އީރާނުގައި އިންޓަރނެޓާއި ފޯނުގެ ޚިދުމަތް ކަނޑާލި ނަމަވެސް މުޒާހަރާތައް ދިޔައީ ކުރިއަށް

ހުކުރު ދުވަހުގެ ފަތިހާ ހަމައަށް އީރާނުގެ މަގުތަކުގައި ގިނަ ބަޔަކު އަޑުއުފުލައި މުޒާހަރާކޮށްފިއެވެ. މުޒާހަރާ ތަކުގެ ސަބަބުން އީރާނުގެ ސަރުކާރުން މުޅި ގައުމުން އިންޓަނެޓާއި ބައިނަލްއަގުވާމީ ފޯނު ކޯލްތަކުގެ ހިދުމަތް ވަނީ ކަނޑާލާފަ އެވެ.

އެކްޓިވިސްޓުން އާންމުކޮށްފައިވާ ކުރު ވީޑިއޯތަކުން ފެންނަ ގޮތުގައި، ވެރިރަށް ތެހެރާނާއި އެހެނިހެން ސަރަހައްދުތަކުގެ މަގުތަކުގައި އަލިފާންގަނޑުތައް ޖަހައި، ސަރުކާރާ ދެކޮޅަށް މީހުން ވަނީ އަޑުއުފުލާފަ އެވެ. އީރާނުގެ ދައުލަތުގެ މީޑިއާ އިން ހުކުރު ދުވަހު މިކަމާ ގުޅޭގޮތުން ބުނެފައިވަނީ، މި ހަމަނުޖެހުންތަކަކީ އެމެރިކާ އާއި އިޒްރޭލަށް ނިސްބަތްވާ "ޓެރަރިސްޓް އެޖެންޓުން" ހިންގާ އަމަލުތަކެއް ކަމަށެވެ. 

މުވާސަލާތީ ހިދުމަތްތައް މެދުކަނޑާލާފައިވުމުގެ ސަބަބުން މި މުޒާހަރާތައް ފެތުރިފައިވާ މިންވަރު ސީދާ ދެނެގަންނަން އުނދަގޫވި ނަމަވެސް، މިއީ އީރާނުގެ އިގްތިސާދީ ހާލަތާ ގުޅިގެން ފެށުނު މުޒާހަރާތައް އިތުރަށް ވަރުގަދަވެ، ފާއިތުވި އަހަރުތަކުގައި ސަރުކާރަށް ކުރިމަތިވި އެންމެ ބޮޑު ގޮންޖެހުން ކަމަށް ރިޕޯޓުތައް ބުނެ އެވެ.

މި މުޒާހަރާތަކަކީ، 1979 ވަނަ އަހަރުގެ އިސްލާމީ އިންގިލާބުގެ ކުރިން ގައުމުން ބޭރަށް ވަޑައިގެންނެވި އީރާނުގައި އެންމެ ފަހުން ހުންނެވި ރަސްގެފާނުގެ ދަރިކަލުން، ޕްރިންސް ރިޒާ ޕަހްލަވީ ފަހަތުގައި ހުންނަވައިގެން ކުރިއަށް ގެންދާ މުޒާހަރާތަކެއް ކަމަށް ބައެއް ރިޕޯޓުތަކުގައިވެ އެވެ.

އެމެރިކާ ގައި ހުންނަ 'ހިއުމަން ރައިޓްސް އެކްޓިވިސްޓްސް ނިއުސް އެޖެންސީ' އިން ބުނާ ގޮތުގައި، މިހާތަނަށް ހިނގި ހަމަނުޖެހުންތަކުގައި މަދުވެގެން 42 މީހުން މަރުވެ، 2,270 އަށްވުރެ ގިނަ މީހުން ވަނީ ހައްޔަރުކޮށްފަ އެވެ.

ބުރާސްފަތި ދުވަހުގެ ރޭ މުޒާހަރާ އަށް ގޮވާލެއްވި ޕަހްލަވީ ވަނީ ހުކުރު ދުވަހުގެ ރޭ 8 ޖަހާއިރު ވެސް މުޒާހަރާ ކުރުމަށް ގޮވާލައްވާފަ އެވެ.