ކައުންސިލްތަކަށް ސަރުކާރު ޖަވާބުދާރީ އެއް ނުކުރުވޭނެ: ރައީސް މުޢިއްޒު
8 ޖެނުއަރީ 2026 | ބުރާސްފަތި 18:14ލާމަރުކަޒީ ނިޒާމުގެ ބޭނުމަކީ ރައްޔިތުން ބާރުވެރިކުރުވުން ކަމަށާއި އިދިކޮޅު ފަރާތްތަކުން ކައުންސިލް ކެމްޕޭން ކުރަނީ ސަރުކާރު ޖަވާބުދާރި ކުރުވަން ކަމަށް ބުނުމަކީ ގޯހެއް ކަމަށް ވިދާޅުވި.
ޕީއެންސީ ޖަގަހަ ހުޅުވުމުގެ ރަސްމިއްޔާތުގައި ރައީސް މުޢިއްޒު ވާހަކަފުޅުދައްކަވަނީ | ވިރާސީި
ކައުންސިލް ތަކަށް ހޮވާ މެންބަރުންނަކީ ސަރުކާރު ޖަވާބުދާރީ ކުރުވަން ހޮވާ ބައެއް ނޫން ކަމަށާއި ކައުންސިލްތަކަށް ސަރުކާރު ޖަވާބުދާރީ ނުކުރުވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވިދާޅުވެއްޖެ އެވެ.
އަގުބޮޑު މަރާމާތަކަށް ފަހު ޕީއެންސީގެ ޖަގަހަ ހިންގަމުންދިޔަ އިމާރާތުގައި އެ ޕާޓީގެ އޮފީސް ރަސްމީކޮށް ހުޅުވުމުގެ ރަސްމިއްޔާތުގައި ވާހަކަދައްކަވަމުން ރައީސް މުޢިއްޒު ވިދާޅުވީ، ކައުންސިލްތަކަކީ ގާނޫނީގޮތުން ވެސް ސަރުކާރު ޖަވާބުދާރީ ކުރުވަން އޮންނަ މުއައްސަސާއެއް ނޫން ކަމަށާއި ސަރުކާރު ޖަވާބުދާރީ ކުރުވަން ކައުންސިލް ތަކަށް މެންބަރުން ހޮވާ ކަމަށް ވަންޏާ އެއި ނުބައި ސިގްނަލް އެއް ކަމަށެވެ.
ރައީސް މުޢިއްޒު ވިދާޅުވީ ސަރުކާރު ޖަވާބުދާރި ކުރުވާނީ ކޮންބައެއްކަން ގާނޫނުގައި ވަރަށް ސާފުކޮށް ބަޔާން ކޮށްދީފައިވާ ކަމަށާއި ކައުންސިލް ތަކަށް އެކަން އެގޮތަށް ނުކުރެވޭނެ ކަމަށެވެ. އަދި ކައުންސިލް އަކީ ތިން ބާރު ވަކިވެފައި އޮތް ނިޒާމެއްގައި ވެރިކަން ހިންގުމުގެ ބާރުގެ ތެރޭގައި ހިމެނޭ ފަށަލައެއް ކަމަށް ރައީސް ވިދާޅުވި އެވެ.
ސަރުކާރުގެ ސިޔާސަތުތައް ތަންފީޒު ކުރަން އެ ހަވާލުކުރާ މަސައްކަތްތަކަށް އެހީތެރިކަން ދޭން ރައްޔިތުން ހޮވާފަ ތިބޭ މަންދޫބުން ތަކެއް ޑެއިލީ ހުންނަ މުނިސިޕަލް ކަންކަން ރައްވެހިކަމުގެ ހިދުމަތް ދިނުމުގެ އިތުރަށް ދެން ހުންނަ ތަރައްގިގެ މިކަހަލަ ކަންކަމުގަ އެއްބާރުލުން ދިނުން، އެހެން އެކަން ކުރަން ހޮވާ ބައެއް އެއީ. އެއީ ސަރުކާރު ޖަވާބުދާރި ކުރަން ހޮވާ ބައެއް ނޫންރައީސުލްޖުމްހޫރިއްޔާ ޑރ. މުހައްމަދު މުޢިއްޒު
ކައުންސިލްތަކުން ސަރުކާރު ޒިންމާދާރު ކުރުވުމަކީ މައްސަލައެއް ކަމަށް މުއިއްޒު ވިދާޅުވިއިރު، ސަރުކާރުގެ ބައެއް މައްސަލަތަކާ ހުރެ ވަރަށް ގިނަ ރަށްރަށުގެ ޕްރޮޖެކްޓުތައް ވަނީ ހުއްޓިފަ އެވެ. ލާމަރުކަޒީ ނިޒާމުގެ ބޭނުމަކީ ވެރިކަން ހިންގުމުގެ ބާރުގެ ފަށަލައެއްގެ ގޮތުގައި ކައުންސިލްތައް ހަރަކާތްތެރިވުމުގެ ބަދަލުގައި ރައްޔިތުން ބާރުވެރިކުރުވުމެވެ.
މުއިއްޒު ވެރިކަމަށް ވަޑައިގެންނެވި ފަހުން ރައްޔިތުންގެ ބާރު ހަނިވާނެ ގޮތަށް ލާމަރުކަޒީ ނިޒާމަށް ވަނީ ބޮޑެތި ބަދަލުތަކެއް ގެނެސްފަ އެވެ. އޭގެ ތެރޭގައި ކައުންސިލް ތަކަށް ވައްޒަފުން ނެގުމާއި ޕްރޮޖެކްޓުތައް ހިންގަން ލިބިފައިވާ ބާރު ވެސް ސަރުކާރުން ވަނީ ހަނިކޮށްފަ އެވެ.
އިދިކޮޅު ފަރާތްތަކުން ކައުންސިލް ކެމްޕޭން ކުރަނީ ސަރުކާރު ޖަވާބުދާރި ކުރުވަން ކަމަށާއި އެއީ ގޯހެއް ކަމަށް ވިދާޅުވެ ރައީސް މުޢިއްޒު ވަނީ ލޯކަލް ކައުންސިލް އިންތިޚާބުގައި އެމަނިކުފާނުގެ ޕާޓީގެ ކެންޑިޑޭޓުން ހޮވައިދިނުމަށް އެދިވަޑައިގެންފަ އެވެ.
