އިންޒާރު ދެއްވުމަށް ފަހު، ވައިޓް ހައުސް އަށް ވަޑައިގެންނެވުމުގެ ދައުވަތު ޓްރަމްޕް ކޮލަމްބިއާގެ ރައީސް ޕެޓްރޯ އަށް ދެއްވައިފި

އެމެރިކާގެ ރައީސް ޑޮނަލްޑް ޓްރަމްޕް، އެ ޤައުމުގެ ރިޔާސީ ގަނޑުވަރު، ވައިޓް ހައުސް އަށް ވަޑަައިގެންނެވުމުގެ ދައުވަތު ކޮލަމްބިއާގެ ރައީސް ގުސްޓާވޯ ޕެޓްރޯ އަށް ދެއްވައިފި އެވެ. 

ވައިޓް ހައުސް އަށް ވަޑައިގެންނެވުމުގެ ދައުވަތު ޓްރަމްޕް ޕެޓްރޯ އަށް ދެއްވާފައި ވަނީ ބުދަ ދުވަހު އެވެ. މިއީ ކޮލަމްބިއާ އިން މަސްތުވާ ތަކެތީގެ ވިޔަފާރީގައި ބައިވެރިވާ ކަމަށް ތުހުމަތުކޮށް، އެ ޤައުމަށް ސިފައިން ފޮނުވާނެ ކަމުގެ އިންޒާރު ދެއްވުމަށް ފަހު، ޓްރަމްޕް ދެއްވި ދައުވަތެކެވެ.

މިދިޔަ ހޮނިހިރު ދުވަހު ޓްރަމްޕް ވަނީ ޕެޓްރޯ އަށް އިންޒާރު ދެއްވައިފަ އެވެ. އެއީ ކޮލަމްބިއާ ކައިރީގައި އޮންނަ ވެނެޒުއެލާގެ ރައީސް ނިކޮލަސް މަދޫރޯ ހައްޔަރު ކުރުމަށް ފަހު އެވެ. އެމެރިކާގެ އަސްކަރިއްޔާ އަށް ޓްރަމްޕް ކުރެއްވި އުމުރާ އެކު، އެ ޤައުމުގެ އަސްކަރިއްޔާ އިން ވަނީ މަދޫރޯ އާއި އޭނާގެ އަނބިކަނބަލުން ހައްޔަރު ކޮށްގެން ގެންގޮސްފަ އެވެ. 

މިދިޔަ އަހަރުގެ ޖަނަވަރީ މަހުގެ ތެރޭގައި ރިޔާސީ ދެ ވަނަ ދައުރަކަށް ޓްރަމްޕް ވަޑައިގެންނެވި ފަހުން، ފުރަތަމަ ފަހަރަށް ފޯނުން ގުޅުއްވައި ޕެޓްރޯއާ ވާހަކަ ދައްކަވާފައި ވަނީ ބުދަ ދުވަހު އެވެ. 

އެ ފޯނު ކޯލާ ގުޅޭ ގޮތުން ޓްރަމްޕް ވިދާޅުވެފައި ވަނީ ވަރަށް އަވަހަށް ޕެޓްރޯއާ ބައްދަލު ކުރުމަށް ރާވަމުން އަންނަ ކަމަށެވެ. އެގޮތުން ޕެޓްރޯއާ ފޯނުން ގުޅުއްވައި މަޝްވަރާ ކުރައްވާފައި ވަނީ، އެމެރިކާ އާއި ކޮލަމްބިއާ އާ ދެމެދު އޮތް މސްތުވާ ތަކެތީގެ މައްސަލައިގެ ޚިލާފުތައް ސާފު ކުރުމަށް ކަމަށް ވެސް ޓްރަމްޕް ވިދާޅުވި އެވެ. 

ޓްރަމްޕް އޭނާގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވެފައި ވަނީ، ޕެޓްރޯއާ ކުރެއްވި ފޯނު ކޯލުގައި ދެކެވުނު ވާހަކަތަކާ މެދު އޭނާ ވަރަށް ބޮޑަށް ހިތްހަމަ ޖެހޭ ކަމަށެވެ. އަދި އެމެރިކާގެ ރިޔާސީ ގަނޑުވަރު، ވައިޓް ހައުސްގައި ވަރަށް އަވަހަށް ޕެޓްރޯ އާއެކު ބައްދަލުވުމެއް ބޭއްވޭނެ ކަމަށް އިންތިޒާރު ކުރައްވާ ކަމަށް ޓްރަމްޕް ވިދާޅުވެފައިވެ އެވެ. 

