ރަޝިޔާ އިން ޔޫކްރެއިން ގައި ކުރަމުންދާ ހަނގުރާމަ ކާމިޔާބު ކުރައްވާނެ ކަމަށް ރަޝިޔާގެ ރައީސް ޕުޓިން ވިދާޅުވެއްޖެ

ރަޝިޔާ އިން ޔޫކްރެއިން ގައި ކުރަމުންދާ ހަނގުރާމަ ކާމިޔާބު ކުރައްވާނެ ކަމަށް ރަޝިޔާގެ ރައީސް ޕުޓިން ވިދާޅުވެއްޖެ އެވެ.

އާ އަހަރުގެ މުނާސަބަތުގައި ރަޝިޔާގެ ރައީސް ވްލަޑިމިއަރ ޕޫޓިން ދެއްވި ޚިޠާބުގައި، ޔޫކްރެއިން ހަނގުރާމަ ރަޝިޔާއިން ކާމިޔާބުކުރާނެ ކަމުގެ ފުރިހަމަ ޔަގީންކަން އޮތް ކަމަށް ވިދާޅުވެފައިވާއިރު، ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވަނީ ގައުމަށް ގެއްލުންވާނެ ފަދަ އެއްވެސް ސުލްހަކަށް އެއްބަސްނުވާނެ ކަމަށް ވިދާޅުވެފައެވެ.

ޔޫކްރެއިނަށް ރަޝިޔާ އިން އަރައިގަތްތާ ގާތްގަނޑަކަށް ހަތަރު އަހަރު ފުރެން ކައިރިވެފައި ވަނިކޮށް، ބުދަ ދުވަހު ގައުމާ މުޚާޠަބު ކުރައްވަމުން ޕޫޓިން ވަނީ 2022 ވަނަ އަހަރުގެ ފެބްރުއަރީ މަހުން ފެށިގެން އެ ގައުމުގައި ހަނގުރާމަކުރަމުންދާ ރަޝިޔާގެ ސިފައިންނަށް "ހީރޯއިން"ގެ ގޮތުގައި ނިސްބަތްކުރައްވައި، އެމީހުންނަށް އެއްބާރުލުން ދިނުމަށް ރަޝިޔާގެ ރައްޔިތުންނަށް ގޮވާލައްވާފައެވެ.

ސުލްހައިގެ މަޝްވަރާތަކާއި ވަރުގަދަ ހަމަލާތައް އެއްވަގުތެއްގައި ކުރިއަށްދާތީ، ހަނގުރާމަ ނިމޭނެ ގޮތެއް އަދިވެސް ކަށަވަރު ނުވާއިރު، ޕުޓިން ވިދާޅުވީ ރަޝިޔާ ގެ ސިފައިންނަށް ފުރިހަމަ އަށް އިތުބާރުކުރާ" ކަމަށެވެ.

ޕުޓިންގެ މި ޚިޠާބު މިއައީ، މީގެ 26 އަހަރު ކުރިން އޭރުގެ ރައީސް ބޮރިސް ޔެލްޓްސިން ކުއްލި ގޮތަކަށް މަގާމުން އިސްތިއުފާ ދެއްވައި، އޭރުގެ ބޮޑުވަޒީރު އަދި ޖާސޫސީ އިދާރާގެ ކުރީގެ އޮފިސަރު ޕޫޓިންއާ ވެރިކަން ހަވާލުކުރެއްވި ތާރީޚީ ދަނޑިވަޅާ ދިމާކޮށްފައެވެ.

ވެރިކަމަށް ވަޑައިގަތުމަށްފަހު، ޕުޓިން ވަނީ ރަޝިޔާގެ ސިޔާސީ އޮނިގަނޑު އޭނާ ބޭނުންފުޅުވާ ގޮތަށް ބަދަލުކުރައްވާފަ އެވެ. އެގޮތުން 1991 ވަނަ އަހަރު ސޯވިއެޓް ޔޫނިއަން ރޫޅިގެން ދިޔުމާ ގުޅިގެން ލިބުނު ހީނަރުކަން ފޫބެއްދުމަށް މަސައްކަތް ކުރައްވާއިރު، ކުރީގެ ޑިކްޓޭޓަރު ޖޯސެފް ސްޓާލިންގެ ވެރިކަމަށް ތައުރީފު ކުރައްވައެވެ.

މީގެ އިތުރުން، ޕުޓިންގެ ޒަޢާމަތުގައި ޗެޗްނިޔާގެ މިނިވަންކަމަށް މަސައްކަތްކުރި ޖަމާއަތްތަކާ ދެކޮޅަށް ވަރުގަދަ ހަމަލާތަކެއް ދީ، ޖޯޖިއާއަށް އަރައިގަނެ، އަދި ސީރިއާގެ ބައްޝާރުލް އަސަދުގެ ސަރުކާރު ދެމެހެއްޓުމަށްޓަކައި އެ ގައުމުގެ އިދިކޮޅު ސަރަހައްދުތަކަށް ބޮންއަޅައި ބޮޑެތި ގެއްލުންތަކެއް ދީފައިވެއެވެ.

ޔޫރަޕްގެ ގައުމުތަކުން ކަންބޮޑުވަނީ، މި ހަނގުރާމަ އަވަހަށް ނުނިމިއްޖެ ނަމަ ޔޫކްރެއިންގެ ބޯޑަރުން ބޭރަށް މި ހަމަނުޖެހުން ފެތުރިގެން ހިނގައިދާނެތީއެވެ.

އާ އަހަރުގެ ޚިޠާބުގައި ޒެލެންސްކީ ވިދާޅުވީ، ޔޫކްރެއިނުން ބޭނުންވަނީ ސުލްހަ ކަމަށާއި، ނަމަވެސް ގައުމު ނިކަމެތިވާނެ ފަދަ އެއްބަސްވުމެއްގައި ސޮއިނުކުރައްވާނެ ކަމަށެވެ. "އަޅުގަނޑުމެން ބޭނުންވަނީ ހަނގުރާމަ ނިމުމަކަށް ގެންނަން، އެކަމަކު އެއީ ޔޫކްރެއިންގެ ނިމުމަކަށް ވެގެން ނުވާނެ،" އޭނާ ވިދާޅުވިއެވެ.

ޒެލެންސްކީ އިތުރަށް ވިދާޅުވީ، ހަނގުރާމައިގެ ސަބަބުން ވަރަށް ބޮޑަށް ވަރުބަލިވެފައިވީ ނަމަވެސް، އަމާންދީ ބަލި ގަބޫލުކުރަން ތައްޔާރަށް ނެތް ކަމަށެވެ. އެމެރިކާ މެދުވެރިވެގެން ކުރިއަށްދާ މަޝްވަރާތަކުގައި ސުލްހައިގެ އެއްބަސްވުމުގެ %90 ކަންކަން ނިމިފައިވާކަން ފާހަގަކުރައްވަމުން އޭނާ ވިދާޅުވީ، ސުލްހަ އާއި ޔޫކްރެއިން އަދި ޔޫރަޕްގެ މުސްތަގުބަލު ބިނާވެފައިވަނީ ބާކީ އޮތް 10 ޕަސެންޓް ގެ ކަންކަން ނިމިގެންދާ ގޮތެއްގެ މައްޗަށް ކަމަށެވެ.