އީރާނުގެ ޚާރިޖީ ވަޒީރު ވިދާޅުވީ ހުޅުޖަހާ މީހާގެ ގައިގައި ވެސް އެންމެ ފަހުން ހުޅު ހިފާނެ ކަމަށް

އީރާނުގެ ހަމަނުޖެހުންތަކުގައި އެމެރިކާ އާއި އިޒްރޭލުގެ ދައުރާ ގުޅޭގޮތުން ޚާރިޖީ ވަޒީރު ވާހަކަފުޅު ދައްކަވަމުން "ހުޅުޖަހާ މީހާގެ ގައިގައިވެސް އެންމެ ފަހުން ހުޅު ހިފާނެ" ކަމަށް ވިދާޅުވެއްޖެ އެވެ.

އީރާނަށް ކުރިމަތިވެފައިވާ އިޤްތިޞާދީ ދަތިތަކާ ގުޅިގެން ފެށުނު އިހުތިޖާޖުތައް ހަމަނުޖެހުންތަކަކަށް ބަދަލުކޮށްލުމަށް މަސައްކަތްކުރާ ފަރާތްތައް ކަމަށް އީރާނުން ދެކޭ އެމެރިކާ އާއި އިޒްރޭލުން އަދާ ކުރަމުން ގެންދާ ދައުރުގެ ސަބަބުން ނުކުމެދާނެ ނަތީޖާއަކާ މެދު، އެ ޤައުމުގެ ޚާރިޖީ ވަޒީރު އައްބާސް އަރަގްޗީ ވަނީ ވަރުގަދަ އިންޒާރެއް ދެއްވަފަ އެވެ.

އީރާނުގެ އެންމެ އިސް ސިފްލޮމެޓް ހިނގަމުންދާ ހަމަނުޖެހުންތަކާ ބެހޭ ގޮތުން ވާހަކަދެއްކެވީ ހޮނިހިރު ދުވަހު 'އެކްސް' ގައި ކުރެއްވި ޕޯސްޓެއްގަ އެވެ. އެ ޕޯސްޓުގައި އޭނާ ވަނީ، އީރާނުގައި ހިނގި ހަމަނުޖެހުންތަކުގައި އިޒްރޭލުގެ ޖާސޫސީ އިދާރާ 'މޮސާޑް' ގެ ބައިވެރިވުން އޮތްކަން އެމެރިކާގެ ސީ.އައި.އޭ ގެ ކުރީގެ ޑިރެކްޓަރު މައިކް ޕޮމްޕޭއޯ ކަށަވަރުކޮށްދެއްވާފައިވާކަން ފާހަގަކުރައްވާފަ އެވެ.

އަރަގްޗީ ވިދާޅުވި ގޮތުގައި، މި މަހުގެ ކުރީކޮޅު ޕޮމްޕޭއޯ ކުރެއްވި ޕޯސްޓަކުން ވެފައިވާ މި އިއުތިރާފަކީ، ތެލްއަވީވް އާއި ވޮޝިންޓަނުން އީރާނުގެ ދާޚިލީ ކަންކަމުގެ ތެރެއަށް އަތްބާނާ ކަމަށް ބުނެ އީރާނުން ކުރާ ތުހުމަތުތަކަކީ "ވަހުމެއް" ކަމަށް ބުނެ އެމެރިކާ ސަރުކާރުން ދައްކަމުންދިޔަ ވާހަކަތަކުގެ ދޮގުކަން ހާމަވެގެންދިޔަ ކަމެކެވެ.

"ރައީސް ޓްރަމްޕްގެ ސީ.އައި.އޭ ގެ ކުރީގެ ޑިރެކްޓަރު މިވަނީ މޮސާޑާއި އެމީހުންނަށް ވާގިވެރިވާ އެމެރިކާގެ ފަރާތްތަކުން އަސްލު ކުރަމުންދާ ކަންތައްތައް ފާޅުކަން ބޮޑު ގޮތެއްގައި އަދި އެއްވެސް ލަދުވެތިކަމެއް ނެތި ހާމަކޮށްދީފައި،" ޚާރިޖީ ވަޒީރު ލިޔުއްވާފައިވެ އެވެ.

މި ހާލަތުގައި "ވަހުމެއްގެ ތެރޭގައި" އުޅެނީ އެމެރިކާ އާއި އިޒްރޭލުން ކަން ފާހަގަކުރައްވަމުން އޭނާ ވިދާޅުވީ، ހުޅުޖަހާ މީހާގެ ގައިގައި އެންމެ ފަހުން ހުޅު ނުހިފާނެ ކަމަށް އެ ދެ ގައުމުން ގަބޫލުކުރުމަކީ ބޮޑު ކުށްހީއެއް ކަމަށެވެ.

ހޮނިހިރު ދުވަހު އީރާނުގެ ރައީސް މަސްޢޫދު ޕެޒެޝްކިއާން ވެސް ވަނީ، އެހެން ޤައުމުތަކާ ދެކޮޅަށް އެމެރިކާ އިން ބޭނުންކުރާ އުކުޅުތައް އީރާނާ ދެކޮޅަށް ބޭނުންކުރެވިދާނެ ކަމަށް އެމެރިކާ އަށް ހީވުމަކީ ބޮޑު ކުށެއް ކަމަށް ވިދާޅުވެފަ އެވެ. އަދި ޤައުމު ނުތަނަވަސްކުރުމަށް ކުރެވޭ އެއްވެސް މަސައްކަތަކަށް އީރާނުގެ ރައްޔިތުން ފާރަވެރިވެ ތިބިކަން އޭނާ ފާހަގަކުރެއްވި އެވެ.

"އީރާނަކީ އެހެން ޤައުމުތަކާ އެއްފަދަ ތަނެއް ކަމަށް ހީކޮށް، ވަކިވަކި ފަރުދުންނަށް ހިތްވަރުދީގެން ހަލަބޮލިކަމާއި ހަމަނުޖެހުން އުފެއްދުމަށް އެމެރިކާ އިން ދަނީ މަސައްކަތް ކުރަމުން،" ރައީސް ވިދާޅުވިއެވެ.

އެހެންނަމަވެސް، އީރާނުގެ ރައްޔިތުން ކުރިއަށްވުރެ ބޮޑަށް ޤައުމާއި އިސްލާމީ ނިޒާމުގެ ދިފާޢުގައި ސާބިތުވެ ތިބޭނެ ކަމަށް ވެސް ރައީސް ޕެޒެޝްކިއާން ވިދާޅުވި އެވެ.

މި ވާހަކަތަކަކީ އީރާނުގެ އެކި މުއައްސަސާތަކުގެ އިސްވެރިން ތަކުރާރުކޮށް ދައްކަވަމުންދާ ވާހަކަތަކެކެވެ. އެ ފަރާތްތަކުން ބުނަމުންދަނީ އިޤްތިޞާދީ ދަތިތަކާ ގުޅިގެން ކުރެވޭ އިހުތިޖާޖުތަކަށް ހައްލު ހޯދުމަށް ސަރުކާރުން މަސައްކަތް ކުރާނެ ކަމަށާއި، ނަމަވެސް އެ އިހުތިޖާޖުތަކުގެ ބޭނުން ހިފައިގެން ޤައުމުގައި ހަމަނުޖެހުން އުފެއްދުމަށް ކުރާ އެއްވެސް މަސައްކަތަކަށް ފުރުޞަތު ނުދޭނެ ކަމަށެވެ.