އީރާނުގައި މުޒާހަރާ ކުރާ މީހުންނަށް ޚާމަނާއީ ވަރުގަދަ އިންޒާރުތަކެއް ދެއްވައިފި

އީރާނުގައި ކުރިއަށްދާ މުޒާހަރާތައް ކޮންޓްރޯލް ކުރުމަށް ތެހެރާނުން މަސައްކަތް ކުރަމުންދާއިރު، މުޒާހަރާ ކުރާ ފަރާތްތަކަށް އެ ގައުމުގެ ރޫހާނީ ލީޑަރު ޚާމަނާއީ ވަރުގަދަ އިންޒާރުތަކެއް ދެއްވައިފި އެވެ.

އީރާނުގެ އެކި ކަންކޮޅުތަކުގައި ސަރުކާރާ ދެކޮޅަށް ކުރަމުންދާ ވަރުގަދަ މުޒާހަރާތަކާ ގުޅިގެން، ހުކުރު ދުވަހު އީރާނުގެ ދައުލަތުގެ ޓީވީ މެދުވެރިކޮށް ދެއްވި ޚިޠާބެއްގައި އެގައުމުގެ އެންމެ މަތީ ލީޑަރު އާޔަތުﷲ އަލީ ޚާމަނާއީ ވަނީ "ޓެރަރިސްޓް އަމަލުތަކާ" ދެކޮޅަށް އެއްބައިވަންތަކަން އިސްކުރުމަށް ގޮވާލައްވާފަ އެވެ.

 އީރާނުގެ ކަމާބެހޭ ފަރާތްތަކުން މި މުޒާހަރާތަކަކީ ބޭރުގެ ދުޝްމަނުން، ޚާއްޞަކޮށް އެމެރިކާގެ ރޭވުމެއް ކަމަށް ސިފަކުރާއިރު، ހަމަނުޖެހުންތައް ހުއްޓުވުމަށް ހަރުކަށި ފިޔަވަޅު އަޅާނެ ކަމަށް ޚާމަނާއީ ތަކުރާރުކޮށް ވިދާޅުވި އެވެ.

ޚާމަނާއީ ތުހުމަތު ކުރެއްވި ގޮތުގައި މުޒާހަރާގެ ބައިވެރިން އަމަލުކުރަމުން ދަނީ އެމެރިކާގެ ރައީސް ޑޮނަލްޑް ޓްރަމްޕްގެ އޯޑަރަށެވެ. އާންމު މުދަލަށް ގެއްލުންދެމުންދާ މީހުންނަކީ ބޭރުގެ ބާރުތަކުގެ "ކުލީ ސިފައިން" ކަމަށާއި، އެފަދަ ކަންކަމަށް ތެހެރާނުން ކެތް ނުކުރާނެ ކަމުގެ އިންޒާރު އޭނާ ދެއްވި އެވެ. 

ޑިސެމްބަރު 28 ގައި މުޒާހަރާތައް ފެށުނީއްސުރެ މިހާތަނަށް އެތައް ބަޔަކު މަރުވެފައިވާއިރު، އޭގެ ތެރޭގައި ސަލާމަތީ ބާރުތަކުގެ މަދުވެގެން ހަތަރު މީހަކު ހިމެނެ އެވެ. އީރާނުގެ ސަރުކާރަށް މިހާރު ވަނީ މަސްލަހަތު ކޮންޓްރޯލް ކުރުމަށް ބޮޑެތި ގޮންޖެހުންތަކަކާ ކުރިމަތިލާން ޖެހިފަ އެވެ.

ރައީސް މަސްއޫދު ޕެޒެޝްކިއަން ވަނީ ކެތްތެރިކަން އިސްކުރުމަށާއި ރައްޔިތުންގެ "ހަގީގީ" ޝަކުވާތައް އަޑުއެހުމަށް ގޮވާލައްވާފަ އެވެ. ނަމަވެސް، ސަރުކާރުގެ އެހެން ބައެއް ފަރާތްތަކުން ބުނަމުން ދަނީ ބޭރުގެ ދުޝްމަނުންގެ އެހީތެރިކަމާއެކު ކުރިއަށްދާ މި މުޒާހަރާތައް ހުއްޓުވުމުގައި އެއްވެސް ދުލެއް ނުދޭނެ ކަމަށެވެ.

އިގްތިސާދީ ދަތިތަކާ ގުޅިގެން ފެށުނު މި މުޒާހަރާތަކުގެ އަސްލަކީ އީރާނުގެ ފައިސާ، ރިއާލްގެ އަގު ވަރަށް ބޮޑަށް ވެއްޓުމާ ގުޅިގެން ތެހެރާނުގެ ވިޔަފާރިވެރިން ފާޅުކުރި ނުރުހުމެވެ.

