ހުޅުމާލެ ފޭސް 3 ހިއްކާ ސަރަހައްދަށް ކުނި އަޅާ މަންޒަރާއި ކުނި ފެތުރޭ މަންޒަރު ފެންނާތީ ސުވާލު ކުރުމުން ރައީސް މުއިއްޒުގެ ތިމާވެއްޓާ ބެހޭ ވަޒީރު ހުންނެވީ ހަނު!
މީސްމީޑިއާގައި ދައުރުވަމުންދިއަ ވީޑިއޯ ތަކުންނާއި ރަސްމީ މީޑިއާތަކުގައި އާންމު ވި ވީޑިއޯ އިން ފެންނަކުނި އަޅައިގެން އެއްވެސް ފަރާތަކަށް ފިޔަވަޅު އެޅިންތޯ ނުވަތަ ފިޔަވަޅު އެޅުމުގެ މަސައްކަތް ކުރިއަށްދޭތޯ ރާއްޖެ އެމްވީ އިން މިނިސްޓަރާ ސުވާލު ކުރުމުން މިނިސްޓަރު ވަނީ މެސެޖަށް ޖަވާބު ނުދެއްވާ ހަނު ހުންނަވާފަ. އަދި ފޯނުން ގުޅުމުން ވެސް މިނިސްޓަރު ޖަވާބު ދެއްވާފަ އެއް ނުވޭ.
ހުޅުމާލެ ފޭސް 3 ގެ ހިއްކަމުންދާ ސަރަހައްދު
ހުޅުމާލެ ފޭސް 3 ހިއްކާ އިރު ކުނި އަޅައިގެން ނުހިއްކާނެ ކަމަށް ރައީސް މުހައްމަދު މުއިއްޒު ވިދާޅުވިި ނަމަވެސް އެ ހިއްކާ ސަރަހައްދަށް ކުނި އަޅާ މަންޒަރާއި އެ ސަރަހައްދަށް ކުނިތައް ފެތުރޭ މަންޒަރުތައް ފެންނަ ވީޑިއޯ އާއި ގުޅިގެން ސުވާލު ކުރުމުން އެކަމަށް ޖަވާބު ދެއްވުމަށް ރައީސް މުއިއްޒުގެ ތިމާވެއްޓާ ބެހޭ މިނިސްޓަރު ތޯރިގް އިބްރާހިމް އެއްޗެއް ވިދާޅުވާން ދެކޮޅު ހައްދަވައިފި އެވެ.
ހުޅުމާލެ ފޭސް 3 ހިއްކާ އިރު ކުނި އަޅައިގެން ނުހިއްކާނެ ކަމަށް ރައީސް މުހައްމަދު މުއިއްޒު ވިދާޅުވިި ނަމަވެސް އެ ހިއްކާ ސަރަހައްދަށް ކުނި އަޅާ މަންޒަރާއި މުޅި ސަރަހައްދަށް ކުނިތައް ފެތުރިގެންދާ މަންޒަރުތައް ރާއްޖެޓީވީ އަށް ވަނީ ލިބިފަ އެވެ.
އެހެން ކަމުން މީސްމީޑިއާގައި ދައުރުވަމުންދިއަ ވީޑިއޯ ތަކުންނާއި ރަސްމީ މީޑިއާތަކުގައި އާންމު ވި ވީޑިއޯ އިން ފެންނަ ކުނި އަޅައިގެން އެއްވެސް ފަރާތަކަށް ފިޔަވަޅު އެޅިންތޯ ނުވަތަ ފިޔަވަޅު އެޅުމުގެ މަސައްކަތް ކުރިއަށްދޭތޯ ރާއްޖެ އެމްވީ އިން މިނިސްޓަރާ ސުވާލު ކުރުމުން މިނިސްޓަރު ވަނީ މެސެޖަށް ޖަވާބު ނުދެއްވާ ހަނު ހުންނަވާފަ އެވެ. އަދި ފޯނުން ގުޅުމުން ވެސް މިނިސްޓަރު ޖަވާބު ދެއްވާފަ އެއް ނުވެ އެވެ.
