ލަންޑަނުގައި ހުންނަ އީރާނު އެމްބަސީ ގައި ނަގާފައި ހުރި އެ ގައުމުގެ ރަސްމީ ދިދަ ބަދަލު ކުރި މައްސަލައިގައި އިނގިރޭސި ސަފީރު އީރާނުގެ ޚާރިޖިއްޔާ އަށް ހާޒިރު ކޮށްފި

ލަންޑަނުގައި ހުންނަ އީރާނުގެ އެމްބަސީ އަށް، އެ ގައުމާ ދެކޮޅު ބަޔަކު ވަދެގަނެ އެ ގައުމުގެ ރަސްމީ ދިދަ ނަގައި އޭގެ ބަދަލުގައި ސިންގާ އަކާއި އިރެއް ޖަހާފައިވާ ދިދަ އެއް ހަރުކޮށް ހިންގި ހަމަނުޖެހުންތަކާ ގުޅިގެން، ތެހެރާނުގައި ހުންނަވާ އިނގިރޭސި ސަފީރު އީރާނުގެ ފޮރިން މިނިސްޓްރީ އަށް ހާޒިރުކޮށްފި އެވެ.

އީރާނުގެ ޚާރިޖީ ވުޒާރާގެ ވެސްޓަން ޔޫރަޕް ޑިޕާޓްމަންޓުގެ ޑިރެކްޓަރ ޖެނެރަލް، އިނގިރޭސި ސަފީރު ހާޒިރުކުރެއްވީ އާދީއްތަ ދުވަހު އެވެ. މި ހާޒިރުކުރުމަކީ ލަންޑަނުގައި ހުންނަ އީރާނުގެ އެމްބަސީއަށް ދިން ހަމަލާއާއި، އެ ތަނުގައި ހުރި އީރާނުގެ ދިދައަށް އިހާނެތިކޮށް ހިތުމާ ގުޅިގެން އެކަމާ ދެކޮޅަށް ރަސްމީކޮށް އިހުތިޖާޖު ކުރުމަށެވެ.

އީރާނުގެ އޮފިޝަލް އަލީރިޒާ ޔޫސުފީ ވަނީ، އެމްބަސީގެ ސަލާމަތާއި ރައްކާތެރިކަން ކަށަވަރުކޮށްދިނުމުގަ އާއި، ގާނޫނާ ޚިލާފުވި ފަރާތްތަކާ ދެކޮޅަށް ފިޔަވަޅު އެޅުމުގައި އިނގިރޭސި ފުލުހުން ފެއިލްވެފައިވާތީ އެކަން ހަރުކަށި އިބާރާތުން ކުށްވެރިކުރައްވާފަ އެވެ. އަދި އިނގިރޭސިވިލާތުގައި ހުންނަ އީރާނުގެ އެމްބަސީ އާއި، އެ ތަނުގެ ޑިޕްލޮމެޓުންނާއި މުވައްޒަފުންގެ ސަލާމަތްތެރިކަން ބެލެހެއްޓުމަކީ ބައިނަލްއަގުވާމީ އުސޫލުތަކުގެ ދަށުން އިނގިރޭސި ސަރުކާރުން އުފުލަންޖެހޭ ޒިންމާއެއްކަން ސަފީރަށް ހަނދާންކޮށްދެއްވި އެވެ.

މީގެ އިތުރުން، މީޑިއާގެ ނަމުގައި ހަރަކާތްތެރިވަމުން، އީރާނުގެ ރައްޔިތުންނާ ދެކޮޅަށް ދޮގު މައުލޫމާތު ފަތުރައި، އަނިޔާވެރިކަމާއި ޓެރަރިޒަމަށް ހިތްވަރުދޭ ޓެރަރިސްޓް ޖަމާއަތްތަކުން ހިންގާ ހަރަކާތްތަކާ މެދު ވެސް ޔޫސުފީ ވަނީ ވަރަށް ބޮޑަށް ނުރުހުން ފާޅުކުރައްވާފަ އެވެ.

ޓެރަރިޒަމަށް ފަންޑުކުރުމާއި އެފަދަ ހަރަކާތްތައް ރޭވުން ހުއްޓުވުމަށް ބައިނަލްއަގުވާމީ ގާނޫނުތަކުގެ ދަށުން އިނގިރޭސިވިލާތުން ވެފައިވާ އިލްތިޒާމްތަކާ އެއްގޮތަށް އަމަލުކުރުމަށް އީރާނުގެ އޮފިޝަލް ގޮވާލެއްވި އެވެ. އަދި ޓެރަރިޒަމަށް ހިތްވަރުދޭ މީޑިއާ ވަސީލަތްތަކުގެ ހަރަކާތްތައް ހުއްޓުވުމަށް ލަންޑަނުން އަޅަންޖެހޭ ފިޔަވަޅުތައް އެޅުމަށް އޭނާ ބާރުއެޅުއްވި އެވެ.

އީރާނުގެ ޚާރިޖީ މަންދޫބު ވަނީ އިނގިރޭސި ފޮރިން ސެކްރެޓަރީ އީރާނުގެ ދާޚިލީ ކަންކަމާ ބެހޭގޮތުން ދާދިފަހުން ދެއްކެވި ވާހަކަފުޅުތަކަކީ ކަންކަމާ ބެހިގަތުން ކަމަށް ސިފަކުރައްވައި އެކަން ވެސް ކުށްވެރިކުރައްވާފަ އެވެ.

މަންޒަރުތަކުން ފެންނަ ގޮތުގައި މީހަކު ވަނީ ލަންޑަނުގައި ހުންނަ އީރާނުގެ އެމްބަސީގެ އިމާރާތައް އަރާ އެތަނުގައި ނަގާފައި ހުރި ދިދަައިގެ ބޭލުމަށްފަހު އިސްލާމީ އިންގިލާބުގެ ކުރިން އީރާނުގައި ބޭނުން ކުރަމުން އައި ސިންގާ އަކާއި އިރެއް ޖަހާފައިވާ ދިދަ ނަގާފަ އެވެ. އޭނާ މިކަން ކުރި އިރު އެ ސަރަހައްދުގައި ފުލުހުން ހަރަކާތްތެރިވާ މަންޒަރުވެސް ފެނެ އެވެ.