އޮލީނާ ނަމަކަށް ކިޔާ ތެޔޮ ޓޭންކަރެއް އެމެރިކާ ސިފައިންގެ ބާރުގެ ދަށަށް ގެނެސްފި

ވެނެޒުއޭލާގެ ތެޔޮ ބޭރުކުރުން ކޮންޓްރޯލް ކުރުމަށް އެމެރިކާ ސަރުކާރުން ކުރަމުންދާ މަސައްކަތްތަކުގެ ދަށުން، ކެރީބިއަން ކަނޑުގެ ޓްރިނިޑާޑް ސަރަހައްދުން 'އޮލީނާ' ނަމަކަށް ކިޔާ ތެޔޮ ޓޭންކަރެއް އެމެރިކާގެ ބާރުގެ ދަށަށް ގެނެސްފި ކަމަށް ޔޫއެސް ސަދާން ކޮމާންޑުން ބުނެފި އެވެ. މިއީ ފާއިތުވި މަދު ހަފުތާތަކެއްގެ ތެރޭގައި މިފަދަ ގޮތަކަށް އެމެރިކާ އިން ހިފަހައްޓާ ފަސްވަނަ އުޅަނދެވެ.

"މިއަދު ހެނދުނު މުއައްސަސާތައް ގުޅިގެން ހިންގި އޮޕަރޭޝަނުން އަނެއްކާވެސް މިވަނީ ސާފު މެސެޖެއް ދީފައެވެ. އެއީ ކުށްވެރިންނަށް ފިލައިގެން އުޅެވޭނެ ނުވަތަ ރައްކާތެރިކަން ލިބޭނެ އެއްވެސް ތަނެއް ނެތް ކަމުގެ މެސެޖެވެ." ސަދާން ކޮމާންޑުން ބުނެފައިވެ އެވެ.

ހުކުރު ދުވަހުގެ ހެނދުނު "އެކްސް" ގައި ކުރި ޕޯސްޓެއްގައި ސަދާން ކޮމާންޑުން އިތުރަށް ބުނެފައި ވަނީ، އެމެރިކާގެ ހޯމްލޭންޑް ސެކިއުރިޓީއާ ގުޅިގެން އެގައުމުގެ މެރިންސް އަދި ކަނޑުގެ ސިފައިން "އޮލީނާ" ނަމަކަށް ކިޔާ ތެޔޮ ޓޭންކަރެއް ހިފަހައްޓާފައިވާ ކަމަށެވެ.

ހޯމްލޭންޑް ސެކިއުރިޓީ ސެކްރެޓަރީ ކްރިސްޓީ ނޯމް ވިދާޅުވި ގޮތުގައި، "އޮލީނާ" އަކީ މަނާކޮށްފައިވާ ތެޔޮ އުފުލާ ކަމަށް ޝައްކުކުރެވޭ، ސިއްރުން ދަތުރުކުރާ އުޅަނދުފަހަރުގެ ތެރޭގައި ހިމެނޭ އުޅަނދެކެވެ. އަދި މި އުޅަނދު ހިފެހެއްޓީ އެމެރިކާގެ ސިފައިންނަށް ފިލައިގެން ވެނެޒުއޭލާ އިން ފުރައިގެން ދަނިކޮށެވެ. މި އުޅަނދަކީ އެތައް ގައުމެއްގެ ދަތިކުރުމުގެ ފިޔަވަޅުތަކުގެ ލިސްޓުގައި ހިމެނޭ އުޅަނދެކެވެ.

ކަނޑު ދަތުރުފަތުރުކުރާ އުޅަނދުފަހަރުގެ މަޢުލޫމާތު ބަލަހައްޓާ 'އިކުއަސިސް' ޑޭޓާބޭސް އާ ހަވާލާދީ، މިކަމުގެ މަޢުލޫމާތު އެނގޭ ފަރާތަކުން ރޮއިޓާސް އަށް ބުނި ގޮތުގައި، 'އޮލީނާ' ޓޭންކަރުގައި ބޭނުންކޮށްފައި ވަނީ ޓީމޯރ ލެސްޓޭގެ ދިދަ ނަމަވެސް، އެއީ އޮޅުވާލުމެއްގެ ތެރެއިން ބޭނުންކޮށްފައިވާ ދިދައެކެވެ. 

