ޔޫކްރެއިން އިން ޕޫޓިންގެ ގަނޑުވަރަށް ޑްރޯން ހަމަލާ އެއް ދިން ކަމަށް ރަޝިޔާ އިން ބުނާ ވާހަކަ ޒެލެންސްކީ ދޮގު ކުރައްވައިފި
ރަޝިޔާގެ ފޮރިން މިނިސްޓަރ ލަވްރޯވް ވިދާޅުވީ ޕުޓިންގެ ގަނޑުވަރަކަށް 91 ޑްރޯން ބޭނުން ކޮށްގެން ޔޫކްރެއިން އިން ހަމަލާ ދީފައިވާނަމަވެސް އެހުރިހާ ޑްރޯނެއް ވެސް ވައިގެ ދިފާޢީ ނިޒާމުތަކުން ނައްތާލާފައިވާ ކަމަށް.
ރައީސް ވޮލޮޑިމިރ ޒެލެންސްކީ
ރައީސް ވްލަޑިމިއަރ ޕުޓިންގެ ގަނޑުވަރަކަށް ޔޫކްރެއިން އިން ޑްރޯން ހަމަލާއެއް ދިން ކަމަށް ރަޝިޔާ އިން ކުރާ ތުހުމަތުތައް ރައީސް ވޮލޮޑިމިއަރ ޒެލެންސްކީ ދޮގުކުރައްވައިފި އެވެ.
ރަޝިޔާގެ ފޮރިން މިނިސްޓަރ ސާގޭ ލަވްރޮވް ވިދާޅުވީ، ރަޝިޔާގެ ހުޅަނގު އުތުރުގެ ނޮވްގޮރޮޑް ސަރަޙައްދުގައި ހުންނަ ޕުޓިންގެ ރަސްމީ ގަނޑުވަރަށް، 91 ޑްރޯން ބޭނުންކޮށްގެން ކީވް އިން ރޭގަނޑު ގަޑީގައި ހަމަލާއެއް ދީފައިވާ ކަމަށެވެ.
މިއާ އެކު ރަޝިޔާ އިން ބުނެފައިވަނީ، ސުލްހައިގެ މަޝްވަރާތަކުގައި އެ ޤައުމުގެ ޕޮސިޝަން މިހާރު މުރާޖަޢާ ކުރާނެ ކަމަށެވެ.
ޒެލެންސްކީ ވަނީ، މިއީ "އާންމުކޮށް ރަޝިޔާ އިން ހަދާފަދަ ދޮގެއް" ކަމަށް ވިދާޅުވެ އެވަހަކާތަކުން ރެކިވަޑައިގެންފަ އެވެ. އަދި އެއީ ޔޫކްރެއިން އަށް ދެމުންދާ ހަމަލާތައް ކުރިއަށް ގެންދިއުމަށް ކްރެމްލިން އިން ބަހަނާ އެއް ދެއްކުމުގެ ބޭނުމުގައި ކުރާ ކަމެއް ކަމަށް އޭނާ ވިދާޅުވިއެވެ. އޭނާ އިތުރަށް ވިދާޅުވީ، ރަޝިޔާ އިން މީގެކުރިން ކީވް ގައި ހުންނަ ސަރުކާރުގެ އިމާރާތްތަކަށް ހަމަލާ ދީފައިވާ ކަމަށެވެ.
ޒެލެންސްކީ އެކްސް ގައި އިތުރަށް ވިދާޅުވީ، "މިވަގުތު ދުނިޔެ ހިމޭނުން އޮތުމަކީ ބުއްދިވެރިކަމެއް ނޫނެވެ. ދެމި އޮންނަ ސުލްހައެއް ޤާއިމުކުރުމުގެ މަސައްކަތް ހަލާކުކުރުމުގެ ފުރުސަތު ރަޝިޔާ އަށް ދީގެން ނުވާނެއެވެ."
ހޯމަ ދުވަހު ޓެލެގްރާމްގައި ޝާއިޢުކުރި ބަޔާނެއްގައި ލަވްރޮވް ވިދާޅުވީ، ޕުޓިންގެ ގަނޑުވަރަށް ހަމަލާ ދޭން ފޮނުވާލި 91 ޑްރޯން ވެސް ރަޝިޔާގެ ވައިގެ ދިފާޢީ ނިޒާމުތަކުން ހުއްޓުވައި ނައްތާލާފައިވާ ކަމަށެވެ.
އަދި މި ހަމަލާގެ ސަބަބުން އެއްވެސް މީހަކަށް އަނިޔާއެއް ލިބުނު ކަމުގެ ނުވަތަ ގެއްލުމެއް ލިބުނު ކަމުގެ ރިޕޯޓެއް ލިބިފައިނުވާ ކަމަށް ވެސް އޭނާ ވިދާޅުވިއެވެ.
ލަވްރޮވް ވިދާޅުވީ، "ކީވް ގެ ޖަރީމާ ސަރުކާރު އެއްކޮށް ނިކަމެތިވެ، ސްޓޭޓް ޓެރަރިޒަމްގެ ސިޔާސަތުތައް ބޭނުން ކުރަން ފަށާފައިވާތީ، ރަޝިޔާގެ މަޝްވަރާގެ ޕޮސިޝަނަށް ބަދަލުތަކެއް ގެނެވޭނެއެވެ."
ނަމަވެސް، އެމެރިކާ އާއެކު ކުރިއަށް ގެންދާ މަޝްވަރާތަކުން ރަޝިޔާ ނުކުންނަން ގަސްތު ނުކުރާ ކަމަށް ރަޝިޔާގެ ނޫސް އެޖެންސީ ޓާސް އިން ރިޕޯޓުކޮށްފައިވެއެވެ.
