އީރާނުން ހަނގުރާމަ ކުރާކަށް ބޭނުމެއް ނޫން، އެކަމަކު ހަމަލާ ދީފި ނަމަ ރައްދު ދޭން އޮތީ ތައްޔާރަށް: ޚާރިޖީ ވަޒީރު

އިޒްރޭލާއި އެމެރިކާއާ އެކު ހަނގުރާމަ އެއް ކުރަން އީރާނުން ބޭނުން ނުވާ ކަމަށާއި، ނަމަވެސް އަލުން ހަމަލާއެއް ދީފިނަމަ ރައްދު ދިނުމަށް އެގައުމު އޮތީ ތައްޔާރަށް ކަމަށް އީރާނުގެ ފޮރިން މިނިސްޓަރު އައްބާސް އަރަގްޗީ ބުރާސްފަތި ދުވަހު ވިދާޅުވެއްޖެ އެވެ.

ލުބުނާނުގެ ބެއިރޫތުގައި ނޫސްވެރިންނާ ވާހަކަދައްކަވަމުން އަރަގްޗީ ވިދާޅުވީ، އީރާނުގެ ނިއުކްލިއާ ޕްރޮގްރާމާ ގުޅޭގޮތުން އެމެރިކާ އާއެކު މަޝްވަރާކުރަން އީރާނުން ތައްޔާރު ކަމަށެވެ. ނަމަވެސް، އެ މަޝްވަރާތައް ބިނާވާން ވާނީ ވޮޝިންޓަނުން ބޭނުންވާ ގޮތަށް ކަންކަން މަޖުބޫރުކުރުމުގެ ބަދަލުގައި، ދެފަރާތުގެ މެދުގައި އޮންނަ އިހުތިރާމުގެ މައްޗަށް ކަމަށް އޭނާ ފާހަގަކުރެއްވި އެވެ.

މިނިސްޓަރު މިފަދައިން ވިދާޅުވެފައި މިވަނީ، އެމެރިކާގެ ގާތް ބައިވެރިއެއް ކަމަށްވާ އިޒްރޭލުން އަލުން އީރާނަށް ހަމަލާދީފާނެ ކަމުގެ ބިރު ބޮޑުވެފައިވާ ދަނޑިވަޅެއްގަ އެވެ. މިދިޔަ ޖޫން މަހު ހިނގި 12 ދުވަހުގެ ހަނގުރާމައިގެ ތެރޭގައި އިޒްރޭލުން ވަނީ އީރާނުގެ އަސްކަރީ އިސް ފަރާތްތަކާއި ބައެއް ނިއުކްލިއާ ސައިންސްވެރިން މަރާލާފަ އެވެ. އަދި އެމެރިކާ އިން ވަނީ އީރާނުގެ ނިއުކްލިއާ މަރުކަޒުތަކަށް ބޮން އަޅާފަ އެވެ.

"އެމެރިކާ އާއި އިޒްރޭލުން ވަނީ އީރާނަށް ހަމަލާދީ، އެމީހުންގެ އުކުޅުތައް ތަޖުރިބާކޮށްފައި. އެ ހަމަލާތަކާއި ސިޔާސަތުތަކަށް ކުރިމަތިލާން ޖެހުނީ ބޮޑު ނާކާމިޔާބީއަކާ،" ލުބުނާނަށް ކުރައްވާ ދެ ދުވަހުގެ ދަތުރުފުޅު ފަށްޓަވަމުން އަރަގްޗީ ވިދާޅުވިއެވެ. "އެމީހުން އެކަން ތަކުރާރުކޮށްފިނަމަ، ކުރިމަތިލާން ޖެހޭނީ ހަމަ އެ ނަތީޖާ އާ."

އޭނާ އިތުރަށް ވިދާޅުވީ، އީރާނުން އޮތީ ކޮންމެ ފަދަ ހާލަތަކަށް ވެސް ތައްޔާރަށް ކަމަށާއި، ހަނގުރާމަ އަކީ އެގައުމުން އެދޭ ގޮތް ނޫން ނަމަވެސް، ހަނގުރާމައަކަށް ފުރިހަމަ އަށް ތައްޔާރުވެފައިވާ ކަމަށެވެ.

