ޔުކްރެއިންގެ ޑިފެންސް މިނިސްޓަރު ބަދަލު ކުރަން ޒެލެންސްކީ ނިންމަވައިފި

ޔޫކްރެއިންގެ ޑިފެންސް މިނިސްޓަރު ގެ މަގާމުގައި ހުންނެވި ޑެނީޝް ޝްމިގަލްގެ ބަދަލުގައި، އެހެން މީހަކު އެ މަގާމަށް އައްޔަން ކުރަން ހުށަހަޅުއްވާފައިވާ ކަމަށް، ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވިދާޅުވެއްޖެ އެވެ. 

ޒެލެންސްކީ ވިދާޅުވެފައި ވަނީ ޔޫކްރެއިންގެ ޑިފެންސް މިނިސްޓްރީގެ ހިންގުން އަދި ނިޒާމު ބަދަލު ކުރަން ނިންމަވާފައިވާ ކަމަށެވެ. އަދި މިހާރު ޑިޖިޓަލް މިނިސްޓަރު ގެ މަގާމުގައި ހުންނެވި، އުމުރުން 34 އަހަރުގެ މިހާލް ފެޑޮރޮފް އަށް ޑިފެންސް މިނިސްޓަރު ގެ މަގާމު ހުށަހަޅުއްވާފައިވާ ކަމަށް ޒެލެންސްކީ ވިދާޅުވި އެވެ. 

މީޑިއާ ތަކުގައި ބުނެފައިވާ ގޮތުން ފެޑޮރޮފް އަކީ ސިޔާސީ ދާއިރާ އަށް އައު މީހެކެވެ. 2019 ވަނަަ އަހަރުން ފެށިގެން ޑިޖިޓަލް މިނިސްޓަރު ގެ މަގާމު އަދާ ކުރައްވަމުން ގެންދެވި ނަމަވެސް، އޭނާ އަކީ ޔޫކްރެއިންގެ ރައްޔިތުންގެ މެދުގައި ވެސް އެހާ ފަރިތަ މޫނެއް ނޫން ކަމަށް ރިޕޯޓު ތަކުގައި ވަނީ ބުނެފަ އެވެ. 

ފެޑޮރޮފްއާ ގުޅޭ ގޮތުން އިތުރަށް ޒެލެންސްކީ ވިދާޅުވީ، އޭނާ އަކީ ޑްރޯންތަކާ ގުޅުން ހުރި ކަންކަމުގައި ވަރަށް އިސްކޮށް އުޅުއްވާ ބޭފުޅެއް ކަަމަށާއި، ސަރުކާރުގެ ޚިދުމަތްތަކާއި ކަންކަން ޑިޖިޓަލް ކުރުމުގައި އޭނާ އަކީ ވަރަށް ހުނަރުވެރި ބޭފުޅެއް ކަމަށެވެ. 

މިހާރުގެ ޑިފެންސް މިނިސްޓަރު އެ މަގާމުން ބަދަލު ކުރަން ނިންމެވި ސަބަބެއް ޒެލެންސްކީ ތަފްސީލު ކޮށްދެއްވާފައި ނުވެ އެވެ. ނަމަވެސް، އޭނާ އަށް ސަރުކާރުގެ އެހެން މުހިންމު ދާއިރާއެއް ހިންގުމަށް ހުށަހަޅުއްވާފައިވާ ކަމަށް ވިދާޅުވި އެވެ. ޑިފެންސް މިނިސްޓަރު ގެ މަގާމަށް ޝްމިގަލް އައްޔަން ކުރައްވާފައި ވަނީ 2025 ވަނަ އަހަރުގެ ޖުލައި މަހުގެ ތެރޭގަ އެވެ. 

ދިފާއީ ވުޒާރާ އަށް ގެންނަވާ ބަދަލުތަކާ އެކު، ޒެލެންސްކީ ވިދާޅުވީ އިތުރު ޚަރުދަނާ ކަމެއް ފެންނާނެ ކަމަށެވެ. އެގޮތުން ޔޫކްރެއިންގެ ހަނގުރާމައިގެ މައުލޫމާތު ހޯދުމުގެ އިސް ބޭފުޅަކަށް ހުންނެވި ކިރިލޯ ބުދަނޮފް ރިޔާސީ އޮފީހުގެ ވެރިޔަކަށް ކަނޑައަޅުއްވާފައިވާ ކަމަށް ވެސް ވިދާޅުވި އެވެ.