އިރާނު ގައި ފައިސާގެ އަގު ވެއްޓި ރައްޔިތުން މަގުތަކަށް ނުކުމެ މުޒާހަރާ ކުރަނީ

އީރާނުގެ ފައިސާގެ އަގު ވަރަށް ބޮޑަށް ވެއްޓުމާ ގުޅިގެން ކުރަމުންދާ މުޒާހަރާތަކުގެ ހަތަރުވަނަ ދުވަހު، އެ ޤައުމުގެ ދެކުނުގެ ޕްރޮވިންސެއް ކަމަށްވާ ފާރިސް ގައި ހުންނަ ސަރުކާރުގެ އިދާރާއަކަށް މުޒާހަރާގެ ބައިވެރިން ވަންނަން މަސައްކަތް ކޮށްފިއެވެ.

ފަސާ ސިޓީގައި ހިނގި މި ހަމަނުޖެހުންތަކުގައި ފުލުހުންގެ ތިން އޮފިސަރަކަށް އަނިޔާވެ، ހަތަރު މީހަކު ހައްޔަރުކޮށްފައިވާ ކަމަށް އޮފިޝަލުން މައުލޫމާތު ދެއެވެ. މީގެ އިތުރުން ހަމަދާން އާއި ލޮރެސްތާން ފަދަ ހުޅަނގުގެ ސަރަހައްދުތަކުގައި ވެސް ކުރިމަތިލުންތަކެއް ހިނގާފައިވާ ކަމަށް ރިޕޯޓްތައް ބުނެއެވެ.

ވެރިރަށް ތެހެރާންގައި ބުދަ ދުވަހަކީ ބަންދު ދުވަހެއްގެ ގޮތުގައި ކަނޑައަޅާފައި ވަނީ، ހިނގަމުންދާ ހަމަނުޖެހުންތައް މައިތިރިކުރުމުގެ މަޤްޞަދުގައި ކަމަށް ބެލެވެއެވެ.

ސޯޝަލް މީޑިއާގައި ދައުރުވަމުންދާ އަދި ބީބީސީން އިން ބުނި ގޮތުގައި ސައްހަކަން ކަށަވަރުކޮށްފައިވާ ވީޑިއޯތަކުން ފެންނަ ގޮތުގައި، ފަސާގެ ގަވަރުނަރުގެ އޮފީހުގެ ގޭޓު މުޒާހަރާގެ ބައިވެރިން ވަނީ ހަލާކުކޮށްލާފައެވެ. އަދި އޭގެ ރައްދުގައި ސަލާމަތީ ބާރުތަކުން ބަޑިޖަހާ މަންޒަރާއި، ބަންދުކޮށްފައިވާ ފިހާރަތަކުގެ ކުރިމަތިން ކަރުނަގޭސް އަރަމުންދާ މަންޒަރު ވެސް އެހެން ވީޑިއޯތަކުން ފެނެއެވެ.

އީރާން ސަރުކާރުން ކުއްލި ގޮތަކަށް އިއުލާންކުރި މި ބަންދު ދުވަހާ ގުޅިގެން މުޅި ޤައުމުގެ ސްކޫލްތަކާއި، ޔުނިވަރސިޓީތަކާއި ސަރުކާރުގެ މުއައްސަސާތައް ވަނީ ބަންދުކޮށްފައެވެ. ސަރުކާރުން ބުނާ ގޮތުގައި މިއީ ފިނި މޫސުމާ ގުޅިގެން ހަކަތަ އިގްތިސާދު ކުރުމަށް އެޅި ފިޔަވަޅެކެވެ. ނަމަވެސް، ގިނަ ބަޔަކު ގަބޫލުކުރާ ގޮތުގައި މިއީ މުޒާހަރާތައް ކޮންޓްރޯލް ކުރުމަށް ސަރުކާރުން ކުރި ކަމެކެވެ.

މި މުޒާހަރާތައް ފުރަތަމަ ފެށުނީ މިދިޔަ އާދީއްތަ ދުވަހު ތެހެރާންގަ އެވެ. އެއީ އެމެރިކާ ޑޮލަރާ އަޅާބަލާއިރު އީރާނުގެ ފައިސާގެ އަގު ވަރަށް ބޮޑަށް ވެއްޓުމާ ގުޅިގެން، އެކަމާ ހިތްހަމަނުޖެހުން ފާޅުކުރި ވިޔަފާރިވެރިންގެ ފަރާތުންނެވެ. އަންގާރަ ދުވަހާ ހަމައަށް އައިއިރު، ޔުނިވަރސިޓީ ދަރިވަރުން ވެސް އިހުތިޖާޖު ގައި ބައިވެރިވެ، އެކި ސިޓީތަކަށް މުޒާހަރާތައް ފެތުރި، ވެރިކަމާ ދެކޮޅަށް އަޑުއުފުލަން ފެށިއެވެ.

މިއީ 2022 ވަނަ އަހަރު މަހްސާ އަމީނީ ފުލުހުންގެ ބެލުމުގެ ދަށުގައި ހުއްޓާ މަރުވުމާ ގުޅިގެން ހިނގި ހަމަނުޖެހުންތަކަށް ފަހު، އީރާނުގައި މިހާ ފުޅާ ދާއިރާ އެއް ގައި މުޒާހަރާތައް ހިނގާ ފުރަތަމަ ފަހަރެވެ. ނަމަވެސް މިފަހަރުގެ މުޒާހަރާތަކުގެ ހަކަތަ ކުރީ ފަހަރާ އަޅާބަލާއިރު ކުޑަކަން ފާހަގަ ކުރެވޭ ކަމަށް ރިޕޯޓުތައް ބުނެ އެވެ.

ހަމަނުޖެހުންތައް އިތުރަށް ގޯސްވިޔަ ނުދިނުމަށްޓަކައި، ތެހެރާންގެ މުޒާހަރާ ފެށުނު ސަރަހައްދުތަކުގައި ސަލާމަތީ ފިޔަވަޅުތައް މިހާރު ވަނީ ވަރަށް ބޮޑަށް ވަރުގަދަކޮށްފައެވެ.

ރައީސް މަސްޢޫދު ޕެޒެޝްކިއަން ވިދާޅުވީ މުޒާހަރާގެ ބައިވެރިންގެ "ޑިމާންޑްތަކަށް" ސަރުކާރުން ސަމާލުކަން ދޭނެ ކަމަށެވެ. އެހެންނަމަވެސް، ޕްރޮސިކިއުޓަރ ޖެނެރަލް މުޙައްމަދު މުވައްޙިދީ-އާޒާދު ވަނީ ޤައުމުގެ ހަމަޖެހުން ނަގާލަން ކުރާ ކޮންމެ މަސައްކަތަކަށް "ވަރުގަދަ ރައްދެއް" ދޭނެ ކަމުގެ އިންޒާރު ދެއްވާފައެވެ.