ކަނޑުދަތުރުފަތުރުގެ ނުރައްކާތައް ދިރާސާކުރާ ކުންފުންޏެއް ކަމަށްވާ "ވެންގާޑް ޓެކް" އިން ބުނި ގޮތުގައި، މި އުޅަނދު މަސައްކަތް ކުރީ ކެރީބިއަން ސަރަހައްދުގައި އެމެރިކާގެ ކަނޑުގެ ސިފައިން އަޅާފައިވާ ހުރަސްތައް ގިރާކޮށް ދަތުރުކުރުމަށެވެ. އެ ކުންފުނިން އިތުރަށް ބުނި ގޮތުގައި، މި އުޅަނދުގެ ލޮކޭޝަން ޓްރެކާ އެންމެ ފަހުން މަސައްކަތް ކޮށްފައި ވަނީ މީގެ 52 ދުވަސް ކުރިން ކިއުރަސާއޯގެ އިރުއުތުރުންނެވެ. މިއީ ވެނެޒުއޭލާގެ މަނާކޮށްފައިވާ ތެޔޮ އުފުލާ އުޅަނދުފަހަރު ހޯދުމަށް އެ ސަރަހައްދުގައި ގިނަ ދުވަސްތަކެއް ވަންދެން ކުރި މަސައްކަތުގެ ތެރެއިން ހިފެހެއްޓި އުޅަނދެކެވެ.

މި ހަފުތާގެ ކުރީކޮޅުވެސް، އުތުރު އެޓްލާންޓިކް އަދި ކެރީބިއަން ސަރަހައްދުގައި ހިންގި ހާއްސަ އޮޕަރޭޝަންތަކެއްގައި ވެނެޒުއޭލާގެ ތެޔޮ ބޭރުކުރުމާ ގުޅުން ހުރި އިތުރު ދެ ޓޭންކަރެއް އެމެރިކާ އިން ވަނީ ހިފަހައްޓާފަ އެވެ. އޭގެ ތެރޭގައި ހިމެނޭ ރަޝިޔާގެ ދިދަ ޖަހާފައިވާ "މެރިނޭރާ" ހިފަހައްޓާފައި ވަނީ އިނގިރޭސިވިލާތުގެ ރޯޔަލް ނޭވީގެ އެހީތެރިކަމާއެކުގަ އެވެ. އެމެރިކާގެ ކަމާބެހޭ ފަރާތްތަކުން ތުހުމަތުކުރާ ގޮތުގައި، ދެވަނައަށް ހިފެހެއްޓި "އެމް.ޓީ ސޯފިއާ" އަކީ ޣައިރު ގާނޫނީ ހަރަކާތްތަކެއް ހިންގަމުންދިޔަ އުޅަނދެކެވެ.

ދުނިޔޭގެ އެންމެ ބޮޑު ތެޔޮ ރިޒާވް އޮންނަ ވެނެޒުއޭލާ އިން، ގާތްގަނޑަކަށް 2.8 ބިލިއަން ޑޮލަރުގެ އަގުހުރި 50 މިލިއަން ފީފާ ތެޔޮ އެމެރިކާއާ ހަވާލުކުރާނެ ކަމަށް ރައީސް ޑޮނަލްޑް ޓްރަމްޕް ވަނީ ވިދާޅުވެފަ އެވެ. ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި، މި ތެޔޮ ބާޒާރުގެ އަގުގައި ވިއްކާލުމަށްފަހު، އޭގެއިން ލިބޭ ފައިސާ ވެނެޒުއޭލާގެ ރައްޔިތުންނަށް ފައިދާވާނެ ގޮތަކަށް ބޭނުންކުރުމުގެ ފުރިހަމަ ބާރު އެމެރިކާ އަށް އޮންނާނެ އެވެ.