އިޒްރޭލާއި އެމެރިކާގެ "ބިރު ދެއްކުމަށް" އީރާނުގެ އަސްކަރިއްޔާގެ ވެރިޔާ އިންޒާރު ދީފި

 އީރާނުގެ ސަރުކާރާ ދެކޮޅަށް ކުރަމުންދާ މުޒާހަރާތަކަށް އެމެރިކާ އާއި އިޒްރޭލުން ތާއީދުކުރުމާ ގުޅިގެން، ބޭރުގެ ބާރުތަކުގެ ބިރުދެއްކުންތަކަށް އީރާނުން ބަލަހައްޓައިގެން ނޯންނާނެ ކަމަށް ވިދާޅުވެ އެ ގައުމުގެ އަސްކަރިއްޔާގެ އިސް ވެރިޔާ ބުދަ ދުވަހު އިންޒާރު ދެއްވައިފި އެވެ.

ފާރްސް ނިއުސް އެޖެންސީން ރިޕޯޓްކޮށްފައިވާ ގޮތުގައި، ޖެނެރަލް އާމިރު ހާތަމީ ވިދާޅުވީ އީރާނާ ދެކޮޅަށް ދައްކަމުންދާ ހަރުކަށި ވާހަކަތަކަކީ އީރާނުގެ ރައްޔިތުންނަށް އޮތް ނުރައްކަލެއް ކަމަށް އިސްލާމީ ޖުމްހޫރިއްޔާ އީރާނުން ދެކޭ ކަމަށާއި، އެކަން އެގޮތަށް ކުރުމުގެ ފުރުސަތު ނުދޭނެ ކަމަށެވެ.

އީރާނުގެ ސިފައިންގެ ކޮމާންޑަރެއް ކަމަށްވާ ހާތަމީ އިންޒާރު ދެއްވި ގޮތުގައި، "ދުޝްމަނުންނަށް ގޯސް ހެދިއްޖެ ނަމަ"، މިދިޔަ ޖޫން މަހު އިޒްރޭލާ އެކު ކުރި 12 ދުވަހުގެ ހަނގުރާމަ އަށް ވުރެ މާ ވަރުގަދަ ރައްދެއް އީރާނުން ދޭނެ އެވެ.

ދާދި ފަހުން އެމެރިކާގެ ރައީސް ޑޮނަލްޑް ޓްރަމްޕް ވަނީ މުޒާހަރާގެ ބައިވެރިން މަރާލައިފި ނަމަ އީރާނުގެ ކަންކަމުގެ ތެރެއަށް ވަންނާނެ ކަމުގެ އިންޒާރު ދެއްވާފަ އެވެ. ހަމަ އެއާ އެކު، އިޒްރޭލުގެ ބެންޖަމިން ނަތަންޔާހޫ ވެސް ވަނީ މުޒާހަރާތަކަށް ތާއީދު ކުރާކަން ހާމަކޮށްފަ އެވެ.

ޑިސެމްބަރު 28 ވަނަ ދުވަހު ތެހެރާނުގެ ވިޔަފާރިވެރިން، ތަކެތީގެ އަގުބޮޑުވުމާއި އީރާނުގެ ފައިސާ (ރިއާލް) ގެ އަގު ދަށަށް ދިއުމާ ދެކޮޅަށް މުޒާހަރާ ފެށިއެވެ. މީގެ ސަބަބުން އެހެން ސިޓީތަކަށް ވެސް މުޒާހަރާތައް ފެތުރިގެން ދިޔައިރު، ބައެއް ހަމަނުޖެހުންތަކުގައި މީހުން މަރުވެފައި ވެސް ވެއެވެ.

މި މުޒާހަރާތަކަކީ 2022 އާއި 2023 ގެ ހަރަކާތްތަކާ ނުވަތަ އިންތިޚާބާ ގުޅިގެން 2009 ގައި ހިނގި ބޮޑެތި މުޒާހަރާތަކާ އަޅާބަލާއިރު އެހާ ފުޅާ ހަރަކާތްތަކެއް ނޫނެވެ. ނަމަވެސް، މި މުޒާހަރާތަކަށް ބައިނަލްއަގުވާމީ ސަމާލުކަން ލިބިފައިވާއިރު، މީގެ ތެރޭގައި އީރާނުގެ ދުޝްމަން ގައުމުތަކުގެ ވެރިން ވެސް ހިމެނެ އެވެ.

އާދިއްތަ ދުވަހު ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، "އަހަރެން މިކަން ވަރަށް ގާތުން ބަލަމުންދާ" ކަމަށާއި، "ކުރިއެކޭ އެއްގޮތަށް މީހުން މަރަން ފަށައިފި ނަމަ، އެމެރިކާގެ ފަރާތުން ވަރުގަދަ ހަމަލާތަކެއް އަމާޒު ވާނެ،" ކަމަށެވެ.

މި ދަނޑިވަޅުގައި ނަތަންޔާހޫ އިޒްރޭލުގެ ކެބިނެޓުގައި ވިދާޅުވީ، އީރާނުގެ ރައްޔިތުން މިނިވަންކަމާއި އިންސާފަށް ކުރާ މަސައްކަތުގައި އެގައުމުގެ ރައްޔިތުންނާ އެކު ސާބިތުވެ ތިބި ކަމަށެވެ.

ހޯމަ ދުވަހު އީރާނުގެ ފޮރިން މިނިސްޓްރީން ވަނީ ޓްރަމްޕާއި ނަތަންޔާހޫ ހަމަނުޖެހުމަށް ހިތްވަރުދީ، އީރާނުގެ އެއްބައިވަންތަކަން ރޫޅާލަން މަސައްކަތް ކުރާ ކަމަށް ތުހުމަތުކޮށްފަ އެވެ.