ބޭރު ގައުމުތަކުގެ އެހީއާ އެކު އީރާނުގައި ހިންގަމުންދާ ހަމަނުޖެހުންތަކާ ދެކޮޅަށް އެ ގައުމުގެ އެކި ކަންކޮޅުތަކުގައި ބޮޑެތި އެއްވުންތަކެއް ބާއްވައިފި؛ ހަތިޔާރު އެޅި ޓެރަރިސްޓުންތަކެއް މަރާލާފައިވާ ކަމަށް ފުލުހުން ބުނެފި

އީރާނުގައި ހިނގަމުންދާ ހަމަނުޖެހުންތަކާ ދެކޮޅަށް ސަރުކާރަށް ތާއީދު ކޮށް އެ ގައުމުގެ އެކި ކަންކޮޅުތަކުގައި ބޮޑެތި އެއްވުންތަކެއް ބާއްވައިފި އެވެ. 

ހުކުރު ނަމާދަށްފަހު އީރާނުގެ އެކި ސިޓީތަކުގައި އެތައް ހާސް ބަޔަކު ނިކުމެ، ބޭރުގެ ނުފޫޒާއެކު ހިންގަމުންދާ ހަމަނުޖެހުންތައް ހަރުކަށި އިބާރާތުން ކުށްވެރިކޮށްފައިވެ އެވެ. އީރާނުގެ ފުލުހުން ހާމަކުރި ގޮތުގައި، ސަލާމަތީ އޮޕަރޭޝަންތަކެއްގައި ހަތިޔާރު އެޅި ބައެއް ޓެރަރިސްޓުން ވަނީ މަރާލައި، އަދި ބައެއް މީހުން ހައްޔަރުކޮށްފަ އެވެ.

މި އެއްވުންތައް ބާއްވާފައި ވަނީ ލޮރެސްތާން، ޒަންޖާން، ހޫޒެސްތާން، ގޮމް، އަދި ޔަޒްދު ހިމެނޭހެން އީރާނުގެ އެތައް ޕްރޮވިންސެއްގެ ސިޓީތަކުގައެވެ. އެއްވުންތަކުގެ ބައިވެރިން ވަނީ އީރާނުގެ ގައުމީ ދިދަ އާއި، ގައުމުގެ ސަލާމަތާއި އިސްލާމީ ނިޒާމަށް ތާއީދުކުރާކަން ހާމަކޮށްދޭ ބޯޑުތައް އުފުލައި، އެ ގައުމުގެ ދާޚިލީ ހަމަޖެހުމަށް ގޮވާލާފަ އެވެ.

އެއްވުމުގެ ބައިވެރިން ބުނަމުންދިޔައީ، ރައްޔިތުންގެ ގާނޫނީ އަދި ސުލްހަވެރި ޝުއޫރުތަކާއި، ރޭވިގެން ހިންގާ ހަމަނުޖެހުންތަކާ ދެމެދު ސާފު ފަރަގެއް ހުންނަންޖެހޭނެ ކަމަށެވެ. އަދި އެމީހުން ވަނީ އެމެރިކާ އާއި އިޒްރޭލާ ދެކޮޅަށް އަޑުއުފުލައި، އެ ގައުމުތަކުގެ ނުފޫޒަށް ނޫނެކޭ ބުނެފައެވެ.

އިގްތިސާދީ ދަތިތަކާ ގުޅިގެން މިދިޔަ ހަފުތާގައި ބައެއް ވިޔަފާރިވެރިން ކޮންމެވެސް ވަރަކަށް މަގުމަތީގައި އިހުތިޖާޖު ކުރި ނަމަވެސް، އެމެރިކާ އާއި އިޒްރޭލުގެ އިސް ފަރާތްތަކުން ދިން ބަޔާންތަކާ ގުޅިގެން އެ ހަރަކާތްތައް ވަނީ ހަމަނުޖެހުމަށް ބަދަލުވެފަ އެވެ. އަދި އިޒްރޭލާ ގުޅުން އޮންނަ ފާރިސީ ބަހުން ވާހަކަދައްކާ މީޑިއާތަކުން ވަނީ ތަންތަނަށް ގެއްލުންދީ، މަސްލަހަތު ނަގާލުމަށް ބާރުއަޅާފައި ކަމަށް އީރާނުގެ ރަސްމީ ޓީވީން ބުނެފައިވެ އެވެ.

އީރާނުގެ ސަރުކާރުން ވަނީ ރައްޔިތުންގެ އިގްތިސާދީ ކަންބޮޑުވުންތަކަކީ ސައްހަ ކަންބޮޑުވުންތަކެއް ކަމަށް ބަލައިގަނެ، އެކަންކަން ހައްލުކުރާނެ ކަމަށް ވައުދުވެފަ އެވެ. ނަމަވެސް، އީރާނުގެ މަރުކަޒީ ބޭންކަށާއި ތެލުގެ އެކްސްޕޯޓަށް އަމާޒުކޮށް އެމެރިކާ އިން އަޅާފައިވާ ދަތިކުރުމުގެ ފިޔަވަޅުތަކުގެ ސަބަބުން ދިމާވެފައިވާ މި ހާލަތުގެ ނާޖާއިޒު ފައިދާ، ބޭރުގެ ނުފޫޒު އޮންނަ ފަރާތްތަކުން ނަގަމުންދާ ކަމަށް ސަރުކާރުން ތުހުމަތުކުރެ އެވެ.

ފުލުހުންގެ ތަރުޖަމާނު ބްރިގޭޑިއާ ޖެނެރަލް ސައީދު މުންތަޒަރު އަލްމަހުދީ ހުކުރު ދުވަހު ވިދާޅުވީ، ފުލުހުން މި މުޒާހަރާތައް ބަލަހައްޓަމުން ދަނީ އެންމެ މަތީ ދަރަޖައިގެ ކެތްތެރިކަމާއެކު ކަމަށެވެ. އަދި ހަގީގީ މުޒާހަރާގެ ބައިވެރިންނާއި، ގަސްދުގައި ހަމަނުޖެހުން އުފައްދާ މީހުން ވަކިކޮށް ދެނެގަތުމަށް ފުލުހުން އަބަދުވެސް އިސްކަންދޭ ކަމަށް އޭނާ ވިދާޅުވި އެވެ.

އޭނާ އިތުރަށް ވިދާޅުވި ގޮތުގައި، އާންމު ރައްޔިތުންގެ ސިފަ ޖެހިގެން ތިބި ބަޔަކު، ބޭރުގައި ހުންނަ އީރާނާ ދެކޮޅު މީޑިއާތަކުގެ އެހީތެރިކަމާއެކު ޒުވާނުންނަށް ނުބައި މަގު ދައްކައި، ބުރާސްފަތި ދުވަހުގެ ރޭ ހަމަނުޖެހުން އުފެއްދުމަށް މަސައްކަތް ކޮށްފައިވެއެވެ.