ހަމަ ނުޖެހުންތަކަށް ފަހު އީރާނުގެ ސިޓީތަކަށް ހަމަޖެހުން އައިސްފި ކަމަށް ފުލުހުންގެ ތަރުޖަމާނު ހާމަ ކޮށްފި
އީރާނުގެ އިސްއޮފިޝަލުން ވިދާޅުވާ ގޮތުގައި ބޭރުގެ ބާރުތަކުން ވާގިވެރިވާ ހަތިޔާރުއެޅި ޓެރަރިސްޓް ޖަމާއަތްތަކުން ރާވައިގެން ހަމަނުޖެހުންތަކާއި ދައުލަތުގެ ތަންތަނަށް ހަމަލާދީފައިވޭ. މި ހަމަނުޖެހުން ތަކުގައި ފުލުހުންގެ އޮފިސަރުން މަރުވެފައިވާއިރު 270 އަށް ވުރެ ގިނަ ފުލުހުންނަށް އަނިޔާ ވެފައިވާ ކަމަށް ވެސް ބުނެފައިވޭ. އެމެރިކާ އާއި އިޒްރޭލު ފަދަ ގައުމުތަކުން ޓެރަރިސްޓުންނަށް އެހީތެރިކަން ފޯރުކޮށްދެމުން ދާކަމަށް އީރާނުން ތުހުމަތުކޮށްފައިވޭ.
އީރާނުގައި ހިނގަމުންދާ މުޒާހަރާތަކުގައި ރޯކޮށްލާފައިވާ އިމާރާތެއް | ސްކްރީން އިމޭޖް
އީރާނުގެ ފުލުހުންގެ ތަރުޖަމާނު ހާމަކުރެއްވި ގޮތުގައި، ގައުމުގެ އެކި ސިޓީތަކުގައި ހިނގި ހަމަނުޖެހުންތަކަށް ފަހު، މިހާރު އެތަންތަން ވަނީ އާންމު ހާލަތަކަށް ރުޖޫއަވެފަ އެވެ.
އީރާނުގެ އިސް އޮފިޝަލުން ވިދާޅުވާ ގޮތުގައި، ހިނގައިދިޔަ ހަމަނުޖެހުންތަކުގައި، އާންމު މުދަލުގައި ހުޅުޖެހުމާއި، ދައުލަތުގެ އުމްރާނީ ވަސީލަތްތަކަށް ދިން ހަމަލާތަކަކީ ބޭރުގެ ބާރުތަކުން ވާގިވެރިވާ ހަތިޔާރު އެޅި ޖަމާއަތްތަކާއި ޓެރަރިސްޓުން ރާވައިގެން ހިންގި އަމަލުތަކެކެވެ.
އީރާނުގެ ލޯ އެންފޯސްމަންޓް ކޮމާންޑް (ފަރާޖާ) ގެ ތަރުޖަމާނު ސައީދު މުންތަޒަރު އަލް-މަހްދީ ހުކުރު ދުވަހު ވިދާޅުވީ، މުޅި ގައުމުގެ ސިޓީތަކުން ފެންނަނީ "އާންމު އަމާންކަން" ކަމަށް އެ ސަރަހައްދުތަކުން ލިބޭ ރިޕޯޓްތަކުން ކަށަވަރުވާ ކަމަށެވެ.
ތަސްނީމް ނިއުސް އެޖެންސީ އަށް މައުލޫމާތު ދެއްވަމުން އޭނާ ވިދާޅުވީ، ހަތިޔާރު އެޅި ޓެރަރިސްޓް ގުރޫޕުތަކާ ދެކޮޅަށް އާންމުން ނުކުމެ ކުރި މުޒާހަރާތަކުގެ ސަބަބުން، އިތުރު ހަމަނުޖެހުންތައް ހިނގުން ހުއްޓުވުނު ކަމަށެވެ.
ޚަބަރު ފަތުރާ ވަސީލަތްތަކުން ރިޕޯޓްކުރާ ގޮތުގައި، ސަލާމަތީ ބާރުތަކުން ދިން ހަރުކަށި އިންޒާރުތަކަށް ފަހު، ގިނަ ޕްރޮވިންސް ތަކުގައި އެއްވެސް ބާވަތެއްގެ އިތުރު ހަމަނުޖެހުމެއް ހިނގާފައެއް ނުވެ އެވެ. ނަމަވެސް، ފާއިތުވި ދުވަސްތަކުގައި ބައެއް ސަރަހައްދުތަކުގައި ހަތިޔާރު އެޅި ގުރޫޕުތަކުން އާންމުންގެ މުދަލަށާއި ދައުލަތުގެ ތަންތަނަށް ހަމަލާދީ ބޮޑެތި ގެއްލުންތަކެއް ދީފައިވާ ކަމަށާއި މީގެ ތެރޭގައި މިސްކިތްތަކަށް ހަމަލާދިނުމާއި ދީނީ މުގައްދަސް ތަންތަނަށް އިހުތިރާމް ކުޑަކުރުމުގެ އަމަލުތައް ހިމެނޭ ކަމަށް ތަސްނީމް އެޖެންސީން ބުނެ އެވެ.
