އިރާނުގެ މުޒާހަރާގައި އިސްކޮށް ހަރަކާތްތެރިވި 100ށް ވުރެ ގިނަ މީހުން ހައްޔަރު ކޮށްފި

އީރާނުގެ އެކި ސަރަހައްދުތަކުގައި ފާއިތުވި ދުވަސްތަކުގައި ހިނގި ހަމަނުޖެހުންތަކާ ގުޅިގެން 100 އަށް ވުރެ ގިނަ މީހުން ހައްޔަރުކޮށްފައިވާ ކަމަށް އެގައުމުގެ ސަލާމަތީ ބާރުތަކުން ބުނެފި އެވެ.

ލޮރެސްތާން ޕްރޮވިންސްގެ ފުލުހުންނާއި، އަސްކަރިއްޔާ އަދި އިންޓެލިޖެންސް އިދާރާތައް ގުޅިގެން ކުރި މަސައްކަތުން، އެ ސަރަހައްދުގެ އެކި ސިޓީތަކުގައި ހަމަނުޖެހުން ހިންގުމުގައި ބައިވެރިވި 100 އަށް ވުރެ ގިނަ މީހުން ވަނީ ދެނެގަނެ ހައްޔަރުކޮށްފައިވާ ކަން އީރާނުގެ ރަސްމީ ޓީވީން ވަނީ ބުނެފަ އެވެ. މީގެ ތެރޭގައި ސިޓީތަކުގައި ހަތިޔާރާ އެކު ހަރަކާތްތެރިވަމުން ދިޔަ ދެ "ޓެރަރިސްޓް ގްރޫޕެއް" ވަނީ އަތުލައިގަނެފައިވާ ކަމަށް ވެސް ބުނެފައިވެ އެވެ. މި ގްރޫޕުތަކުން މަސައްކަތް ކުރަމުންދިޔައީ ބިރުވެރިކަން އުފައްދައި މީހުން މެރުމަށް ކަމަށް ރިޕޯޓުތައް ބުނެ އެވެ.

އީރާނުގެ ފުލުހުން ވަނީ އާންމުންގެ ފަރާތުން ލިބުނު އެއްބާރުލުމަށް ޝުކުރު އަދާކޮށް، ގައުމީ ސަލާމަތަށް ނުރައްކާވާ ފަދަ އެއްވެސް މައުލޫމާތެއް ލިބިއްޖެ ނަމަ ކަމާބެހޭ އިދާރާތަކަށް ހިއްސާކުރުމަށް އިލްތިމާސްކޮށްފަ އެވެ.

ހަމައެއާއެކު، ނޯތު ޚުރާސާން ޕްރޮވިންސްގެ ވެރިރަށް ބޮޖްނޫރުދު ގައި ހިނގި ހަމަނުޖެހުންތަކުގެ އިސް މޭސްތިރިން ވެސް މިހާރު ވަނީ ހައްޔަރުކޮށްފަ އެވެ. ތަހުގީގުތަކުން ހާމަވާގޮތުގައި، ހައްޔަރުކުރެވުނު މީހުންނަކީ ބޭރުގެ ޖާސޫސީ އިދާރާތަކާ ގުޅިގެން، ރޭވުންތެރިކަމާއެކު ތަންތަނަށް ގެއްލުންދީ ހަމަނުޖެހުން ހިންގުމަށް މަސައްކަތްކުރި ބަޔެއް ކަމަށް ބުނެފައިވެ އެވެ. މި މީހުންގެ އިއުތިރާފުން އެނގޭގޮތުގައި، އެމީހުންގެ މަގްސަދަކީ ސަރުކާރުން ޒުވާނުން މަރަމުންދާ ކަމަށް ދެއްކުމަށްޓަކައި ދޮގު މަންޒަރުތަކެއް އުފައްދައި، ގައުމުގެ ހަމަޖެހުން ނަގާލުން ކަމަށް ވަނީ ބުނެފަ އެވެ.