މުޒާހަރާތައް ހުއްޓުވުމުގެ ފިޔަވަޅެއްގެ ގޮތުން ބުރާސްފަތި ދުވަހުން ފެށިގެން އީރާނުގެ ކަމާބެހޭ ފަރާތްތަކުން ވަނީ އިންޓަނެޓްގެ ޚިދުމަތް މެދުކަނޑާލާފަ އެވެ. ހުކުރު ދުވަހުވެސް އިންޓަނެޓްގެ އިތުރުން ފޯނުގެ ޚިދުމަތް މެދުކެނޑިފައިވާއިރު، ބައެއް އެއާލައިންތަކުން ވަނީ އެގައުމަށް ކުރާ ދަތުރުތައް ވެސް ކެންސަލްކޮށްފަ އެވެ.

މިފަދަ ހުރަސްތަކެއް ހުރި ނަމަވެސް، އެކްޓިވިސްޓުން އާންމުކޮށްފައިވާ ވީޑިއޯތަކުން ފެންނަ ގޮތުގައި، ވެރިރަށް ތެހެރާނާއި އެހެނިހެން ސަރަހައްދުތަކުގެ މަގުމަތީގައި އަލިފާން ރޯކޮށް، މުޒާހަރާގެ ބައިވެރިން ދަނީ ސަރުކާރާ ދެކޮޅަށް އަޑުއުފުލަމުންނެވެ.

މުޒާހަރާތަކާ ގުޅޭގޮތުން އީރާނުގެ ދައުލަތުގެ މީޑިއާ އިން ހުކުރު ދުވަހު ބުނެފައި ވަނީ، އެ މުޒާހަރާތަކުގައި ތަންތާގައި ހުޅުޖަހައި ހަމަނުޖެހުން ހިންގާފައި ވަނީ އެމެރިކާ އާއި އިޒްރޭލަށް ނިސްބަތްވާ "ޓެރަރިސްޓް އެޖެންޓުން" ކަމަށެވެ. 

އަނެއްކޮޅުން މުޒާހަރާގެ ބައިވެރިން މެރުމުގެ ފުރުސަތު އީރާނަށް ނުދޭނެ ކަމަށް ވިދާޅުވެ، އެމެރިކާގެ ރައީސް ޑޮނަލްޑް ޓްރަމްޕް ބުރާސްފަތި ދުވަހު އަނެއްކާ ވެސް ވަނީ އިންޒާރު ދެއްވާފަ އެވެ.

އިންޓަވިއުއެއްގައި ވާހަކަދައްކަވަމުން ޓްރަމްޕް ވިދާޅުވީ، މުޒާހަރާގެ ބައިވެރިންނާ ދެކޮޅަށް އެފަދަ ފިޔަވަޅެއް އަޅައިފި ނަމަ، އޭގެ ހިތި ނަތީޖާ އާ ކުރިމަތިލާންޖެހޭނެ ކަމުގެ ވަރުގަދަ އިންޒާރެއް އީރާނަށް ދީފައިވާނެ ކަމަށެވެ.

އީރާނުގެ ލީޑަރު އަލީ ޚާމަނާއީ ހުކުރު ދުވަހު ދައުލަތުގެ ޓީވީ މެދުވެރިކޮށް ދެއްވި ތަގުރީރުގައި ވިދާޅުވީ، މުޒާހަރާކުރާ، "ފިތުނަ އުފައްދާ" މީހުންގެ ކުރިމަތީގައި އިސްލާމީ ޖުމްހޫރިއްޔާ ފަހަތަކަށް ނުޖެހޭނެ ކަމަށެވެ.

ޖެނުއަރީ 3 ވަނަ ދުވަހުން ފެށިގެން އީރާނުގައި އިތުރުވަމުންދާ މުޒާހަރާތަކާ ގުޅޭގޮތުން ޚާމަނާއީ އިތުރަށް ވިދާޅުވީ، އެމެރިކާގެ ރައީސް ޑޮނަލްޑް ޓްރަމްޕަކީ އެތައް ހާސް އީރާނު ރައްޔިތުންގެ ލެއިން އަތް ތަޣައްޔަރުވެފައިވާ ފަރާތެއް ކަމަށެވެ. އަދި 1979 ވަނަ އަހަރުގެ އިންގިލާބުގެ ކުރިން އީރާނުގައި އޮތް ރަސްކަން ވައްޓާލި ފަދައިން، "ބޮޑާ" އެމެރިކާގެ ވެރިކަން ވެސް ނިމުމަކަށް އަންނާނެ ކަމަށް އޭނާ ވިދާޅުވި އެވެ.