ކޯޓަށް ހާޒިރު ކުރުމުން މަދޫރޯ ވިދާޅުވީ އޭނާއަކީ "ކުށެއް ނެތް، އަބުރުވެރި އިންސާނެއް" ކަމަށާއި، އޭނާ އަކީ އަދިވެސް ވެނެޒުއޭލާގެ ގާނޫނީ ރައީސް ކަމަށް

ވެނެޒުއޭލާގެ ލީޑަރު ނިކޮލަސް މަދޫރޯ އެމެރިކާގެ ކޯޓަކަށް ހާޒިރު ކުރުމުން، އޭނާގެ މައްޗަށް އުފުލާފައިވާ މަސްތުވާތަކެތީގެ ވަގުފާރިކުރުމުގެ ދައުވާތަކަށް އިންކާރު ކުރައްވައިފިއެވެ.

ކޯޓުގައި ވާހަކަދައްކަވަމުން މަދޫރޯ ވިދާޅުވީ އޭނާއަކީ "ކުށެއް ނެތް، އަބުރުވެރި އިންސާނެއް" ކަމަށާއި، އޭނާ އަކީ އަދިވެސް ގައުމުގެ ގާނޫނީ ރައީސް ކަމަށެވެ.

ހޯމަ ދުވަހު ނިއުޔޯކްގެ ކޯޓަކަށް ފުރަތަމަ ފަހަރަށް ހާޒިރު ކުރުމުން މަދޫރޯ ވަނީ އޭނާގެ މައްޗަށް ކުރެވޭ ހުރިހާ ތުހުމަތުތަކަކަށް އިންކާރު ކުރައްވާފައެވެ. ގާޒީގެ ކުރިމަތީގައި އޭނާ ވިދާޅުވީ، "އަހަންނަކީ އަބުރުވެރި މީހެއް، އަދި އަހަރެންގެ ގައުމުގެ ރައީސް،" ކަމަށެވެ.

މަދޫރޯގެ އަނބިކަނބަލުން ސީލިއާ ފްލޯރެސްގެ މައްޗަށް އުފުލާފައިވާ މަސްތުވާތަކެތީގެ ދައުވާތަކަށް ވެސް އޭނާ ވަނީ އިންކާރު ކުރައްވާފައެވެ.

ކޯޓަށް ހާޒިރުކުރެވުނު އިރު މަދޫރޯ ހުންނެވީ ޖަލު ހެދުމުގައި ބިޑިއަޅުވާފައެވެ. ޝަރީއަތުގެ މަޖިލީހުގައި ދައްކާ ވާހަކަތައް ތަރުޖަމާކޮށް އަޑުއެހުމަށްޓަކައި އޭނާ ހުންނެވީ ހެޑްފޯން އަޅުއްވައިގެންނެވެ. ކޯޓުން އޭނާގެ ވަނަވަރު އޮޅުންފިލުވުމުން، އޭނާ އަކީ ވެނެޒުއޭލާގެ ރައީސް ކަމަށް ސްޕެނިޝް ބަހުން ވިދާޅުވިއެވެ. ނަމަވެސް އެމެރިކާގެ ކަމާބެހޭ ފަރާތްތަކުން އޭނާ އަކީ ވެނެޒުއޭލާގެ ރައީސް ކަމަށް ގަބޫލެއް ނުކުރެއެވެ. އެ ފަރާތްތަކުން ދެކޭގޮތުގައި އޭނާއަކީ އެ ގައުމުގެ ގާނޫނީ ލީޑަރެއް ނޫނެވެ.

މިއީ ދައުވާ ލިބޭ ފަރާތެއް ކޯޓަށް ހާޒިރުކޮށް، އޭނާގެ މައްޗަށް ކުރެވޭ ދައުވާތައް އިއްވައި، އެކަމަށް ޖަވާބުދާރީވުމަށް ފުރުސަތު ދެވޭ ފުރަތަމަ މަރުހަލާއެވެ. މަދޫރޯ ވިދާޅުވީ އޭނާ އަކީ ކުށްވެރިއެއް ނޫން ކަމަށާއި، އޭނާ އެތަނަށް ގެނެވުނީ "ރަހީނުކޮށްގެން" ކަމަށެވެ.

މަދޫރޯގެ މައްސަލަ ބައްލަވަނީ 92 އަހަރުގެ ގާޒީ އެއް

މަދޫރޯގެ މައްސަލަ ބައްލަވަނީ ނިއުޔޯކްގެ ސަދަން ޑިސްޓްރިކްޓް ކޯޓުގެ ސީނިއާ ޑިސްޓްރިކްޓް ޖަޖް، އުމުރުން 92 އަހަރުގެ އެލްވިން ހެލަސްޓީން އެވެ. އޭނާ އަކީ 1998 ވަނަ އަހަރު އެމެރިކާގެ ކުރީގެ ރައީސް ބިލް ކްލިންޓަން އައްޔަންކުރެއްވި ބޭފުޅެކެވެ. އޭނާ ވަނީ މީގެ ކުރިން ވެސް ސެޕްޓެމްބަރު 11 ގެ ހަމަލާތަކާއި ސޫދާނުގެ ގަތުލުއާންމާ ގުޅޭ ބޮޑެތި މައްސަލަތައް ބައްލަވާފަ އެވެ. ޝަރީއަތުގެ މަޖިލީހުގައި ހެލަސްޓީން ވިދާޅުވީ، އޭނާގެ މަސްއޫލިއްޔަތަކީ އިންސާފުވެރި ޝަރީއަތެއް ކުރިއަށް ގެންދިއުން ކަމަށާއި، އެކަން އެގޮތަށް ކުރައްވާނެ ކަމަށެވެ.

ގާޒީ ހެލަސްޓީން ވަނީ މަދޫރޯގެ ދެން އޮންނަ އަޑުއެހުން މާޗް މަހުގެ 17 ވަނަ ދުވަހަށް ތާވަލުކޮށްފަ އެވެ.

މަދޫރޯގެ މައްޗަށް ކުރެވޭ ތުހުމަތުތަކުގެ ތެރޭގައި، މެކްސިކޯގެ ސިނަލޯއާ އަދި ޒީޓާސް ކާޓެލްތަކާއި، ކޮލަމްބިއާގެ އެފް.އޭ.އާރު.ސީ (FARC) ހަނގުރާމަވެރިންނާ ގުޅިގެން ކޮކެއިން ޓްރެފިކް ކުރާ ނެޓްވޯކެއް ހިންގުން ހިމެނެ އެވެ. ނަމަވެސް މަދޫރޯ ޒަމާނުއްސުރެ މި ތުހުމަތުތައް ދޮގުކުރައްވަމުން ގެންދަވަ އެވެ. އޭނާ ވިދާޅުވާ ގޮތުގައި މިއީ ވެނެޒުއޭލާގެ މުއްސަނދި ތެލުގެ ރިޒާވަށް އަތްގަދަކުރުމަށް އެމެރިކާ އިން ހިންގާ ސިޔާސީ ރޭވުމެކެވެ.