ވެނެޒުއެލާގައި ތިބި އެމެރިކާގެ ރައްޔިތުން ވަގުތުން އެ ޤައުމުން ފޭބުމަށް އަންގައިފި

ވެނެޒުއެލާގައި ދިރި އުޅެމުން އަންނަ އެމެރިކާގެ ރައްޔިތުން، ވަގުތުން އެ ޤައުމުން ފޭބުމަށް އެމެރިކާ އިން އަންގައިފި އެވެ.

ހޮނިހިރު ދުވަހު އެމެރިކާގެ ސްޓޭޓް ޑިޕާޓްމަންޓް އިން ވަނީ، ވެނެޒުއެލާގައި ތިބި އެމެރިކާގެ އެންމެހާ ރައްޔިތުން ވަގުތުން އެ ޤައުމުން ފޭބުމަށް އިލްތިމާސް ކޮށްފަ އެވެ. ސްޓޭޓް ޑިޕާޓްމަންޓް އިން މިހެން އަންގާފައި ވަނީ، ވެނެޒުއެލާގެ ސިޓީ ތަކުގައި ހަތިޔާރު އެޅި އޮފިޝަލުން އެމެރިކާގެ ރައްޔިތުން ހޯދަމުން އަންނަ ކަމަށް ބުނެ އެވެ. އެކަމުގެ ސަބަބުން އެމެރިކާގެ ރައްޔިތުންނަށް ނުރައްކަލެއް ކުރިމަތި ވެދާނެތީ، ސްޓޭޓް ޑިޕާޓްމަންޓް އިން ވަނީ އެކަން އަންގައިފަ އެވެ.

ސަލާމަތީ އެލާޓެއްގައި ސްޓޭޓް ޑިޕާޓްމަންޓް އިން ބުނީ، ވެނެޒުއެލާގެ ސަލާމަތީ ޙާލަތު މިހާރު ވެސް އޮތީ ބަދަލު ވަމުން އަންނަ ޙާލަތެއްގައި ކަމަށެވެ. އެމެރިކާ އިން މިހެން އަންގާފައިވާއިރު، އެ ޤައުމުގެ އަސްކަރިއްޔާ އިން ހިންގި ޚާއްސަ އޮޕަރޭޝަނެއްގައި ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކޮށްފައި ހުންނަތާ މިހާރު ހަފުތާ އެއް ވެއްޖެ އެވެ. 

މީގެ އިތުރުން ސްޓޭޓް ޑިޕާޓްމަންޓް އިން ބުނެފައި ވަނީ، ވެނެޒުއެލާ ގައި ބައިނަލްއަޤުވާމީ ފްލައިޓުތައް އަލުން ފަށާފައިވާތީ، އެ ޤައުމުގައި ތިބި އެމެރިކާގެ ރައްޔިތުން ވަގުތުން ފޭބުމަށް އެދޭ ކަމަށެވެ. ސްޓޭޓް ޑިޕާޓްމަންޓް އިން ވަނީ އެކަމަކީ ވަރަށް މުހިންމު ކަމެއްގެ ގޮތުގައި ފާހަގަ ކޮށްފަ އެވެ. 

މި ޙާލަތު މެދުވެރިވެފައި ވަނީ، ވެނެޒުއެލާ ގައި ސިޔާސީ ހަމަ ނުޖެހުން އިތުރުވެ، އެ ޤައުމުގެ ސަރުކާރާއި އެމެރިކާއާ ދެމެދު ގުޅުން އިތުރަށް ގޯސްވެފައިވާ ދަނޑިވަޅެއްގަ އެވެ. އެމެރިކާ އިން ވެނެޒުއެލާގެ ރައީސް މަދޫރޯ ހައްޔަރު ކުރި ފަހުން، މަދޫރޯގެ ސަރުކާރަށް ތާއީދު ކުރާ ވެނެޒުއެލާގެ ބައެއް ރައްޔިތުން އަންނަނީ އެ ޤައުމުގައި އުޅޭ އެމެރިކާ އާއި އެހެން ޤައުމު ތަކުގެ ރައްޔިތުންނަށް އަމާޒުކޮށް ނުރައްކާތެރި ކަންތައް ތަކެއް ހިންގަމުންނެވެ. 

މީގެ އިތުރުން މާހިރުން ފާހަގަ ކޮށްފައިވާ ގޮތުގައި، ވެނެޒުއެލާގެ ސަލާމަތީ ޙާލަތު އިތުރަށް ގޯސްވެފައިވާއިރު، އެ ޤައުމުގައި ތިބި އެހެން ޤައުމު ތަކުގެ ރައްޔިތުންނަށް މިހާރު އިތުރު ނުރައްކާތެރި ކަމެއް ކުރިމަތި ވެދާނެ ކަމަށެވެ. ޚާއްސަކޮށް އެމެރިކާގެ ރައްޔިތުންނަށް އޮތް ނުރައްކާ އިތުރުވެފައިވާ ކަމަށާއި، އެ މީހުން ވީހާ ވެސް އަވަހަށް ސަލާމަތް ހޯދުން މުހިންމު ކަމަަށް ވަނީ ފާހަގަ ކޮށްފަ އެވެ. 

އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް، އެމެރިކާގެ އަސްކަރިއްޔާ އިން ވަނީ މަދޫރޯ އާއި އޭނާގެ އަނބިކަނބަލުން ހައްޔަރު ކޮށްފަ އެވެ. މިވަގުތު އެ ދެމަފިރުން އެމެރިކާގެ ބެލުމުގެ ދަށުގައި ތިބިއިރު، އެމެރިކާގައި ދެމަފިރިންގެ މައްޗަށް ވަނީ ޝަރީއަތް ފަށައިފަ އެވެ.