ސަރުކާރުން ސްޕޮންސަރ ދޭ މީޑިއާ ތައް ކަނޑައަޅައިފި، އެންމެ ގިނަ ލާރި ލިބެނީ އެ ފައިސާ ދޫކުރާ މިނިސްޓަރުގެ ޓީވީ އަށް
18 މީޑިއާއަކަށް 27.9 މިލިއަން ރުފިޔާ ދޫކުރަން ނިންމާފައިވާއިރު އެންމެ ގިނަ ފައިސާ ލިބެނީ ސަރުކާރުގެ އިސް ބޭފުޅުންގެ މަސްލަހަތު އޮންނަ މީޑިއާތަކަށް
މީޑިއާ ފެންޑާ ހުޅުވުމުގެ ރަސްމިއްޔާތުގެ ތެރެއިން
ރަޖިސްޓްރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދިނުމުގެ އުސޫލުގެ ދަށުން، ސަރުކާރުގެ އިސް ބޭފުޅުންގެ މަސްލަހަތު އޮންނަ މީޑިއާތައް ހިމެނޭހެން ފައިސާ ދޫކުރުމަށް ނިންމާ އެކަން އިއުލާންކޮށްފިއެވެ.
ރަޖިސްޓްރީކޮށްގެން ހިންގާ އަމިއްލަ މީޑިއާތަކަށް ދައުލަތުގެ ބަޖެޓުން މާލީ އެހީ ދިނުމުގެ އުސޫލުގެ ދަށުން 18 މީޑިއާއަކަށް 27.9 މިލިއަން ރުފިޔާ ދޫކުރަން ކަނޑައަޅައި އިއުލާނުކޮށްފި އެވެ.
މީޑިއާތަކަށް ދޫކުރުމަށް ނިންމާފައިވާ ފައިސާ ދޫކުރުމަށް ނިންމާފައި ވަނީ ޔޫތު މިނިސްޓްރީގެ ދަށުންނެވެ. ޔޫތް މިނިސްޓްރީން ހުޅުވާލާފައިވާ ފުރުސަތުގައި އެކަމަށް އެދި ކުރިމަތިލި މީޑިއާތަކުގެ ތެރެއިން ޝަރުތު ހަމަވާ މީޑިއާތައް މިހާރު ވަނީ އާއްމުކޮށްފައެވެ. އަދި އެ މީޑިއާތަކަށް ލިބޭ ފައިސާގެ ތަފްސީލް ވެސް ވަނީ އާއްމުކޮށްފައެވެ.
އޭގެ ތެރެއިން އެންމެ ގިނަ ފައިސާ ލިބެނީ އެ ފައިސާ ދޫކުރާ ވުޒާރާ، ޔޫތު މިނިސްޓްރީގެ ވަޒީރު އިބްރާހިމް ވަހީދު (އަސްވާޑް) ގެ މަސްލަހަތު އޮންނަ ސަންގު ޓީވީއަށެވެ. އެ ޓީވީއަށް ޖުމްލަ 3.8 މިލިއަން ލިބެއެވެ. މީގެ އިތުރުން ސަންގު އޮންލައިން އަށް 1.3 މިލިއަން ރުފިޔާ ލިބެ އެވެެ. އެހެންކަމުން ޖުމްލަ 5.1 މިލިއަން ރުފިޔާ މި ދެ މީޑިއާ އައުޓްލެޓަށް ލިބޭނެއެވެ.
ދެވަނައަށް އެންމެ ގިނައިން ފައިސާ ލިބެނީ ސަން އަށެވެ. ސަންމީޑިއާ ގްރޫޕްގެ ދަށުން ހިންގާ އެސްއެސްޓީވީ އަށް 2.9 މިލިއަން ރުފިޔާ ލިބޭ އޮރު ސަން އޮންލައިނަށް 1.3 މިލިއަން ރުފިޔާ ލިބޭނެ ކަމަށް އާއްމުކޮށްފައިވާ ހިސާބުތަކުން އެނގެއެވެ. ސަން މީޑިއާ އަކީ އެމްޑީއޭގެ ލީޑަރ އަހުމަދު ސިޔާމް މުހައްމަދުގެ މަސްލަހަތު އޮންނަ މީޑިއާއެކެވެ.
