މަދޫރޯ ހުންނެވީ ގަދަކޮށް: ދަރިކަލުން

އެމެރިކާ އިން ހައްޔަރު ކޮށްފައިވާ ވެނެޒުއެލާގެ ރައީސް ނިކޮލަސް މަދޫރޯ އާއި، އޭނާގެ އަނބިކަނބަލުން ސިލިއާ ފްލޯރެސް ހުންނެވީ ގަދަކޮށް ކަމަށް، މަދޫރޯގެ ދަރިކަލުން ވިދާޅުވެއްޖެ އެވެ.

އެމެރިކާގެ ރައީސް ޑޮނަލްޑް ޓްރަމްޕްގެ އަމުރުފުޅަށް އެމެރިކާގެ އަސްކަރިއްޔާ އިން ވަނީ މަދޫރޯ އާއި އޭނާގެ އަނބިކަނބަލުން ހައްޔަރު ކޮށްފަ އެވެ. އޭގެ ފަހުން ހަފުތާއެއް ވެފައިވާއިރު، އެމެރިކާގައި ވަނީ މަދޫރޯ އާއި އޭނާގެ އަނބިކަނބަލުންނާ ދެކޮޅަށް ޝަރީއަތް ވެސް ފަށައިފަ އެވެ. 

ހޮނިހިރު ދުވަހު މަދޫރޯގެ ދަރިކަލުން އާންމު ކުރި ވީޑިއޯއެއްގައި ވިދާޅުވެފައި ވަނީ މަދޫރޯ ހުންނެވީ ގަދަކޮށް ކަމަށެވެ. ޤާނޫނީ ވަކީލެއްގެ ގޮތުގައި ވެސް މަސައްކަތް ކުރައްވާ ދަރިކަލުން ވަނީ މަދޫރޯއާ ހަވާލާދީ ވާހަކަ ހިއްސާ ކުރައްވައިފަ އެވެ. އެގޮތުން "އަހަރަމެން ރަނގަޅު، އަހަރަމެންނަކީ ފައިޓާސް" ކަމަށް މަދޫރޯ ވިދާޅުވެފައިވާ ކަމަށް ހާމަ ކޮށްފައިވެ އެވެ. 

މިއީ މަދޫރޯ ހައްޔަރު ކުރި ފަހުން، އޭނާގެ ފަރާތުން ރަސްމީކޮށް އެއްޗެއް ހާމަ ކޮށްފައިވާ ފުރަތަމަ ފަހަރެވެ. އެމެރިކާގެ އެންމެ ބޮޑު ސިޓީ، ނިއު ޔޯކް ސިޓީގެ ޖަލެއްގައި މަދޫރޯ ބަންދު ކޮށްފައިވާއިރު، އޭނާގެ މައްސަލައިގެ އަޑު އެހުމަށް ދެން އޮތީ މާޗު މަހުގެ ތެރޭގަ އެވެ. މަދޫރޯ އާއި އޭނާގެ އަނބިކަނބަލުން ބަންދު ކޮށްފައި ތިބީ ނުރައްކާތެރި ޖަލެއްގައި ކަމަށް މީގެ ކުރިން ވަނީ ރިޕޯޓު ކޮށްފަ އެވެ. 

އެމެރިކާ އިން މަދޫރޯ އާއި އޭނާގެ އަނބިކަނބަލުންނާ ދެކޮޅަށް ކޮށްފައި ވަނީ މަސްތުވާ ތަކެތީގެ ވިޔަފާރި ކުރުމުގެ ދައުވާ އެވެ. މަދޫރޯ ހައްޔަރު ކުރުމުގެ ކުރިން ވެސް އެމެރިކާ އިން އެ ތުހުމަތުތައް ކޮށްފައިވާއިރު، ތަކުރާރުކޮށް މަދޫރޯ ގެންދެވީ އެ ތުހުމަތު ތަކަށް އިންކާރު ކުރައްވަމުންނެވެ. 

އެމެރިކާ އިން މަދޫރޯ ހައްޔަރު ކުރުމާ އެކު، މަދޫރޯގެ ނައިބު ރައީސް ޑެލްސީ ރޮޑްރިގޭޒް ވަނީ ވެނެޒުއެލާގެ ވަގުތީ ރައީސް ކަމުގެ ހުވާ ކުރައްވައިފަ އެވެ. ދުނިޔޭގެ އެތައް ޤައުމަކުން ވަނީ މަދޫރޯ ހައްޔަރު ކުރުމުގައި އެމެރިކާ އިން ހިންގި ކަންތައްތައް ކުށްވެރިކޮށްފަ އެވެ. އޭގެ ތެރޭގައި އެމެރިކާގެ ޒަމާންވީ ރަޙުމަތްތެރިން ވެސް ހިމެނެ އެވެ.