ހޮނިހިރު ދުވަހު މަދޫރޯ ހައްޔަރު ކުރުމަށް ފަހު، އާދީއްތަ ދުވަހު ޓްރަމްޕް ވަނީ ކޮލަމްބިއާ އަށް ވެސް ސިފައިން ފޮނުވަން ޖެހިދާނެ ކަމުގެ އިންޒާރު ދެއްވައިފަ އެވެ. ޓްރަމްޕް ވިދާޅުވެފައި ވަނީ ކޮަލަމްބިއާގެ ރައީސް ޕެޓްރޯ އަކީ ވެސް މަސްތުވާ ތަކެތީގެ ވިޔަފާރީގައި ބައިވެރިވާ މީހެއް ކަމަށާއި، އޭނާއާ ދެކޮޅަށް ވެސް ފިޔަވަޅު އަޅުއްވާނެ ކަމަށެވެ. ވެނެޒުއެލާ ގައި ހިންގި ފަދަ އޮޕަރޭޝަނެއް ކޮލަމްބިއާ ގައި ކުރިއަށް ގެންގޮސްދާނެތޯ ސުވާލު ކުރުމުން ޓްރަމްޕް ވިދާޅުވެފައި ވަނީ، އެކަން އިހުސާސް ކުރެވޭ ކަމަށެވެ. 

ޓްރަމްޕްގެ ވާހަކަތަކާ ގުޅިގެން ޕެޓްރޯ ވެސް ވަނީ ރައްދު ދެއްވައިފަ އެވެ. އެގޮތުން އެމެރިކާ އިން އަތުވެދާނެ ހަމަލާ އަކަށް ތައްޔާރަށް ހުންނެވި ކަމަށާއި، "ހަތިޔާރު ނަގައިގެން" ހުންނެވި ކަމަށް އޭނާ ވިދާޅުވި އެވެ. ޕެޓްރޯ ވިދާޅުވީ ދުވަހަކު ވެސް ހަތިޔާރު ނުނަގާނެ ކަަމަށް ވައުދުވެ ވަޑައިގެންފައި ވީ ނަމަވެސް، ޤައުމުގެ ހައްގުގައި އެކަން ކުރައްވާނެ ކަމަށެވެ. 

އޭގެ ފަހުން ޕެޓްރޯ ގޮވާލައްވާފައި ވަނީ އެ ޤައުމުގައި ޓްރަމްޕްއާ ދެކޮޅަށް އަޑު އުފުލައި، އިހުތިޖާޖު ކުރުމަށެވެ. މީޑިއާ ތަކުގައި ބުނެފައިވާ ގޮތުން ވައިޓް ހައުސް އަށް ވަޑައިގެންނެވުމަށް ޓްރަމްޕް ދެއްވި ދައުވަތު ޤަބޫލު ކުރައްވާނެ ކަމަށް، ޕެޓްރޯ ވަނީ އޭނާގެ އަަރިސް ބޭފުޅުންގެ ގާތުގައި ބުނެފަ އެވެ. ނަަމަވެސް، އެ ބައްދަލުވުން އޮންނާނެ ތާރީޚެއް ސާފުވެފައި ނުވެ އެވެ. 

ޓްރަމްޕްގެ ފޯނު ކޯލާ ގުޅޭ ގޮތުން ޕެޓްރޯ ވިދާޅުވެފައި ވަނީ، ވަރަށް ހަރުކަށި ގޮތެއްގައި ވާހަކަތައް ދައްކަމުން ގެންދިޔަ ނަމަވެސް، ޓްރަމްޕް އާއެކު އެއް ގަޑިއިރަށް ދެމިގެން ދިޔަ ފޯނު ކޯލާ އެކު ރާގު ބަދަލުވެފައިވާ ކަމަށެވެ. އަދި އެ ޤައުމުގެ ދެ މެދުގައި ގުޅުން ރަނގަޅު ކުރުމާ އެކު، ސީދާ ގޮތުން މުއާމަލާތް ކުރުމަށް ޓްރަމްޕްގެ ކިބައިން އެދިވަޑައިގެންފައިވާ ކަމަށް އޭނާ ވިދާޅުވި އެވެ.