މީގެ އިތރުުން ޖުމްހޫރީ ޕާޓީގެ ލީޑަރ ޤާސިމް އިބްރާޙިމްގެ މަސްލަހަތު އޮންނަ ވީޓީވީއަށް ތިން މިލިއަން އަދި ވީނިއުސް އޮންލައިނަށް 1.1 މިލިއަން ލިބޭނެ މަގު ވަނީ ފަހިކޮށްދީފައެވެ. އެހެނިހެން މީޑިއާތަކަށް ފައިސާ ދޫކުރަން ނިންމާފައިވާ ގޮތަށް ބަލާ އިރު ވޮއިސް، ވަންއޮންލައިން، ދަޕްރެސް، ދައުރަށް 1.3 މިލިއަން ރުފިޔާ ދިނުމަށް ނިންމާފައިވެއެވެ. އަދި މިހާރު އަށް 1.2 މިލިއަން، މިހާރުގެ ދަށުން ހިންގަމުންދާ އެޑިޝަން އަށް 1.1 މިލިއަން ދިނުމަށް ވަނީ ނިންމާފައެވެ.
ހަމައެހެންމެ ތީރު، އަދަދު ނޫސް، ދިޔަރެސް އަށް 1.1 މިލިއަން ރުފިޔާ އަދި ގާފު އޮންލައިން އަށް 1 މިލިއަން ރުފިޔާ ދިނުމަށް ވަނީ ނިންމާފައެވެ. މީގެ އިތުރުން މާލްދީފް އޮންލައިން އަށް 899،197 ރުފިޔާ އަދި ތިލަދުން އަށް 1.2 މިލިއަން ރުފިޔާ ދިނުމަށް ވަނީ ނިންމާފައެވެ. މީޑިއާތަކަށް ދިނުމަށް ކަނޑައަޅާފައި ވަނީ ދައުލަތުގެ ބަޖެޓުގެ އަންދާޒާ ކުރާ އާމްދަނީގެ 0.1 ޕަސެންޓެވެ.
ފައިސާ ލިބޭ މީޑިއާ ގެ ތެރޭގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އަރަބި ބަހުން ނެރުއްވާ މާލްދީފް އޮންލައިން ހިމެނޭ އިރު އެ ނޫހަކީ ޝަހީމްގެ ދަރިފުޅު މާހިލް ޝަހީމްގެ އިތުރުން ޝަހީމްގެ ގާތް ބޭފުޅެއް ކަމަށްވާ އިސްލާމިކް މިނިސްޓްރީގެ ނައިބު މިނިސްޓަރު އަލީ އަހުސަންގެ ކޮއްކޮ އިބްރާހިމް އަޝްވާގުގެ ހިއްސާ އޮތް ނޫހެކެވެ. އެ ނޫހަށް އިނގިރޭސި ހަބަރު ލިޔަން މި އަހަރު ފެށި ނަމަވެސް މި އަހަރު ތެރޭގައި މާ ގިނަ ހަބަރުތަކެއް އެ ނޫހުން ފެންނާކަށް ނެތެވެ.
މީގެ އިތުރުން ދިޔަރެސް ނޫހަކީ ޕީއެންސީގެ މެމްބަރެއްގެ ގޮތުގައި ހުންނެވި ހިތަދޫ މެދު ދާއިރާގެ މެންބަރު އަހުމަދު އަޒާންގެ ނޫހެވެ. ފައިސާ ދޭ ބައެއް ނޫސްތަކަކީ ދުވާލަކު އެއް ފަހަރު ވެސް ބައެއް ފަހަރު ޚަަބަރެއް ނުލިޔާ ނޫސްތަކެއް ކަމަށް ފާޑުކިޔާ ފަރާތްތަކުން ފާހަގަ ކުރެއެވެ، އެހެންކަމުން ފައިސާ ދިނުމުގައި ބަލާފައިވާ ކަންކަމާއި މެދު ބައެއް އާއްމުން ދަނީ ސުވާލު އުފައްދަމުންނެވެ.
