މަސްތުވާތަކެއްޗާ ދެކޮޅަށް ކަނޑުމަތީގައި ދިން ހަމަލާތަކަށް ފަހު އެއްގަމު މަގުން ހަމަލާތައް ދޭން އެމެރިކާ އިން ތައްޔާރު ވެއްޖެ ކަމަށް ޓްރަމްޕް ވިދާޅުވެއްޖެ
ވެނެޒުއޭލާ އަށް އަމާޒު ކޮށް ހިންގި އަސްކަރީ ހަމަލާތަކުގައި 100 އަށްވުރެ ގިނަ މީހުން މަރުވެފައިވާއިރު މެކްސިކޯގެ ކަންކަން ކޮންޓްރޯލް ކުރަނީ ކާޓެލްތަކުން ކަމަށް ޓްރަމްޕް ވިދާޅުވެ އެއްގަމު މަގުން ހަމާލާތައް ދިނުމަށް މެކްސިކޯގެ ރައީސްގެ ކިބައިން އެދިފައިވާނެ ކަމަށް ޓްރަމްޕް ވިދާޅުވި އިރު މެކްސިކޯގެ ރައީސް ވިދާޅުވީ އެމެރިކާ ބައްރަކީ އެއްވެސް ބާރެއްގެ މިލްކެއް ނޫން ކަމަށާއި ސިފައިން ފޮނުވުމަށް ހުއްދައެއް ނުދެއްވާނެ ކަމަށް.
މެކްސިކޯގެ ނޭޝަނަލް ގާޑް އޮފިސަރުން އެމެރިކާ-މެކްސިކޯ ބޯޑަރުގެ ކައިރީގައި ހިންގާ އޮޕަރޭޝަނެއް ގައި ހަރަކާތްތެރިވަނީ (ފައިލް) | ގެޓީ އިމޭޖަސް
މަސްތުވާތަކެއްޗާ ދެކޮޅަށް އެމެރިކާ ސިފައިން ކަނޑުމަތީގައި ދިން ހަމަލާތަކަށް ފަހު އެއްގަމު މަގުން ހަމަލާތައް ދޭން އެމެރިކާ އިން ތައްޔާރު ވެއްޖެ ކަމަށް ޓްރަމްޕް ވިދާޅުވެއްޖެ އެވެ.
އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު ވިދާޅުވީ، އިރުމަތީ ޕެސިފިކް ކަނޑާއި ކެރީބިއަން ކަނޑުގައި ހިންގި ކަނޑުމަތީގެ ހަމަލާތަކަށްފަހު، މަސްތުވާތަކެތި އުފައްދާ ޖަމާއަތްތަކަށް (ކާޓެލްތަކަށް) އަމާޒުކޮށް އެއްގަމު މަގުން ހަމަލާތައް ދިނުމަށް ތައްޔާރުވަމުންދާ ކަމަށެވެ. ނަމަވެސް މިކަމާ ގުޅޭ އިތުރު ތަފްސީލެއް އޭނާ ހާމައެއް ނުކުރައްވައެވެ.
ފޮކްސް ނިއުސް އަށް ދެއްވި އިންޓަވިއުއެއްގައި ޓްރަމްޕް ވިދާޅުވީ، "އަހަރެމެން މިހާރު މިދަނީ އެއްގަމު މަގުން ކާޓެލްތަކަށް ހަމަލާދޭން ފަށަން. މެކްސިކޯގެ ކަންކަން ކޮންޓްރޯލް ކުރަމުންދަނީ މި ކާޓެލްތަކުން،" ކަމަށެވެ.
ޓްރަމްޕް މިހެން ވިދާޅުވީ، އެމެރިކާ އިން ކުރިމަތި ކުރަމުން ގެންދިޔަ އަސްކަރީ އަދި އިގްތިސާދީ ފިއްތުންތަކަށްފަހު، ވެނެޒުއޭލާގެ ލީޑަރު ނިކޮލަސް މަދޫރޯ މިދިޔަ ހަފުތާ ބަންދުގައި ކުއްލި ގޮތަކަށް އެމެރިކާ ސިފައިން ހައްޔަރު ކޮށްފައިވަނިކޮށްނެވެ.
މި ހަރަކާތުގެ ދަށުން، މިދިޔަ ސެޕްޓެމްބަރު މަހުން ފެށިގެން މަސްތުވާތަކެތި އުފުލާކަމަށް ތުހުމަތުކުރެވޭ ބޯޓުތަކަށް ދިން ހަމަލާތަކުގައި 100 އަށްވުރެ ގިނަ މީހުން ވަނީ މަރުވެފައެވެ. އަދި ވެނެޒުއޭލާގައި މިފަދަ އުޅަނދުފަހަރު ބަނދަރުކުރާ ސަރަހައްދަކަށް އެމެރިކާގެ ފައުޖުތަކުން އެއްގަމު މަގުން ހަމަލާދީފައިވާ ކަމަށް ވެސް ޓްރަމްޕް ވިދާޅުވިއެވެ.
ނަމަވެސް، މެކްސިކޯގެ ކާޓެލްތަކަށް އެއްގަމު މަގުން ހަމަލާދިނުމަކީ އެމެރިކާގެ އަސްކަރީ ހަރަކާތްތައް ވަރަށް ބޮޑަށް ފުޅާވެގެންދާނެ ކަމެކެވެ.
ވެނެޒުއޭލާގެ ވަގުތީ ސަރުކާރުން ވަނީ އެމެރިކާ އިން އެގައުމަށް ދޭ ހަމަލާތަކަކީ ސަރަހައްދީ ހަމަޖެހުމަށް އޮތް ނުރައްކަލެއް ކަމަށް ބުނެ އެކަން ކުށްވެރިކޮށްފައެވެ.
މަދޫރޯ ހައްޔަރުކުރުމަށްފަހު، އެ ސަރަހައްދުގެ މައްޗަށް އެމެރިކާގެ ބާރު އޮތްކަމަށް ޓްރަމްޕް ވިދާޅުވުމާ ގުޅިގެން، މެކްސިކޯގެ ރައީސް ކްލައުޑިއާ ޝެއިންބައުމް ހޯމަ ދުވަހު ވިދާޅުވީ އެމެރިކާ ބައްރަކީ އެއްވެސް ބާރެއްގެ މިލްކެއް ނޫން ކަމަށެވެ.
މީގެއިތުރުން، މެކްސިކޯގެ ކާޓެލްތައް ނައްތާލުމަށް އެމެރިކާގެ ސިފައިން ފޮނުވުމުގެ ހުއްދައަށް ޝެއިންބައުމްގެ ކިބައިން އެދިވަޑައިގަންނަވަމުންދާ ކަމަށާއި، ނަމަވެސް މީގެ ކުރިން އޭނާ އެ ހުށަހެޅުމަށް އިންކާރު ކުރައްވާފައިވާ ކަމަށް ޓްރަމްޕް އާދިއްތަ ދުވަހު ވިދާޅުވި އެވެ.
