އެކަނިވެރި މައިންނަށް ދޭ އެލަވަންސް އަކީ އިންވެސްޓްމެންޓެއް، ފައިސާ ދެވެނީ ހައްގުވެރިންނަށް ކަން ކަށަވަރުކުރާނަން: ޖެންޑަރ މިނިސްޓަރ

ވިސްނުން ބަހައްޓަންވީ އެކަނިވެރި މައިންނަށް ދޭ އެލަވަންސް އަކީ އިންވެސްޓްމެންޓެއްގެ ގޮތުގައި ބެލުމަށް ކަމަށާއި، ފައިސާ ދެވެނީ ހައްގުވެރިންނަށް ކަން ސަރުކާރުން ކަށަވަރުކުރާނެ ކަމަށް ރައީސް ޑރ.މުހައްމަދު މުއިއްޒުގެ އިޖުތިމާއީ އަދި އާއިލީ ތަރައްގީއާ ބެހޭ ވަޒީރު ޑރ. އައިޝަތު ޝިހާމް ވިދާޅުވެއްޖެއެވެ.

ޑރ.އައިޝަތު ޝިހާމް އެފަދައިން ވިދާޅުވީ މިހާރު ސަރުކާރުން ގެނެސްދޭ ތަރުޖަމާނާއި އެކު ޕްރޮގްރާމްގައި ވާހަކަފުޅު ދައްކަވަމުންނެވެ. އެ ޕްރޮގްރާމްގެ 3 ވަނަ އެޕިސޯޑުގައި ދައްކާފައި ވަނީ އެކަނިވެރި މައިންނަށް ދޭ އެލަވަންސް އާއި ގުޅޭގޮތުންނެވެ. އެކަނިވެރި މައިންގެ އެލަވަންސް އަށް މި ފަހުން ގެނައި ބަދަލާއި މެދު ވަޒީރު ވަނީ ވާހަކަފުޅު ދައްކަވާފަ އެވެ. މީގެ އިތުރުން، ފަގީރު ހާލަތުގައި ދިރިއުޅެމުން އަންނަ އެކަނިވެރި ކުދިން ތިބި މައިންނާއި ބަފައިންނަށް ދައުލަތުން ދޭ އިނާޔަތަކީ އެ ފައިސާ ހައްގުވާ މީހުންނަށް ލިބޭ އެއްޗެއްކަން ގާތުން ބަލަމުންދާ ކަމަށް ވަޒީރު ވިދާޅުވި އެވެ.

ދައުލަތުގެ ބަޖެޓުން އެކަނިވެރި މައިންނާއި ބަފައިންނަށް ދޭ އިނާޔަތް 15،000 ރުފިޔާ އާއި ހަމައަށް ދެވޭނެހެން ބުރާސްފަތި ދުވަހު ގަވާއިދަށް ގެނައި އިސްލާހު 24 ގަޑި އިރު ތެރޭ ބަދަލުކޮށް، އެންމެ ގިނައިން އެ އިނާޔަތް ދެވޭ އަދަދު 12،000 ރުފިޔާ އަށް ސަރުކާރުން ވަނީ ކުޑަކޮށްފަ އެވެ. ނަމަވެސް އެ ސިޔާސަތާއި މެދު 15 ވަރަކަށް މިނިޓު ވަންދެން ވާހަކަދެއްކެވި އިރު ވެސް އެ ބަދަލު ގެނައި ސަބަބާއި މެދު އެއްވެސް ވާހަކަ އެއް ވަޒީރު ނުދައްކަވަ އެވެ. 

އިޖުތިމާއީ އެހީތެރިކަމުގެ ނިޒާމަކީ މުޅި ދައުލަތް ހިމެނޭހެން ހުރިހާ އާއިލާއަކަށް އަމާޒުކޮށްގެން ހިންގާ ނިޒާމެއް ކަަމަށާއި އޭގެ ފައިދާ މުޅި މުޖުތަމައު އަށް ކުރާނެ ކަމަށް ވަޒީރު ވިދާޅުވި އެވެ. މީގެ އިތުރުން ރައީސް އެންމެ ބޮޑު އެންމެ އިސްކަމެއް ދެއްވަނީ އޯގާތެރި މުޖުތަމައު އެއް ބިނާ ކުރެއްވުން ކަމަށް ވަޒީރު ވިދާޅުވި އެވެ.

މީގެ ހަ އަހަރުކުރިން، އެކަނި ދަރިން ބަލަހައްޓާ މަޔަކަށް ނުވަތަ ބަފަޔަކަށް ދައުލަތުން ދޭ މާލީ އެހީ ވަނީ، 3،000 ރުފިޔާއިން 10،000 ރުފިޔާ އާ ހަމައަށް އިތުރުކޮށްފަ އެވެ. ބުރާސްފަތި ދުވަހު އިސްލާހުކޮށް ގެޒެޓުކުރި ގަވައިދުގައިވާ ގޮތުން އެކަނިވެރި މައިންނަށާއި ބަފައިންނަށް ގިނަވެގެން ދޭ ފައިސާގެ އަދަދު ވަނީ 15،000 ރުފިޔާއަށް ބޮޑުކޮށްފަ އެވެ. އެއީ އަހަރެއްގެ މައްޗަށް 180،000 ރުފިޔާ އެވެ.

ބުރާސްފަތު ދުވަހު ގެނެވުނު ބަދަލާއެކު ކުރިން މަހެއްގެ މައްޗަށް ހަތަރު ކުދިންނާއި ހަމައަށް ކޮންމެ ކުއްޖަކަށް ދެމުން އައި އިނާޔަތް ވަނީ 3،000 ރުފިޔާ އަށް ބޮޑުވެފަ އެވެ. ހަތަރަކަށް ވުރެ ގިނަ ކުދިން ތިބި ބެލެނިވެރިއެއް ނަމަ އިތުރުވާ ކޮންމެ ކުއްޖަކަށް ދޭނީ 1،000 ރުފިޔާ އެވެ. ނަމަވެސް ހުކުރު ދުވަހު ގެނައި ބަދަލާއެކު ހަތަރު ކުދިންނަށްވުރެ ގިނަ ކުދިން ތިބި ނަމަވެސް އިތުރު ފައިސާއެއް ނުލިބޭނެ އެވެ. އިނާޔަތުގެ ގޮތުގައި ލިބޭނީ ހަތަރު ކުދިންނަށް، ކޮންމެ ކުއްޖަކަށް 3،000 ރުފިޔާގެ ރޭޓުން، ގިނަވެގެން 12،000 ރުފިޔާ އެވެ.