ޕީއެންސީ ޖަގަހަ ހުޅުވުން: އާންމު ރައްޔިތުންނަށް ތުރާލަކަށް!
އާޓިފިޝަލް ބީޗް ސަރަހައްދާއި ބޮޑުތަކުރުފާނު މަގުގެ ބައެއް ބަންދުކުރުމާއި ގުޅިގެން އެމްޓީސީސީ އިން ފޯރުކޮށްދޭ އާރްޓީއެލް ބަސް ރޫޓުތަކުގެ ތެރެއިން ކާނިވަލް އިން ހުޅުމާލެ އަށް ދަތުރުކުރާ ދެ ރޫޓާއި އަމީނީ ރޫޓުގެ ހިދުމަތް ބުރާސްފަތި ދުވަހުގެ ރޭ 4 ގަޑިއިރަށް މެދުކަނޑާލައިފި. ސުކޫލު ބޮޑު ބަންދު ދުވަސްވަރަކަށް އެކުވުމުން މި ބަދަލު ރައްޔިތުންނަށް ދަތިކަމަށްވާ ކަމަށް ބުނެ ބައެއް ފަރާތްތަކުން ހިތްހަމަ ނުޖެހުން ފާޅުކުރަމުންދޭ.
ޕީއެންސީ ޖަގަހަ ހުންނަ އިމާރާތް | ރާއްޖެ އެމްވީ
އަގުބޮޑު މަރާމާތަކަށްފަހު ޕީއެންސީގެ ޖަގަހަ ހިންގަމުންދިޔަ އިމާރާތުގައި އެ ޕާޓީގެ އޮފީސް ރަސްމީކޮށް ހުޅުވާތީ އެމްޓީސީސީ އިން ފޯރުކޮށްދެމުންގެންދާ އާރްޓީއެލް ބަހުގެ ހިދުމަތުގައި ހިމެނޭ ބައެއް ރޫޓުތަކުގެ ހިދުމަތް 4 ގަޑިއިރަށް މެދުކަނޑާލައިފި އެވެ.
އެމްޓީސީސީ އިން ނެރުނު އިއުލާނެއްގައި ބުނީ، އާޓީފިޝިއަލް ބީޗް ހިމެނޭ ސަރަހައްދާއި އިންވެގެން އޮންނަ ބޮޑުތަކުރުފާނު މަގުގެ ބައެއް ބަންދުކުރުމަށް ހަމަޖެހިފައިވުމާއެކު، އެ ކުންފުނިން ފޯރުކޮށްދެމުންގެންދާ އާރްޓިއެލް ބަހުގެ ހިދުމަތުގައި ހިމެނޭ ކާނިވަލް އިން ހުޅުމާލެ ފުރަތަމަ ފިޔަވަހި އަށް ދަތުރު ކުރާ ރޫޓައި ކާނިވަލް އިން ހުޅުމާލެ ދެވަނަ ފިޔަވައްސަށް ދަތުރު ކުރާ ރޫޓާއި އަދި އަމީނީ ރޫޓުގެ ހިދުމަތް ބުރާސްފަތި ދުވަހުގެ ރޭ 20:00 އިން ފެށިގެން 00:00 އާއި ހަމައަށް މެދުކަނޑާލެވޭނެ ކަމަށެވެ. ހަމަ އެއާއެކު އޯކިޑް ރޫޓަށް ބަދަލުތަކެއް ގެންނާނެ ކަމަށް ވެސް އެ އިއުލާނުގައި ބުނެފައިވެ އެވެ.
މިކަމާއި ގުޅިގެން އާންމު ރައްޔިތުންނަށް ދަތުރުފަތުރު ކުރުމުގައި ދަތިވާކަމަށް ބުނެ ބައެއް ފަރާތްތަކުން ދަނީ ހިތްހަމަނުޖެހުން ފާޅުކުރަމުންނެވެ. ހާއްސަކޮށް ސުކޫލު ބޮޑު ބަންދާއި ދިމާކޮށް ރާއްޖެތެރޭގެ ގިނަ ރަށްރަށުން މާލެ އަށް މީހުން ޖަމާވެފައިވާ ދުވަސްވަރެއްގައި އަރްޓީއެލް ބަހުގެ ހިދުމަތް މެދުކެނޑުމަކީ ބަލައިގަނެވޭނެ ކަމެއް ނޫންކަމަށް އެފަރާތްތަކުން ފާހަގަ ކުރެ އެވެ.
އެންމެ ފުރަތަމަ އެމްޑީޕީގެ ހަރުގެ ހިންގި މި އިމާރާތުގައި ފަހުން، އެ ޕާޓީން ވަކިވެ ކުރީގެ ރައީސް ނަޝީދު އުފެއްދެވި ދަ ޑިމޮކްރެޓްސްގެ ޖަގަހައެއް ވެސް ހިންގި އެވެ. ޕީއެންސީ އިން އެ ބިން ނެގީ ރިޔާސީ އިންތިހާބަށްފަހު އެވެ.
ބުރާސްފަތި ދުވަހުގެ ރޭ އެ ބިމުގައި އިމާރާތް ކޮށްފައިވާ ޕީއެންސީގެ އޮފީސް ހުޅުވިއިރު، އެއީ ހަތަރު ބުރީގެ އޮފީސް އިމާރާތެކެވެ. އޮފީސް އިމާރާތް އެޅުމަށް ޕީއެންސީ އިން ބޮޑު ހަރަދެއް ކުރި ކަމަށް މައުލޫމާތު ލިބުނު ނަމަވެސް ކުރި ހަރަދުގެ ސީދާ އަދަދެއް އަދި ސާފުވާގޮތް ވަނީ ނުވެފަ އެވެ.
ޕީއެންސީގެ އޮފީސް ހުޅުވުމުގެ ޖަލްސާގައި ވަޒީރުންނާއި މަޖިލިސް މެންބަރުން އަދި ސަރުކާރު ހިއްސާވާ ކުންފުނިތަކުގެ ވެރިންނާއި ޕީއެންސީގެ އާންމު މެންބަރުން ވެސް ބައިވެރިވި އެވެ.
