އެމެރިކާ އިން އެހެން ޤައުމުތަކާ ދެކޮޅަށް ބޭނުންކުރާ އުކުޅުތައް އީރާނުގައި ވެސް ކާމިޔާބުވާނެ ކަމަށް ހީކުރުމަކީ ވަރަށް ބޮޑު ކުށްހީ އެއް: އީރާނުގެ ރައީސް

އެމެރިކާ އިން އެހެން ޤައުމުތަކާ ދެކޮޅަށް ބޭނުންކުރާ އުކުޅުތައް އީރާނުގައި ވެސް ކާމިޔާބުވާނެ ކަމަށް ހީކުރުމަކީ އެމެރިކާ އަށް ކުރެވޭ ވަރަށް ބޮޑު ކުށްހީ އެއް ކަމަށް އީރާނުގެ ރައީސް މަސްޢޫދު ޕެޒެޝްކިއަން ވިދާޅުވެއްޖެ އެވެ. އަދި ޤައުމުގެ ހަމަޖެހުން ނަގާލުމަށް ކުރެވޭ ކޮންމެ މަސައްކަތަކަށް އީރާނުގެ ރައްޔިތުން ވަރަށް ބޮޑަށް ފާރަވެރިވެ ތިބިކަމަށް އެމަނިކުފާނު ފާހަގަކުރެއްވި އެވެ.

ރައީސް ޕެޒެޝްކިއަން މިހެން ވިދާޅުވީ، ސަރަޙައްދީ އަދި ބައިނަލްއަޤްވާމީ މުހިންމު ކަންކަމާ ގުޅޭގޮތުން މަޝްވަރާކުރެއްވުމަށް ތެހެރާނަށް ވަޑައިގެން އުޅުއްވާ އޮމާންގެ ޚާރިޖީ ވަޒީރު ސައްޔިދު ބަދުރު ބިން ޙަމަދު އަލްބޫސައިދީ އާއެކު ހޮނިހިރު ދުވަހު ބޭއްވި ބައްދަލުވުމުގަ އެވެ.

އީރާނާ އެކު ނުސީދާކޮށް ކުރިއަށްދިޔަ ނިއުކްލިއަރ މަޝްވަރާތަކުގައި ވޮޝިންގޓަނުން ގެންގުޅުނު "މުނާފިޤު" ސިޔާސަތަށް އިޝާރާތްކުރައްވައި ރައީސް ޕެޒެޝްކިއަން ވިދާޅުވީ، މަޝްވަރާތައް ކުރިއަށް ދަނިކޮށް އެމެރިކާ އިން ވަނީ ޑިޕްލޮމަސީ އަށާއި ވާހަކަދެއްކުމުގެ މަގަށް ހުރަސްއަޅާފައި ކަމަށެވެ. އަދި އެމެރިކާ އިން ވަނީ އިންސާނިއްޔަތާ ޚިލާފު ޖަރީމާތައް ހިންގައި، ބައިނަލްއަޤްވާމީ ހުރިހާ ހަމަތަކަކާ ޚިލާފުވެފައި ކަމަށް އެމަނިކުފާނު ތުހުމަތުކުރެއްވި އެވެ.

"އީރާނުގެ އިސްލާމީ ޖުމްހޫރިއްޔާ އަކީ ވެސް އެހެން ޤައުމުތައް ފަދަ ޤައުމެއް ކަމަށް ހީކޮށް، ވަކިވަކި ފަރާތްތަކަށް ހިތްވަރުދީގެން ޤައުމުގައި ހަމަނުޖެހުމާއި ހަލަބޮލިކަން އުފެއްދުމަށް އެމެރިކާއިން ދަނީ މަސައްކަތް ކުރަމުން،" ރައީސް ވިދާޅުވިއެވެ. ނަމަވެސް އީރާނުގެ ރައްޔިތުން ކުރިއަށްވުރެ ބޮޑަށް ޤައުމާއި އިސްލާމީ ނިޒާމުގެ ދިފާޢުގައި ސާބިތުކަމާއެކު ތިބޭނެ ކަމަށް އެމަނިކުފާނު އިތުރަށް ވިދާޅުވި އެވެ.

ރައީސް ޕެޒެޝްކިއަން ވިދާޅުވީ އެމެރިކާ އާއި އިޒްރޭލުން ދަނީ ދުނިޔޭގެ ސުލްހައާއި ހަމަޖެހުމާއި ރައްކާތެރިކަން ނަގާލަމުން ކަމަށެވެ. "އެމެރިކާ އާއި ޒަޔަނިސްޓު ދައުލަތުން (އިޒްރޭލުން) ދަނީ ސަރަޙައްދީ ހަނގުރާމަތަކާއި ނުތަނަވަސްކަން ދިގުދައްމައި، އިސްލާމީ ޤައުމުތަކުގެ މެދުގައި އޮންނަ އެއްބައިވަންތަކަން ކުޑަކޮށް، ފިތުނަ އުފެއްދުމަށް އެމީހުންގެ ނުބައި މަޤްޞަދުތައް ޙާޞިލުކުރުމަށް ހުރިހާ މަސައްކަތެއް ކުރަމުން،" އެމަނިކުފާނު ވިދާޅުވި އެވެ.

މީގެ އިތުރުން، އަވަށްޓެރި ޤައުމުތަކާއި އިސްލާމީ ޤައުމުތަކާއެކު އޮންނަ ގުޅުން ބަދަހިކުރުމަކީ އީރާނުން އިސްކަމެއް ދޭ ކަމަށް އެ ގައުމުގެ ރައީސް ވިދާޅުވިއެވެ. އީރާނާއި އޮމާނާ ދެމެދު އޮތް ފުން ސަގާފީ އަދި ސިޔާސީ ގުޅުމުގެ ސަބަބުން، އީރާނުގެ ޚާރިޖީ ސިޔާސަތުގައި އޮމާނަށް ޚާއްޞަ މަޤާމެއް ދެވިފައިވާ ކަމަށާއި، ދެ ޤައުމުގެ ދެމެދުގައި ވެފައިވާ އެއްބަސްވުންތައް ތަންފީޒުކޮށް، ހުރިހާ ދާއިރާއަކުން ގުޅުން ބަދަހިކުރުމަށް ތެހެރާނުން މަސައްކަތް ކުރާނެ ކަމަށް ވެސް ޕެޒެޝްކިއަން ވިދާޅުވި އެވެ.