އީރާނުގެ މުޒާހަރާތައް ފަސްވަނަ ދުވަހަށް ދެމިގެން ގޮސް މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދު ކުރިމަތިލުންތަކެއް ހިނގައި، ހަ މީހަކު މަރުވެއްޖެ

އީރާނުގެ ތިން ސިޓީއެއްގައި ބުރާސްފަތި ދުވަހު މުޒާހަރާގެ ބައިވެރިންނާއި ސަލާމަތީ ބާރުތަކާ ދެމެދު ކުރިމަތިލުންތަކެއް ހިނގައި، ހަ މީހަކު މަރުވެއްޖެއެވެ. މިއީ ތަކެތީގެ އަގު އިންތިހާއަށް އުފުލުމާ ގުޅިގެން ފެށުނު މުޒާހަރާތައް ސިޔާސީ މިސްރާބަކަށް އެނބުރި، ހަމަނުޖެހުންތަކުގެ ތެރެއިން މީހުން މަރުވި ފުރަތަމަ ފަހަރެވެ.

މި މުޒާހަރާތައް ފުރަތަމަ ފެށުނީ މިދިޔަ އާދީއްތަ ދުވަހު ތެހެރާނުގައެވެ. އެއީ ތަކެތީގެ އަގުބޮޑުވުމާއި އިގްތިސާދީ ހީނަރުކަމާ ގުޅިގެން ވިޔަފާރިވެރިން ފިހާރަތައް ބަންދުކޮށް އިހުތިޖާޖު ކުރަން ފެށުމުންނެވެ. މިހާރު މި މުޒާހަރާތައް ވަނީ ގައުމުގެ އެހެން ސަރަހައްދުތަކަށްވެސް ފެތުރިފައެވެ.

ބައެއް މުޒާހަރާތަކުގައި އީރާނުގެ އެންމެ މަތީ ވެރިޔާ އަލީ ޚާމަނޭއީއާ ދެކޮޅަށް އަޑުއުފުލައި، މިހާރު އޮތް ވެރިކަން ވައްޓާލުމަށްވެސް ވަނީ ގޮވާލާފައެވެ.

އީރާނުގެ ސަރުކާރާ ގުޅުން އޮންނަ ފާރްސް ނިއުސް އެޖެންސީން ބުރާސްފަތި ދުވަހު ރިޕޯޓްކޮށްފައިވާ ގޮތުގައި، ކުރިމަތިލުންތަކުގައި ފަސް މީހަކު ވަނީ މަރުވެފައެވެ.

މީގެ އިތުރުން، ހުޅަނގުގެ ސިޓީއެއް ކަމަށްވާ ކުހްދާޝްތުގައި ހިނގި ހަމަނުޖެހުންތަކެއްގައި ސަލާމަތީ ބާރުގެ މީހަކު މަރުވެފައިވާ ކަމަށް އެގައުމުގެ ދައުލަތުގެ ޓީވީން ބުރާސްފަތި ދުވަހުގެ ހެނދުނު ވަނީ ރިޕޯޓްކޮށްފައެވެ.

އީރާނުގެ ރައީސް މަސްއޫދު ޕެޒެޝްކިއަން ވަނީ މަސްރަހު ފިނިކުރުމަށް މަސައްކަތް ކުރައްވާފައެވެ. މުޒާހަރާގެ ބައިވެރިންގެ "ހައްގު ބޭނުންތަކެއް" ހުރިކަން ގަބޫލުކުރައްވާ ކަމަށް ވިދާޅުވެ، އިގްތިސާދީ ހާލަތު ރަނގަޅު ކުރުމަށް ފިޔަވަޅު އެޅުމަށް އެމަނިކުފާނު ވަނީ ސަރުކާރަށް ގޮވާލައްވާފައެވެ.

ނަމަވެސް، ކަމާބެހޭ އިދާރާތަކުން ވަނީ ހަމަނުޖެހުން އުފެއްދުމަށް މި ފުރުސަތުގެ ބޭނުން ހިފާ ފަރާތްތަކާ މެދު ހަރުކަށި ފިޔަވަޅު އަޅާނެ ކަމުގެ އިންޒާރު ދީފައެވެ.

މި މުޒާހަރާތަކާ ގުޅޭގޮތުން އެގައުމުގެ ބައެއް މީޑިއާތަކުން އިގްތިސާދީ ދަތިތަކަށް އަލިއަޅުވާލާއިރު، އަނެއްބައި މީޑިއާތަކުން ބުނެފައި ވަނީ "ފިތުނަ އުފައްދާ ފަރާތްތަކުން" ހިންގާ ހަމަނުޖެހުންތަކަށެވެ.

ފިނި މޫސުމުގައި ހަކަތަ އިގްތިސާދު ކުރުމުގެ ބޭނުމުގައި ކަމަށް ބުނެ، ކުއްލި ގޮތަކަށް ބުދަ ދުވަހަކީ ބަންދު ދުވަހެއްގެ ގޮތުގައި އީރާނު ސަރުކާރުން ވަނީ ކަނޑައަޅާފައެވެ. ނަމަވެސް، މި ނިންމުމާއި މުޒާހަރާތަކާ ރަސްމީކޮށް ގުޅުވާފައެއް ނުވެއެވެ.

އީރާނުގައި ހަފްތާ ބަންދު ފެށެނީ ބުރާސްފަތި ދުވަހުއެވެ. އަދި ހޮނިހިރު ދުވަހަކީ އެގައުމުގެ ރަސްމީ ބަންދު ދުވަހެކެވެ.

އީރާނުގެ ޕްރޮސެކިއުޓަރ ޖެނެރަލް ބުދަ ދުވަހު ވިދާޅުވީ، އިގްތިސާދީ ދަތިތަކާ ގުޅިގެން ސުލްހަވެރިކަމާއެކު ކުރާ އިހުތިޖާޖުތަކަކީ ގާނޫނީ ހައްގަކަށް ވީނަމަވެސް، ގައުމުގެ ސަލާމަތަށް ނުރައްކާވާ ފަދަ ކޮންމެ އަމަލަކަށް ހަރުކަށި ޖަވާބެއް ދޭނެ ކަމަށެވެ.