ހަމަނުޖެހުންތަކުގެ ތެރޭގައި ޝީރާޒް ސިޓީގައި ފުލުހުންގެ ތިން އޮފިސަރަކު މަރުވެފައިވެ އެވެ. މީގެ އިތުރުން ވެރިރަށް ތެހެރާން ގައި ވެސް ފުލުހުން މަރުވެފައިވާ އިރު، ބަސީޖް ފައުޖުތަކާއި އާންމު ރައްޔިތުން ގުޅިގެން ވަނީ މަސްލަހަތު ގާއިމުކޮށްފައި ކަމަށް ޚަބަރުތައް ބުނެ އެވެ. މި މައްސަލައިގައި ބައެއް މީހުން މިހާރު ވަނީ ހައްޔަރުކުރެވިފަ އެވެ.
އީރާނުގެ ޕްރޮސެކިއުޓާ ޖެނެރަލް ވަނީ ހައްޔަރުކުރެވުނު މީހުންގެ ޝަރީއަތްތައް އަވަސްކުރުމަށް އަމުރުކުރައްވާފަ އެވެ. އަދި މި ގެއްލުންތަކުގެ ޒިންމާ އުފުލަންޖެހޭ ފަރާތްތަކާއި، ގައުމުން ބޭރުގައި ތިބެގެން ހިތްވަރުދޭ ފަރާތްތަކާއި، އީރާނާ ދެކޮޅު ސޯޝަލް މީޑިއާ ނެޓްވޯކްތަކުން ބަދަލު ހޯދުމަށް އޭނާ ގޮވާލެއްވި އެވެ. އޭނާ އިތުރަށް ވިދާޅުވީ، އެމެރިކާ އާއި އިޒްރޭލު ފަދަ ގައުމުތަކުން ޓެރަރިސްޓުންނަށް ހަތިޔާރާއި އެހީތެރިކަން ފޯރުކޮށްދެމުންދާ ކަމަށެވެ.
މި ދަނޑިވަޅުގައި، ތެލްއަވީވު ގައި ހުންނަވާ އެމެރިކާގެ ސަފީރު މައިކް ހަކަބީ ވިދާޅުވީ، އީރާނުގެ މުޒާހަރާ ކުރާ ފަރާތްތަކަށް އެމެރިކާގެ ފުރިހަމަ ތާއީދު އޮންނާނެ ކަމަށެވެ. އީރާނުގެ ސަރުކާރުން ތުހުމަތުކުރާ ގޮތުގައި، މި ހަމަނުޖެހުންތަކަކީ އިޒްރޭލުން އީރާނާ ދެކޮޅަށް ފަށާފައިވާ ހަނގުރާމައިގެ ދެވަނަ މަރުހަލާ އެވެ.
އޮފިޝަލުން ވިދާޅުވި ގޮތުގައި، މިހާތަނަށް 270 އަށްވުރެ ގިނަ ފުލުހުންނަށް އެކިވަރުގެ އަނިޔާ ލިބިފައިވެ އެވެ.
މުޒާހަރާތައް ފެށުނީ ތަކެތީގެ އަގު ބޮޑުވުމާއި އީރާނުގެ ފައިސާގެ އަގު ވެއްޓުމާ ގުޅިގެން ވިޔަފާރިވެރިން ކުރި އިހުތިޖާޖަކާ ގުޅިގެންނެވެ. ފަހުން މި އިހުތިޖާޖު ބޮޑެތި ހަމަނުޖެހުންތަކަކަށް ބަދަލުވި އެވެ.
މި މައްސަލައިގައި އިނގިރޭސިވިލާތް، ފަރަންސޭސިވިލާތް އަދި ޖަރުމަނުވިލާތުން ގުޅިފައިވާ ބަޔާނެއް ނެރެ، އީރާނަށް ފާޑުކިޔައި ހަމަނުޖެހުން ހިންގާ ފަރާތްތަކަށް ތާއީދުކޮށްފައިވެ އެވެ. ވިލާތުގެ އިއްތިހާދުން ވެސް ވަނީ އީރާނުގެ ސަލާމަތީ ބާރުތަކުގެ އަމަލުތަކަށް ފާޑުކިޔާފައެވެ.
