވެ. އެގޮތުން 2026 ވަނަ އަހަރުގެ ޖަނަވަރީ މަހުން ފެށިގެން ވެނެޒުއެލާގެ ވަގުތީ ރައީސް އަކީ ޓްރަމްޕް ކަމަށް ލިޔެފައިވެ އެވެ. ހަމަ އެހެންމެ، 2025 ވަނަ އަހަރުގެ ޖަނަވަރީ މަހުގެ 20 ވަނަ ދުވަހުން ފެށިގެން އެމެރިކާގެ ރައީސް ކަމުގައި ހުންނަވަނީ ޓްރަމްޕް ކަމަށް ވެސް ލިޔެފައިވެ އެވެ. އަދި އޭނާގެ ނައިބު ރައީސް ޖޭޑީ ވޭންސްގެ މައުލޫމާތު ވެސް ފޮޓޯގައި ފެންނަން ހުރެ އެވެ. 

މީގެ އިތުރުން ޓްރަމްޕް އަކީ އެމެރިކާގެ 45 ވަނަ އަދި 47 ވަނަ ރައީސް ކަމަށް ވެސް ލިޔެފައިވެ އެވެ. 

ޓްރަމްޕް މިފަދަ ޕޯސްޓެެއް ކުރައްވާފައިވާއިރު، މީގެ ކުރިން ވެސް އެކި އެކި ކަންކަމާ ގުޅޭ ގޮތުން ޓްރަމްޕް ވަނީ މި ބާވަތުގެ ޕޯސްޓު ކުރައްވައިފަ އެވެ. އެގޮތުން އެމެރިކާގެ ކުރީގެ ރައީސް ޖޯ ބައިޑަން އެއާ ފޯސް ވަން އަށް އަރާވަޑައިގެންނެވުމުގެ ތެރޭގައި ވެއްޓޭއިރު، އެ މަންޒަރު ހިމަނައިގެން ވެސް ޓްރަމްޕް ވަނީ ޕޯސްޓުތައް ކުރައްވައިފަ އެވެ.

ބައިނަލްއަޤުވާމީ މީޑިއާ ތަކުގައި ބުނެފައިވާ ގޮތުން ވެނެޒުއެލާގެ ވަގުތީ ސަރުކާރުން އަންނަނީ އެމެރިކާއާ އެކު މަސައްކަތް ކުރަމުންނެވެ.