އީރާނުގެ ކޮންސްޓިޓިއުޝަނަލް ކައުންސިލްގެ ތަރުޖަމާނު ހާދީ ތަހާން ނާޒިފް ވިދާޅުވި ގޮތުގައި، ބޭރުގެ ނުފޫޒުގެ ސަބަބުން ރައްޔިތުންގެ އާންމު ދިރިއުޅުމާ ގުޅޭ އިހުތިޖާޖުތައް ވަނީ ނުރައްކާތެރި ހަމަނުޖެހުންތަކަކަށް ބަދަލުވެފަ އެވެ. އޭނާ ވަނީ މި ހަމަނުޖެހުންތަކުގައި ފަހަތުގައި ތިބި ފަރާތްތަކާމެދު ހަރުކަށި ފިޔަވަޅު އެޅުމަށް ގޮވާލައްވާފަ އެވެ.

މި ހަމަނުޖެހުންތަކުގައި އާންމު ހިދުމަތްތަކަށް ވެސް ބޮޑެތި ގެއްލުންތަކެއް ލިބިފައިވެ އެވެ. ތެހެރާން ފަޔަރ ޑިޕާޓްމަންޓުގެ 43 އުޅަނދަކަށް ގެއްލުންދީފައިވާއިރު، މީގެ ތެރެއިން 8 އުޅަނދެއް ވަނީ ބޭނުން ނުކުރެވޭ ވަރަށް ހަލާކުކޮށްލާފަ އެވެ. މީގެ އިތުރުން އިސްފަހާން އާއި އަހްވާޒްގައި ވެސް އަލިފާންނިވާ އުޅަނދުތަކަށް ގެއްލުންދީފައިވާ ކަމަށް ރިޕޯޓު ކޮށްފައިވެ އެވެ.

އީރާނުގެ ގީލާން ޕްރޮވިންސްގެ ޗީފް ޖަސްޓިސް މަޖީދު އިލާހީއާން ވިދާޅުވި ގޮތުގައި، އެ ސަރަހައްދުގައި ހިނގި ހަމަނުޖެހުންތަކުގެ ތެރޭގައި ރަޝްތު ގައި ހުންނަ ކޯޓު އިމާރާތެއްގައި ވަނީ ރޯކޮށްލާފަ އެވެ. މީގެ ސަބަބުން ޝަރުއީ ދާއިރާގެ މަސައްކަތްތަކަށް ވަގުތީ ގޮތުން ބުރޫ އަރާފައިވާ ކަމަށް އޭނާ ފާހަގަކުރެއްވި އެވެ.

މީގެ އިތުރުން، މި ހަމަނުޖެހުންތަކުގެ ތެރޭގައި މިސްކިތްތަކާއި ކީރިތި ގުރުއާނުގެ މުސްހަފުތަކުގައި ރޯކޮށް، ގިނަ އަދަދެއްގެ ފިހާރަތަކާއި ބޭންކުތަކުގެ އިތުރުން ކްލިނިކަކަށް ވެސް ގެއްލުން ދީފައިވާ ކަމަށް އޭނާ ވިދާޅުވި އެވެ. މި ހާދިސާތަކުގައި ތިން ނަރުހަކު މަރުވެފައިވާ ކަމަށް ވެސް އޭނާ މައުލޫމާތު ދެއްވި ކަމަށް އީރާނުގެ ރަސްމީ މީޑިއާ އިން ބުނެފައިވެ އެވެ.

އިލާހީއާން އިތުރަށް ވިދާޅުވި ގޮތުގައި، މި މައްސަލައާ ގުޅިގެން މީހުން ހައްޔަރުކުރުމުގެ މަސައްކަތް ހުއްޓުމެއް ނެތި ދަނީ ކުރިއަށެވެ. އަދި މި ހަމަނުޖެހުންތައް އިސްވެ ރާވާ ހިންގާ ފަރާތްތަކަށް ހަރުކަށި އަދަބު ދޭނެ ކަމުގެ އިންޒާރު އޭނާ ދެއްވި އެވެ. މި ހުރިހާ ހަމަނުޖެހުންތަކަކީ އެމެރިކާ އާއި އިޒްރޭލުގެ ރޭވުމާއި އިރުޝާދުގެ ދަށުން ހިންގަމުންދާ ކަންތައްތަކެއް ކަމަށް އޭނާ ތުހުމަތު ކުރެއްވި އެވެ.