239 މީހުންނާއެކު ދަތުރުކުރަނިކޮށް މެލޭޝިއާ އެއާލައިންސްގެ ބޯޓު ގެއްލުނުތާ ދިހަ އަހަރަށް ވުރެ ގިނަ ދުވަސް ވެފައިވަނިކޮށް، އޭވިއޭޝަންގެ ތާރީޚުގައި ދިމާވި އެންމެ ބޮޑު އެއް ސިއްރު ހޯދުމަށްޓަކައި އިންޑިއާ ކަނޑުގެ އަޑީގައި ކުރިއަށްގެންދާ އައު އޮޕަރޭޝަން ބުދަ ދުވަހު ވަނީ ފަށާފައi.
ފީނިކްސް އޮޓޮނޮމަސް އަންޑަރވޯޓަރ ވެހިކަލް (AUV) ބްލޫފިން-21 ބޭނުން ކޮށްގެން މެލޭޝިއާ އެއާލައިންސްގެ ފްލައިޓް އެމްއެޗް 370 ހޯދުމުގެ މަސައްކަތް 2014 އޭޕްރީލް މަހު އޮސްޓްރޭލިއާގެ ކޯސްޓްގާޑުން ކުރިއަށް ގެންދަނީ.
ގެއްލިފައިވާ މެލޭޝިއާ އެއާލައިންސްގެ ފްލައިޓް އެމްއެޗް 370 ހޯދުމަށް ކަނޑުގެ އަޑީގައި ކުރިއަށްގެންދާ އެންމެ ފަހުގެ މިޝަންގެ ހަރަކާތްތައް ފަށައިފި އެވެ.
239 މީހުންނާއެކު ދަތުރުކުރަނިކޮށް މެލޭޝިއާ އެއާލައިންސްގެ ބޯޓު ގެއްލުނުތާ ދިހަ އަހަރަށް ވުރެ ގިނަ ދުވަސް ވެފައިވަނިކޮށް، އޭވިއޭޝަންގެ ތާރީޚުގައި ދިމާވި އެންމެ ބޮޑު އެއް ސިއްރު ހޯދުމަށްޓަކައި އިންޑިއާ ކަނޑުގެ އަޑީގައި ކުރިއަށްގެންދާ އައު އޮޕަރޭޝަން ބުދަ ދުވަހު ވަނީ ފަށާފައެވެ.
މެލޭޝިއާގެ ޓްރާންސްޕޯޓް މިނިސްޓްރީން ބުދަ ދުވަހު ހާމަކުރި ގޮތުގައި، މި މަސައްކަތަށް ޚާއްޞަކޮށްފައިވާ "އާރމާޑާ 86 05" (Armada 86 05) ނަމަކަށް ކިޔާ އުޅަނދު، ކަނޑުގެ އަޑީގައި އަމިއްލަ އަށް ދަތުރުކުރާ ދެ އުޅަނދާއެކު ކަނޑައެޅިފައިވާ ސަރަޙައްދަށް މިހާރު ވަނީ ގޮސްފައެވެ.
މި އޮޕަރޭޝަން ކުރިއަށްދާ ސަރަޙައްދު ބަޔާނުގައި ހާމަކޮށްފައި ނުވި ނަމަވެސް، އެ އުޅަނދު މި މަސައްކަތަށް ތައްޔާރުވީ ވެސްޓަން އޮސްޓްރޭލިއާގެ ފްރީމެންޓަލް ބަނދަރުގައި ކަމަށް ބުނެފައިވެއެވެ.
މީގެ ކުރިންވެސް ބޯޓު ހޯދުމުގެ މަސައްކަތް ކުރި އަދި މި އައު އޮޕަރޭޝަންގައި ވެސް އިސްކޮށް އުޅޭނެ ކަމަށް ބެލެވޭ "އޯޝަން އިންފިނިޓީ" ކުންފުނީގެ ނަން ސަރުކާރުން ސީދާ ބަޔާންކޮށްފަ އެއް ނުވެއެވެ. ނަމަވެސް، ސަރުކާރުން ބަޔާންކުރި އުޅަނދަކީ އޯޝަން އިންފިނިޓީގެ އުޅަނދެއްކަން މެރިން އަދި އޭވިއޭޝަންގެ ޚަބަރުތައް ގެނެސްދޭ ވެބްސައިޓްތަކުން ވަނީ ކަށަވަރުކޮށްދީފައެވެ.