އީރާނުން ނިއުކްލިއާ ހަތިޔާރު އުފެއްދުން ހުއްޓުވުމަށްޓަކައި، އެމެރިކާގެ ރައީސް ޑޮނަލްޑް ޓްރަމްޕް ވަނީ މިދިޔަ ފެބްރުއަރީ މަހުން ފެށިގެން އީރާނާ ދެކޮޅަށް "އެންމެ މަތީ ދަރަޖައިގެ ފިއްތުންތައް" ކުރިމަތިކުރުމުގެ ކެމްޕޭނެއް އަލުން ފަށްޓަވާފަ އެވެ. މި ކެމްޕޭނުގެ ދަށުން، ޖޫން މަހު އެމެރިކާ އިން ވަނީ އީރާނުގެ މުހިންމު ތިން ނިއުކްލިއާ މަރުކަޒަކަށް ހަމަލާދީފަ އެވެ.

އަރަގްޗީ ވިދާޅުވި ގޮތުގައި ތެހެރާނުން އޮތީ މަޝްވަރާ އަށް ތައްޔާރަށެވެ. ނަމަވެސް އެ މަޝްވަރާތައް ބިނާވާންވާނީ ދެފަރާތުގެ އިހުތިރާމާއި މަސްލަހަތުގެ މައްޗަށް ކަމަށް އޭނާ ވިދާޅުވި އެވެ. "އަޅުގަނޑުމެން ގަބޫލުކުރަނީ، އެމެރިކާ އިން ކަންކަން އަމުރުކުރުމުގެ ބަދަލުގައި ބިނާކުރަނިވި އަދި ހެޔޮލަފާ މަޝްވަރާތަކަކީ އެންމެ ރަނގަޅު ގޮތް ކަމަށް ގަބޫލުކުރާ ދުވަހަކުން، އެ މަޝްވަރާތަކުގެ ނަތީޖާ ފޮނިވާނެ ކަމަށް،" އޭނާ ވިދާޅުވި އެވެ.

2015 ވަނަ އަހަރު ދުނިޔޭގެ ބާރުތަކާއެކު އީރާނުން ވެފައިވާ ނިއުކްލިއާ އެއްބަސްވުމުން 2018 ވަނަ އަހަރު ޓްރަމްޕް ގެ ފުރަތަމަ ދައުރުގައި ވަކިވުމާ ގުޅިގެން، އީރާނުން ވަނީ ޔުރޭނިއަމް ފައްކާކުރާ މިންވަރު 60 އިންސައްތަ އަށް މަތިކޮށްފަ އެވެ. މިއީ ހަތިޔާރު އުފެއްދުމަށް ބޭނުންވާ މިންވަރާ ވަރަށް ގާތް މިންވަރެކެވެ. އީރާނުގެ ނިއުކްލިއާ ޕްރޮގްރާމަކީ ސުލްހަވެރި ބޭނުންތަކަށް ކުރިއަށްގެންދާ ޕްރޮގްރާމެއް ކަމަށް އެގައުމުން ބުނަމުންދިޔަ ނަމަވެސް، ހުޅަނގުގެ ގައުމުތަކާއި އދ. ގެ ނިއުކްލިއާ ވޮޗްޑޮގް (އައި.އޭ.އީ.އޭ) އިން ބުނަނީ 2003 ވަނަ އަހަރާ ހަމައަށް އީރާނުން ނިއުކްލިއާ ހަތިޔާރު އުފެއްދުމުގެ ރޭވުންތަކެއް ގެންގުޅުނު ކަމަށެވެ.

މިދިޔަ މަހު ފްލޮރިޑާގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާ އެކު ބޭއްވި ބައްދަލުވުމެއްގައި ޓްރަމްޕް ވަނީ، އީރާނުން އަލުން ނިއުކްލިއާ ޕްރޮގްރާމް ކުރިއަށްގެންދަން މަސައްކަތްކޮށްފި ނަމަ، އެމެރިކާ އިން އިތުރު އަސްކަރީ ހަމަލާތަކެއް ދީފާނެ ކަމުގެ އިންޒާރު ދެއްވާފަ އެވެ.