ރަޝިޔާ އިން ޔޫކްރެއިން އަށް ދިން ހަމަލާ އެއްގައި ގަތަރު އެމްބަސީ އަށް ގެއްލުން ވެއްޖެ
ޒެލެންސްކީ ވިދާޅުވީ، ހަނގުރާމައިގެ އަސީރުން ބަދަލުކުރުމަށް ރަޝިޔާއާއެކު ކުރެވޭ މަޝްވަރާތަކުގައި ޤަތަރުން މެދުވެރިއެއްގެ ގޮތުން މުހިންމު ދައުރެއް އަދާކުރަމުންދާ ކަމަށް.
ޔޫކްރެއިން އަށް ރަޝިޔާ އިން ދިން ހަމަލާ އެއް ގައި ގެއްލުން ވެފައިވާ އެޕާޓްމަންޓް އިމާރާތެއް - ޖެނުއަރީ 9، 2026 | ރޮއިޓަސް
ރަޝިޔާ އިން ބުރާސްފަތި ދުވަހުގެ ރޭގަނޑުގެ ވަގުތެއްގައި ޔޫކްރެއިނަށް ދިން ވަރުގަދަ ހަމަލާތަކެއްގައި، ވެރިރަށް ކީވް އާއި އެ ސިޓީގެ ރަށްބޭރުގައި ހުރި އާންމުން ދިރިއުޅޭ 20 އިމާރާތަކަށާއި، ޤަތަރުގެ އެމްބަސީ އަށް ގެއްލުން ލިބިފައިވާ ކަމަށް ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ހުކުރު ދުވަހު ވިދާޅުވެއްޖެ އެވެ.
ޒެލެންސްކީ ވިދާޅުވި ގޮތުގައި، ހަމައެކަނި އާންމުން ދިރިއުޅޭ އިމާރާތްތަކުގެ ތެރެއިން 20 ތަނަކަށް ވަނީ ގެއްލުން ލިބިފައެވެ. އަދި ކީވް އިން ހަތަރު މީހަކު މި ހަމަލާތަކުގައި މަރުވެފައިވާ ކަމަށާއި، ރަޝިޔާގެ ޑްރޯން ހަމަލާއެއް ގައި ޤަތަރު އެމްބަސީގެ އިމާރާތަކަށް ވެސް ގެއްލުން ލިބިފައިވާ ކަމަށް އޭނާ ފާހަގަކުރެއްވި އެވެ.
މީގެ އިތުރުން، ޓެލެގްރާމް މެދުވެރިކޮށް ޒެލެންސްކީ ވިދާޅުވީ، ހަނގުރާމައިގެ އަސީރުން ބަދަލުކުރުމަށް ރަޝިޔާއާއެކު ކުރެވޭ މަޝްވަރާތަކުގައި ޤަތަރުން މެދުވެރިއެއްގެ ގޮތުން މުހިންމު ދައުރެއް އަދާކުރަމުންދާ ކަމަށެވެ.