މިދިޔަ ޑިސެމްބަރު މަހު މެލޭޝިއާ ސަރުކާރުން ބުނެފައިވަނީ، އެމެރިކާގެ ޓެކްސަސް އަށް ނިސްބަތްވާ މި ކުންފުންޏާ އެކު "ފެނިއްޖެނަމަ ފައިސާ ދައްކާ ގޮތަށް" ވެފައިވާ އެއްބަސްވުމުގެ ދަށުން ކަނޑުގެ އަޑީގެ ވަކި ސަރަޙައްދުތަކެއް ބަލަން ފަށާނެ ކަމަށެވެ.
އޯޝަން އިންފިނިޓީން ވަނީ އެމްއެޗް 370 ހޯދުމުގެ މަސައްކަތް އަލުން ފަށާފައިވާކަން ކަށަވަރުކޮށްދީފައެވެ. ނަމަވެސް، މި މަސައްކަތުގެ ނާޒުކުކަމާއި މުހިންމު ކަމަށް ރިއާޔަތްކޮށް، އެކަމާ ގުޅޭ އިތުރު ތަފްޞީލެއް ދިނުމަށް އެ ކުންފުންޏަކުން ބޭނުމެއް ނުވިއެވެ.
2018 ވަނަ އަހަރުވެސް އެ ކުންފުނިން މިފަދަ އެއްބަސްވުމެއްގެ ދަށުން ކަނޑުގެ އަޑި ބަލާފައިވީ ނަމަވެސް، ބޯޓުގެ އެއްވެސް ނިޝާނެއް އޭރު ފެނިފައެއް ނުވެއެވެ. އެހެންނަމަވެސް، މިހާރު އެ ކުންފުނީގެ ޓެކްނޮލޮޖީ ކުރިއަރުވައި، ދިރާސާތައް އިތުރަށް ފުރިހަމަކޮށްފައިވާ ކަމަށް އެ ކުންފުނިން ބުނެއެވެ. ކުންފުނީގެ ސީއީއޯ އޮލިވާ ޕްލަންކެޓް މިދިޔަ އަހަރު ވިދާޅުވި ގޮތުގައި، ގިނަ މާހިރުންތަކަކާއެކު ކުރެވުނު މަސައްކަތުން، ބޯޓު ވެއްޓިފައިވާނެ ކަމަށް އެންމެ ބޮޑަށް ބެލެވޭ ސަރަޙައްދު މިހާރު ވަނީ ހަނިކުރެވިފައެވެ.
މި އަހަރުގެ ކުރީކޮޅު މެލޭޝިއާގެ ހުއްދައާއެކު އިންޑިއާ ކަނޑުގެ ދެކުނުން 15،000 އަކަކިލޯމީޓަރުގެ ސަރަޙައްދެއް ބެލުމުގެ މަސައްކަތް އޯޝަން އިންފިނިޓީން ފެށި ނަމަވެސް، މޫސުން ގޯސްވުމުގެ ސަބަބުން އޭޕްރީލް މަހު އެ މަސައްކަތް މެދުކަނޑާލަން ޖެހުނެވެ.
ކުއަލަލަމްޕޫރުން ފުރައިގެން ބެއިޖިން އަށް ދަތުރުކުރި މެލޭޝިއާ އެއާލައިންސްގެ މި ބޯޓު ރާޑާރުން ގެއްލުނީ މާޗް 8، 2014 ގައެވެ. ސެޓެލައިޓް ރެކޯޑުތަކުން ދައްކާ ގޮތުގައި، ބޯޓު ވަނީ އޭގެ އަސްލު މަގުން ކަސިޔާރުވެ، އިންޑިއާ ކަނޑުގެ ދެކުނުގެ އެކަހެރި ސަރަޙައްދަކަށް ދަތުރުކޮށްފައެވެ. ބޯޓުގެ މިސްރާބު ބަދަލުވާން މެދުވެރިވި ސަބަބެއް މިހާތަނަށް ހޯދިފައެއް ނުވެއެވެ.
ބޯޓު ހޯދުމަށް ބައިނަލްއަޤްވާމީ ފެންވަރުގައި ކުރިއަށްގެންދިޔަ ބޮޑު އަދި އަގުބޮޑު އޮޕަރޭޝަނުން ބޯޓު ފެނިފައި ނުވި ނަމަވެސް، ބޯޓުގެ ބައިތައް ކަމަށް ބެލެވޭ ބައެއް ތަކެތި ފަހުން ވަނީ އިރުމަތީ އެފްރިކާގެ އައްސޭރިފަށާއި އިންޑިއާ ކަނޑުގެ ބައެއް ޖަޒީރާ ރަށްތަކަށް ލައްގާފައެވެ. އެހެންނަމަވެސް، ބޯޓުގެ މައިގަނޑު ބައިތަކެއް ނުވަތަ އެއްވެސް މީހެއްގެ ހަށިގަނޑެއް މިހާތަނަށް ފެނިފައެއް ނުވެއެވެ.