މިކަމާ ބެހޭ ގޮތުން ހުޅުމާލޭ ފޭސް އެކެއްގެ ރައްޔިތުންނާ އެކު ބޭއްވި ބައްދަލުވުމުގައި ރައީސް މުއިއްޒު ވަނީ ކުނި ނާޅާނެ ކަމަށް ވިދާޅުވެ އެކަން ވަރަށް ބޮޑަށް ދޮގު ކުރައްވާފަ އެވެ. މުއިއްޒު ވިދާޅުވީ ބިން ހިއްކަނީ ކުނި އަޅައިގެން ނޫން ކަމަށެވެ.
އާދެ، މިތަނުގައި ފާހަގަކުރެވުނު ބައެއް ކަންކަމަށް ބަލާއިރުގައި، ބިން ހިއްކުމާ ގުޅޭގޮތުން ވަރަށް ހަގީގަތާ ޚިލާފު ވާހަކަފުޅެއް ބޭފުޅަކަށް ވިދާޅުވެވުނު. ބިން ހިއްކަނީ ކުނިއަޅައިގެންނޭ. ނޫން. ކުނިއަޅައިގެނެއް ނޫން ހިއްކަނީ. ހަމަ ކެޓަގަރިކަލީ އަޅުގަނޑު ދަންނަވަން. ކުނިއަޅައިގެނެއް ނުހިއްކާނެކަން.ރައީސް ޑރ. މުހައްމަދު މުއިއްޒު
މުއިއްޒު ވިދާޅުވީ މިހާރު މި ދިމާވެގެން އުޅޭ ކަމެއް ކަމަށް ލަފާކުރެވެނީ ފަރުކޮޅުފުށި ކައިރިން ހިއްކިއިރުގައި، އެތާހުރި ކުނިތައް ނެގުން ކަމަށާއި. ނަގާފައި އެތަނަށް އެޅީ ގައު ކުނޑި ކަމަށެވެ.
މަންޒަރު ދުށް މީހުން ކިޔައިދިން ގޮތުގައި ފަޅުތެރެއަށް ފެތުރިފައިވާ ކުނީގެ ތެރޭގައި ގަސްގަހާގެހީގެ ބައިތަކާއި، ޕްލާސްޓިކް ކޮތަޅާއި، ޓިނު ފަދަ ތަކެތި ހިމެނޭ ކަމަށެވެ. ލޮރީތަކުގައި ގެނެސް ކުނި އެ ސަރަހައްދަށް އަޅާ މަންޒަރު އާންމުންގެ އިތުރުން ނޫސްވެރިންނަށް ވެސް ފެނިފައިވެ އެވެ.
މުޅި ސަރަހައްދު ބަންދުކޮށްގެން ހިއްކުމުގެ މަސައްކަތް ކުރިއަށް ގެންދިޔަ ނަމަވެސް ނޫސްވެރިންގެ އިތުރުން މި ކަމުގައި ކަންބޮޑުވާ ފަރާތްތަކުން އެ ސަރަހައްދަށް އެކި ގޮތް ގޮތުން ވަދެ ފޮޓޯ އާއި ވީޑިއޯ ވަނީ ނަގާފަ އެވެ.
ކުނި މެނޭޖު ކުރުމާ ބެހޭ ގާނޫނާއި ގަވައިދުގެ ދަށުން ހުއްދަ ނެތް އެއްވެސް ތަނަކަށް ކުނި އެޅުމަކީ ކުށެކެވެ. ބިން ހިއްކުމުގެ ބޭނުމުގައި ވެސް ކުނި އެޅުމަކީ މަނާ ކަމެކެވެ.
ފަޅުތެރެއަށް ކުނި އެޅުމުގެ މައްސަލަތަކުގައި މީގެ ކުރިން އެކި ފަރާތްތައް ބޮޑެތި އަދަދުތަކުން ވަނީ ޖުރިމަނާ ކޮށްފަ އެވެ. އެ ގޮތުން ހުޅުމާލެ ފަޅުތެރެއަށް ކުނި އަޅައިގެން 2021 ވަނަ އަހަރު ވެމްކޯ ވެސް އޭރުގެ އެންވަޔަރަންމަންޓަލް ޕްރޮޓެކްޝަން އޭޖެންސީން 1.1 މިލިއަން ރުފިޔާ އިން ޖުރިމަނާ ކުރިއެވެ.
